فوتو: تسم
بۇل مودۋل ارقىلى پايدالانۋشىلار گيدتەر تۋرالى ناقتى, تەكسەرىلگەن اقپاراتتى الا الادى. ال گيدتەر وزدەرىنىڭ كاسىبي بىلىكتىلىگىن راستاپ, تەستىلەۋدەن ءوتىپ, قوسىمشا ءبىلىم الۋ مۇمكىندىگىنە يە بولادى.
تىركەۋدەن جانە تەستىلەۋدەن ءساتتى وتكەن گيدتەرگە ولاردىڭ مارتەبەسى مەن كاسىبي دايارلىعىن راستايتىن بىرىڭعاي ستاندارتتاعى رەسمي بەيدج تابىستالادى. قازىرگى تاڭدا مۇنداي بەيدجدى 93 گيد يەلەنىپ وتىر.
بىلىكتى مامانداردى قولداۋ باستاماسى اياسىندا ەلىمىز بويىنشا 41 تۋريستىك نىسانعا جەڭىلدىكپەن كىرۋ مۇمكىندىگى ۇسىنىلادى. جەڭىلدىك گيدتەر مەن ولاردىڭ الىپ جۇرەتىن ۇيىمداستىرىلعان تۋريستىك توپتارىنا ارنالعان.
وڭىرلەر ءبولىنىسى بويىنشا مۇنداي نىساندار قاتارىندا:
الماتى وبلىسى – 17 نىسان, ونىڭ ىشىندە «كولساي كولدەرى», «شارىن» شاتقالى, «ىلە-الاتاۋ» ۇلتتىق پاركى, سونداي-اق مۋزەيلەر مەن قورىقتار;
استانا قالاسى – 9 نىسان, سونىڭ ىشىندە «بايتەرەك» مونۋمەنتى, «استانا وپەرا» تەاترى, ۇلتتىق مۋزەي;
الماتى قالاسى – «شىمبۇلاق» كۋرورتى, ءا. قاستەەۆ اتىنداعى مەملەكەتتىك ونەر مۋزەيى, «عىلىم ورداسى» مۋزەيى جانە ورتالىق مەملەكەتتىك مۋزەيدە جەڭىلدىك قاراستىرىلعان;
سولتۇستىك قازاقستان وبلىسى – «بوتاي» مۋزەي-قورىعى;
جەتىسۋ وبلىسى – «التىن-ەمەل» ۇلتتىق پاركى مەن جەتىسۋ الاتاۋى مەملەكەتتىك تابيعي پاركى بار.
