وقىس وقيعانىڭ الدىن الۋ ءۇشىن مەگاپوليستە ەرەكشە اكتسيا ءوتىپ جاتىر. قالالىق جاستار ورتالىعىنىڭ ماماندارى توتەنشە جاعدايلار قىزمەتىنىڭ وكىلدەرىمەن بىرلەسىپ سۋ ايدىندارىندا قاۋىپسىزدىك ەرەجەلەرىن ساقتاۋ كەرەكتىگىن حالىققا ءتۇسىندىرىپ ءجۇر.
ناسيحات توبى وزەن-كول توعاندارعا بارىپ, سول جەردە شومىلىپ جاتقان بالالار, جاسوسپىرىمدەر مەن ۇلكەن جاستاعى ازاماتتارعا ۇنپاراقتار تاراتىپ, ساقتىق شارالارىن ەستەرىنە سالدى. ودان بولەك سۋ ايدىندارىنىڭ جاعاسىنا ەسكەرتۋ تاقتايشالارىن ورناتتى.
توتەنشە جاعدايلار قىزمەتى ماماندارىنىڭ ايتۋىنشا جاز شىعا ادامداردىڭ سۋعا باتىپ كەتۋ قاۋپى كۇشەيەدى. سونىمەن بىرگە ءورت, گازدان ۋلانۋ وقيعالارى دا ءجيى كەزدەسىپ تۇرادى. سوندىقتان توتەنشە قىزمەتىنىڭ وكىلدەرى قالا تۇرعىندارىن بارىنشا ساق بولىپ, قاۋىپسىزدىك ەرەجەلەرىن ساقتاۋعا شاقىرادى. وسى قىزمەت دەپارتامەنتىنىڭ ماماندارى مەكتەپتەردە كەزدەسۋ وتكىزىپ, وقۋشىلار مەن ۇستازدارعا توتەنشە وقيعا ورىن العان جاعدايدا ادامنىڭ جاسايتىن ءىس-ارەكەتى تۋرالى ايتىپ تۇسىندىرگەن.
تابيعي سۋ كوزدەرىنەن شىمكەنتتە شومىلۋعا بولاتىن 5 سۋ ايدىنى بەلگىلەنگەن. بىراق سولاردىڭ ىشىندە تەك ۇشەۋىنە عانا شومىلۋعا رۇقسات بەرىلگەن. قالادا ودان باسقا جيىرما شاقتى اكۆوپارك پەن باسسەيندەر جاز بويى قىزمەت كورسەتەدى.
وسى جاز ماۋسىمىندا رەيدتىك ءىس-شارادان بولەك بالالارعا قالاي ءجۇزۋ كەرەكتىگى ۇيرەتىلەتىن بولادى. ەگەر بالا رۇقساتسىز جەردە شومىلعان بولسا ونىڭ اتا-اناسىنا اكىمشىلىك جاۋاپكەرشىلىك بويىنشا جازا قولدانىلماق. ال جازاتايىم وقيعالاردىڭ الدىن الۋ ءۇشىن توتەنشە جاعداي قىزمەتىنىڭ ماماندارىنا ەرىكتىلەر كومەككە كەلەدى.
شىمكەنت
