فوتو: اقوردا
پاريج كەلىسىمى مەن 2030 كۇن ءتارتىبى — الەم ءۇشىن ماڭىزدى باعىتتار ەكەنىن اتاپ وتكەن پان گي مۋن, قازاقستاننىڭ بۇل سالاداعى بەلسەندى ۇستانىمىن ەرەكشە اتاپ ءوتتى.
«سىزدەردىڭ تۇراقتى دامۋ مەن كليماتتىڭ وزگەرۋى ماسەلەلەرىنە قوسقان ۇلەستەرىڭىزدى قولدايمىن. بيىلعى فورۋمنىڭ «يدەيالاردى بىرىكتىرە, بولاشاقتى قالىپتاستىرا» تاقىرىبى – ءدال قازىر بىزگە قاجەت كوشباسشىلىقتىڭ كورىنىسى», دەدى بۇۇ-نىڭ ەكس-باس حاتشىسى.
پان گي مۋن جاھاندىق ەكولوگيالىق جانە كليماتتىق سىن-قاتەرلەر تەك بىرلەسكەن حالىقارالىق ىنتىماقتاستىق ارقىلى عانا شەشىلەتىنىن ايتتى.
«قانداي مىقتى نەمەسە رەسۋرستارعا باي بولماسىن, بىردە-ءبىر ەل جالعىز ءوزى كليماتتىق وزگەرىستەر مەن ەكولوگيالىق داعدارىستى ەڭسەرە المايدى. مۇنداي قاۋىپتەر ساياسي يدەولوگيالاردىڭ نەمەسە كەز كەلگەن جاساندى قۇرىلىمداردىڭ شەكاراسىنان تىس», دەدى پان گي مۋن.
ورتالىق ازياداعى وڭىرلىك سەرىكتەستىككە دە ەرەكشە نازار اۋدارعان پان گي مۋن سامارقاندتاعى كليمات فورۋمىن مىسالعا كەلتىرىپ, قازاقستاننىڭ بەلسەندىلىگىن جوعارى باعالادى.
پان گي مۋننىڭ پىكىرىنشە, قازاقستاننىڭ تازا ەنەرگەتيكاعا ينۆەستيتسيا سالۋى – ەلدىڭ ۇزاق مەرزىمدى, ورنىقتى دامۋىنا جول اشاتىن ماڭىزدى فاكتور:
«قازاقستان جاڭارتىلاتىن ەنەرگيا كوزدەرىنە ينۆەستيتسيالاۋ ارقىلى تۇراقتى بولاشاققا ناقتى قادام جاساپ وتىر. بۇل – وزگە ەلدەرگە ۇلگى بولارلىق تاجىريبە», دەدى ول.
