جۇك تاسىمالداۋشىلاردىڭ شەكارادان ءوتۋىن جەڭىلدەتۋ ماقساتىندا بيىلعى مامىردان باستاپ ەنگىزىلگەن ەلەكتروندى كەزەك جوباسىنىڭ ترانزيتتىك كولىك قوزعالىسىنا كەدەرگى كەلتىرگەنىنە شاعىمدانعان 200-دەن استام اۋىر جۇك كولىگى جۇرگىزۋشىلەرى جاعدايدى رەتتەۋدى سۇرايدى. نەگىزگى ماسەلە – «جايساڭ» وتكىزۋ بەكەتىندە ەلەكتروندى كەزەكتىڭ دۇرىس جۇمىس ىستەمەۋىنەن تۋىنداعان كەپتەلىس. كولىك قۇرالدارىنىڭ كىرىپ-شىعۋ ءتارتىبىن رەتتەيتىن اقپاراتتىق تابلوسى بار جيناقتاۋ الاڭى بولماۋىنان اۋىر جۇك كولىكتەرى جەڭىل كولىكتەرمەن بىرگە كۇنى بويى كەزەك كۇتەدى. مۇنداي جاعداي لوگيستيكاداعى تارتىپسىزدىككە, كۇتۋ ۋاقىتىنىڭ ارتۋىنا جانە بيزنەسكە كەلەتىن شىعىنداردىڭ كوبەيۋىنە اكەلەدى.
تاعى ءبىر وزەكتى ماسەلە –كورسەتىلەتىن قىزمەت ساپاسىنىڭ تومەندىگى. جۇيە اقىلى بولعانىنا قاراماستان, جۇرگىزۋشىلەر وتكىزۋ بەكەتىندەگى كۇتۋگە ارنالعان ايماقتاردىڭ, سانيتارلىق نىسانداردىڭ جانە دەمالاتىن ورىنداردىڭ تالاپقا ساي ەمەستىگىنە نارازى.
قازىرگى ۋاقىتتا وتكىزۋ بەكەتىندەگى كىدىرىسكە تاسجول بويىنداعى جوندەۋ جۇمىستارى دا كەدەرگى كەلتىرىپ وتىر. كەڭەس مۇشەلەرى ەلەكتروندى كەزەككە تىركەلگەن كولىك قۇرالدارىن كەدەرگىسىز تەكسەرىستەن وتۋگە باسىمدىق بەرۋ, اقپاراتتىق تابلوسى بار جيناقتاۋ الاڭىن جاساقتاۋ, جول جوندەۋ كەزىندە ترانزيتتىك كولىكتەر قوزعالىسىن جول پوليتسياسىنىڭ باقىلاۋعا الۋىن تاپسىردى.
اقتوبە وبلىسى.
