ءماجىلىس سپيكەرى بۋندەسرات توراعاسىنىڭ ساپارى مازمۇندى ءوتىپ جاتقانىن ايتتى. بۇعان دەيىن انكە رەلينگەردى قازاقستان پرەزيدەنتى قاسىم-جومارت توقاەۆ قابىلدادى, سونداي-اق ول پرەمەر-مينيستر ولجاس بەكتەنوۆپەن جانە سەنات توراعاسى ماۋلەن اشىمباەۆپەن كەلىسسوزدەر جۇرگىزدى.
ەرلان قوشانوۆ قازاقستان گەرمانيانى ەۋروپاداعى نەگىزگى ستراتەگيالىق سەرىكتەس رەتىندە قاراستىراتىنىن اتاپ ءوتتى.
– ەكى ەل اراسىنداعى ساياسي ديالوگ ءوزارا تۇسىنىستىك پەن سەنىم رۋحىندا دامىپ كەلەدى. سوڭعى جىلدارى جوعارى دەڭگەيدە ساپار الماسۋ وتە بەلسەندى جۇرگىزىلىپ جاتىر. ول – 2023 جىلعى ماۋسىم ايىندا گەرمانيانىڭ فەدەرالدى پرەزيدەنتى فرانك-ۆالتەر شتاينمايەردىڭ قازاقستانعا جاساعان ساپارى, 2023 جىلعى قىركۇيەك ايىندا پرەزيدەنت قاسىم-جومارت توقاەۆتىڭ گەرمانياعا جاساعان ساپارى, سونداي-اق گەرمانيا فەدەرالدى كانتسلەرى ولاف شولتستىڭ ساپارى مەن سونىڭ اياسىندا وتكەن «ورتالىق ازيا – گەرمانيا» فورماتىنداعى ەكىنشى ءسامميى, – دەدى ءماجىلىس سپيكەرى.
ءماجىلىس توراعاسى پارلامەنتارالىق بايلانىس ساياسي ديالوگتىڭ ماڭىزدى بولشەگىنە اينالعانىنا نازار اۋداردى. ول انكە رەلينگەردىڭ ساپارى پارلامەنتتىك ىقپالداستىققا تىڭ سەرپىن بەرەتىنىنە سەنىم ءبىلدىردى.
سونىمەن قاتار ءماجىلىس سپيكەرى گەرمانيالىق ارىپتەستەرىنە مەملەكەت باسشىسىنىڭ «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» فورمۋلاسى اياسىندا جۇرگىزىلىپ جاتقان قازاقستانداعى اۋقىمدى رەفورمالار تۋرالى مالىمەت بەردى. اسىرەسە, كوپپارتيالى ءماجىلىستىڭ جۇمىسىنا, الەۋمەتتىك ادىلدىكتى, زاڭ ۇستەمدىگى مەن ءتارتىپتى ىلگەرىلەتۋگە, سونداي-اق ەكونوميكانى دامىتۋعا باعىتتالعان زاڭدارعا ەرەكشە كوڭىل ءبولدى.
ءوز كەزەگىندە بۋندەسرات پرەزيدەنتى قازاقستانداعىساياسي وزگەرىستەر مەن ەكونوميكالىق جەتىستىكتەردى قولدادى. گەوساياسي تۇراقسىزدىق جاعدايىندا قازاقستان گەرمانيانىڭ سەنىمدى سەرىكتەسى بولىپ وتىرعانىنا نازار اۋداردى. سونداي-اق كليماتتىڭ وزگەرۋىمەن كۇرەس, ەكونوميكالىق ىنتىماقتاستىق, مادەني-گۋمانيتارلىق بايلانىستاردى نىعايتۋ سياقتى باعىتتاردا سەرىكتەستىكتى تەرەڭدەتۋگە گەرمانيا تاراپىنان قىزىعۋشىلىق بار ەكەنىن ءبىلدىردى.
تاراپتار اۋىل شارۋاشىلىعى, لوگيستيكا, ونەركاسىپ جانە جاڭا تەحنولوگيالار سالالارىندا ىنتىماقتاستىقتى نىعايتۋ مۇمكىندىكتەرىن دە تالقىلادى.
دەپۋتاتتار جاڭا جوبالاردى زاڭنامالىق تۇرعىدان قولداۋعا دايىن ەكەندىكتەرىن ايتتى.
كەزدەسۋ بارىسىندا پارلامەنتارالىق وداق, ەقىۇ جانە ەۋروپا كەڭەسى پارلامەنتتىك اسسامبلەيالارى سياقتى حالىقارالىق پارلامەنتتىك ۇيىمدار اياسىنداعى ءوزارا ءىس-ارەكەت ماسەلەلەرى دە قوزعالدى.
