كەزدەسۋ بارىسىندا ايدا بالاەۆا قازاقستان مادەني-گۋمانيتارلىق سالادا, ونىڭ ىشىندە ونەر, كينو جانە تەاتر, مەديا-رەسۋرستاردى دامىتۋ باعىتىندا ىنتىماقتاستىقتى نىعايتۋعا مۇددەلى ەكەنىن اتاپ ءوتتى. سونىمەن قاتار مينيستر اتالعان باعىتتار بويىنشا جەتكەن جەتىستىكتەر جايلى ءسوز قوزعاپ, سونىڭ ناتيجەسىندە قازاقستان مەن قىتاي اراسىنداعى ارىپتەستىك پەن ءوزارا تۇسىنىستىك جاڭا دەڭگەيگە كوتەرىلگەنىن دە تىلگە تيەك ەتتى.
ماسەلەن, 2024 جىلى قحر توراعاسى سي ءتسزينپيننىڭ قازاقستانعا مەملەكەتتىك ساپارى اياسىندا ەلدەر اراسىندا راديو مەن تەلەۆيزيا سالاسىنداعى ىنتىماقتاستىق تۋرالى مەموراندۋمعا قول قويىلدى.
سونداي-اق قىركۇيەك ايىندا تيانتسزين قالاسىنىڭ مۋزەيىندە قازاقستان رەسپۋبليكاسىنىڭ ۇلتتىق مۋزەيى مەن قىتايدىڭ مادەني جادىگەرلەر ورتالىعى بىرلەسىپ ۇيىمداستىرعان «التىن ادام جانە ۇلى دالا» اتتى حالىقارالىق كورمەنىڭ سالتاناتتى اشىلۋى ءوتتى.
كاسىبي ونەر ۇيىمدارىن بىرىكتىرۋ باستاماسى اياسىندا ءابىلحان قاستەەۆ اتىنداعى قر مەملەكەتتىك ونەر مۋزەيى جىبەك جولى مۋزەيلەرى مەن گالەرەيالارى حالىقارالىق اليانسىنا مۇشە بولدى. 5 ماۋسىم كۇنى مۋزەيدە قىتاي ۇلتتىق كوركەمونەر جاۋھارلارى ۇسىنىلاتىن «قىتاي ونەرىنىڭ وي-ماقساتتارى» كورمەسى وتەدى. كورمەگە كەسكىندەمە, گرافيكا جانە ءمۇسىن جانرىنداعى 50-گە جۋىق تۋىندى كورەرمەن نازارىنا ۇسىنىلادى.
سونىمەن قاتار, 2025 جىلعى 30 مامىردا «استانا وپەرا» تەاترىندا قىتايدىڭ كورنەكتى كومپوزيتورى ءارى سكريپكاشىسى سيان سينحايدىڭ 120 جىلدىعىنا ارنالعان كونتسەرت ۇيىمداستىرىلادى.
ال ماۋسىم ايىنىڭ ورتاسىندا قر ۇلتتىق مۋزەيىندە قىتاي جىبەك ۇلتتىق مۋزەيىنىڭ قولداۋىمەن «جىبەك جانە جىبەك جولى: قىتايدان قازاقستانعا» اتتى حالىقارالىق كورمە وتەدى. كورمەدە ماتالار كورسەتىلىپ, شاي داستۇرلەرى كوپشىلىك نازارىنا ۇسىنىلادى.
ءمينيستردىڭ ايتۋىنشا, مەملەكەتارالىق ىنتىماقتاستىقتىڭ باسىم جوبالارىنىڭ ءبىرى – مادەني ورتالىقتار قۇرۋ. بۇل مادەني بايلانىستاردى نىعايتىپ, تاجىريبە الماسۋعا جانە دوستىق قارىم-قاتىناستى دامىتۋعا جول اشادى.
قحر-دىڭ توتەنشە جانە وكىلەتتى ەلشىسى حان چۋنلين مىرزا دا ىنتىماقتاستىقتى نىعايتۋ قاجەتتىگىن ءسوز ەتتى. اتاپ ايتقاندا, قىتاي اقپاراتتىق ساياسات, اۋدارما ءىسى جانە باسپا سالالارىن دامىتۋعا قىزىعۋشىلىق تانىتىپ وتىر. سونىمەن قاتار, چۋنلين مىرزا قازاقستاندىق ارتىستەردى قىتايدا وتەتىن فەستيۆالدەرگە ءجيى قاتىسۋعا شاقىردى.
وتىرىس بارىسىندا قاتىسۋشىلار اقپارات سالاسىنداعى ءىس-شارالار جوسپارىن دا تالقىلادى. ناقتىراق ايتقاندا, باق ىنتىماقتاستىق فورۋمى, سي تسزينپين كىتابىنىڭ تۇساۋكەسەرى, سونداي-اق «قىتاي – ورتالىق ازيا» اقپارات اگەنتتىكتەرىنىڭ فورۋمى جايىندا ءسوز بولدى.
كەزدەسۋ سوڭىندا ايدا بالاەۆا قازاقستان تاراپى ىنتىماقتاستىققا ءاردايىم اشىق ەكەنىن ايتىپ, دوستىقتى نىعايتۋ مەن قارىم-قاتىناستى دامىتۋعا باعىتتالعان ەكى ەل اراسىنداعى بىرلەسكەن جوبالارعا قولداۋ جالعاساتىنىن تىلگە تيەك ەتتى.
