ايتىسقا جينالعان جۇرت ورتالىق فويەسىندەگى ءوڭىردىڭ ونەر مەن مادەنيەت سالاسىنداعى جەتىستىگىنە ارنالعان كورمەمەن تانىستى. كورمە تورىنە «التىن دومبىرا» سايىسىندا ءۇش مارتە وزىق شىققان سىر جۇيرىگى مۇحتار نيازوۆ پەن بىلتىرعى سايىستا جەرلەستەرىن قۋانتقان مەيىربەك سۇلتانحاننىڭ, جىل باسىندا جاس اقىندار اراسىنداعى «كۇمىس دومبىرا» ايتىسىندا ۇزدىك دەپ تانىلعان بەكسۇلتان ورىنباساردىڭ تابىسى – قوس التىن, ءبىر كۇمىس دومبىرا قويىلدى. مىڭ ورىندىق زالعا سىيماي, ءسوز دوداسىن تۇرەگەپ تۇرىپ تاماشالاعاندار كوپ بولدى.
مەملەكەت جانە قوعام قايراتكەرى ساۋىتبەك ابدراحمانوۆ توراعالىق ەتكەن قازىلار القاسىنىڭ قۇرامىندا قازاقستاننىڭ ەڭبەك ەرى, قازاقستاننىڭ حالىق ءارتىسى ءاسانالى ءاشىموۆ, قازاقستاننىڭ ەڭبەك سىڭىرگەن قايراتكەرى ءجۇرسىن ەرمان, مەملەكەتتىك سىيلىقتىڭ لاۋرەاتى, اقىن عالىم جايلىباي, مادەنيەت سالاسىنىڭ ۇزدىگى, اقمولا وبلىستىق تاريحي-ولكەتانۋ مۋزەيىنىڭ ديرەكتورى قۇدايبەرلى مىرزابەك, قازاقستاننىڭ ەڭبەك سىڭىرگەن قايراتكەرى الماس الماتوۆ, سونداي-اق ايتىسكەر اقىن, فيلولوگيا عىلىمدارىنىڭ كانديداتى, قازاقستاننىڭ ەڭبەك سىڭىرگەن قايراتكەرى مەلس قوسىمباەۆ بولدى. پارلامەنت ءماجىلىسىنىڭ دەپۋتاتى, قازاقستاننىڭ ەڭبەك سىڭىرگەن قايراتكەرى امانجول ءالتاي جۇرگىزگەن ءسوز دوداسىندا وبلىس اكىمى نۇرلىبەك نالىباەۆ قىزىلوردانىڭ ەل بايتاعى اتانعان كەزەڭىنىڭ 100 جىلدىعى اسىل مۇرامىز ايتىسپەن باستالىپ جاتقانىن جاقسى ىرىمعا بالايتىنىن ايتتى.
«مەملەكەت باسشىسى بۋرابايدا وتكەن ۇلتتىق قۇرىلتايدا كەلەسى, V وتىرىستى سىر بويىندا, كەزىندە قازاق ەلىنىڭ استاناسى بولعان قىزىلوردا قالاسىندا وتكىزۋدى ۇسىندى. القالى جيىندا قابىلدانعان بۇل تاريحي شەشىم ايماق جۇرتشىلىعىنىڭ مەرەيىن اسقاقتاتتى. بۇل – ءبىز ءۇشىن زور مارتەبە, پرەزيدەنتىمىزدىڭ وڭىرىمىزدە اتقارىلعان جۇمىسقا بەرگەن وڭ باعاسى دەپ بىلەمىز. قازاقىلىقتىڭ قايماعى بۇزىلماعان, بىرلىك پەن ۇلت تۇتاستىعىنىڭ التىن دىڭگەگىنە اينالعان قاسيەتتى سىر وڭىرىنە كەلگەن قادامدارىڭىز قۇتتى بولعاي!», دەدى وبلىس باسشىسى.
ەلدىڭ ءار وڭىرىنەن جينالعان 12 اقىن باق سىناسقان ايتىستا ءار جۇپقا تاقىرىپ بەرىلىپ, ەل الدىنا ءبىرىنشى مەيىربەك سۇلتانحان مەن شىعىستىڭ شاڭ جۇقتىرماس جۇيرىگى رۇستەم قايىرتاي شىقتى. ءسوزىن زامانىندا بار قازاققا قادىرى بولەك قۇنانبايدىڭ سىرعا ساپار شەككەنىنەن باستاعان مەيىربەك ەجەلگى ىزبەن كەلىپ وتىرعان قارسىلاسىنا ساتتىلىك تىلەدى. «ساعان دا بوتەن ەمەس سىردىڭ ەلى, سويلەي بەر ساحنادا سارساڭ بولماي» دەگەن مەيىربەككە رۇستەم تۇيدەكتەتە جاۋاپ بەردى.
كەلەسى جۇپ – جانسايا مۋسينا مەن ماقسات احانوۆقا بەرىلگەن تاقىرىپ ءشامشى قالداقوۆتىڭ 95 جىلدىعى بولدى. تاقىرىپتى ادەمى ازىلمەن ادىپتەي تاراتقان ەجەلگى قارسىلاستاردىڭ ونەرى كوپتى ءتانتى قىلدى. ايتىستى ء«ۇش ءداۋىردىڭ استاناسى – سىر ەلى, مۇندا ادام باقىتتى ءومىر سۇرەدى» دەپ اياقتاعان جانسايا مەن ماقساتتىڭ ونەرى تەڭ باعالاندى. اقتوبەدەن كەلگەن نۇربول جاۋىنباەۆ پەن شىمكەنتتىك نۇرماحان جاقىپبەكتىڭ ءسوز سايىسى دا زالداعى جۇرتتى ءبىر سەرپىلتىپ تاستادى.
سىر ەلىنىڭ ماقتانىشى مۇحتار نيازوۆ پەن ايتىس ساحناسىنا ۇزاق ۇزىلىستەن كەيىن قايتا ورالعان سارا توقتامىسوۆانىڭ, بەكارىس شويبەكوۆ پەن ديدار قاميەۆتىڭ, اسپانبەك شۇعاتاي پەن ونەردەگى جولىن جاڭا باستاعان زليقا ناۋرىزالينا اراسىنداعى ءسوز سايىسىن تاپجىلماي تاماشالاعان جۇرت ءداستۇرلى ونەرگە قاپىسىز قۇرمەت تانىتتى.
تاڭناڭ كەشكە دەيىن جالعاسقان الامان ايتىستىڭ باس جۇلدەسى سارا توقتامىسوۆاعا بۇيىردى. ءى ورىن مەيىربەك سۇلتانحانعا, II ورىن مۇحتار نيازوۆقا, ال III ورىن رۇستەم قايىرتاي مەن ماقسات احانوۆقا بەرىلدى. جانسايا مۋسينا مەن بەكارىس شويبەكوۆ ارنايى جۇلدەمەن ماراپاتتالسا, ديدار قاميەۆكە, اسپانبەك شۇعاتايعا, زليقا ناۋرىزاليناعا, نۇربول جاۋىنباەۆ پەن نۇرماحان جاقىپبەككە 500 مىڭ تەڭگەدەن سىياقى تابىستالدى.
قىزىلوردا
