ءىس-شارا بارىسىندا قر توتەنشە جاعدايلار مينيسترلىگىنىڭ ازاماتتىق قورعانىس جانە اسكەري بولىمدەر كوميتەتى توراعاسىنىڭ ورىنباسارى اقىلبەك احمەتجانوۆ مالىمدەمە جاسادى.
قازاقستاندا شومىلۋ ماۋسىمى 1 ماۋسىمدا رەسمي تۇردە باستالادى. قازىرگى تاڭدا رەسپۋبليكا بويىنشا 698 شومىلۋعا رۇقسات ەتىلگەن ورىن بار: ولاردىڭ 458-ءى – جەكە مەنشىك جاعاجايلار, 227-ءسى – كوممۋنالدىق, ال 13-ءى – تۋريزم مەن سپورت نىساندارىنا تيەسىلى. سونىمەن قاتار, تاعى 84 قاۋىپسىز سۋعا ءتۇسۋ ايماعىن ۇيىمداستىرۋ جۇمىستارى جۇرگىزىلۋدە. بارلىق اقپاراتتار «2گاج» قوسىمشاسى ارقىلى قولجەتىمدى.
توتەنشە جاعدايلار مينيسترلىگى ورتالىق مەملەكەتتىك ورگاندار جانە جەرگىلىكتى اكىمدىكتەرمەن بىرلەسىپ, شومىلۋ ماۋسىمىنا الدىن الا دايىندىق جۇمىستارىن جۇرگىزۋدە. بۇل كەشەندى شارالار سۋ ايدىندارىندا ازاماتتاردىڭ قاۋىپسىزدىگىن قامتاماسىز ەتۋگە باعىتتالعان.
«جۇرگىزىلگەن الدىن الۋ شارالارى ناتيجەسىندە 2021–2024 جىلدار ارالىعىندا سۋعا باتىپ قايتىس بولعاندار سانى 51%-عا تومەندەدى. تەك وتكەن ماۋسىمدا ەلىمىزدىڭ سۋ ايدىندارىنان 258 ادام, ونىڭ ىشىندە 66 بالا قۇتقارىلدى», دەدى اقىلبەك احمەتجانوۆ.
الايدا, بارلىق الدىن الۋ شارالارىنا قاراماستان, سوڭعى ءتورت جىلدا ەلىمىزدە 843 ادام, ونىڭ ىشىندە 260 بالا سۋعا كەتىپ, قايتىس بولعان.
جىل باسىنان بەرى 11 562 بالاعا ءجۇزۋ ماشىقتارى ۇيرەتىلدى. بۇل باعدارلاما ءارى قاراي جالعاساتىن بولادى.
پروفيلاكتيكالىق شارالار اياسىندا 191 مىڭنان استام كورنەكى ماتەريال (پاراقشالار, جادىنامالار, بروشيۋرالار) تاراتىلىپ, سۋ ايدىندارىنا 181 قاۋىپسىزدىك بەلگىلەرى ورناتىلدى. سونىمەن قاتار, اكىمدىكتەر بالالارعا ارنالعان قاۋىپسىز جاعاجايلار ۇيىمداستىرۋدا. مۇنداي ورىنداردا قۇتقارۋشىلار بالالارعا ءجۇزۋدى ۇيرەتەدى.
سۋ ايدىندارىنداعى قاۋىپسىزدىكتى باقىلاۋ ءۇشىن تجم ىشكى ىستەر جانە كولىك مينيسترلىكتەرىمەن بىرلەسە وتىرىپ, 20 مىڭنان استام رەيد جانە پاترۋل جۇمىستارىن جۇرگىزدى. ناتيجەسىندە 761 قۇقىق بۇزۋشى انىقتالىپ, قر اكىمشىلىك قۇقىق بۇزۋشىلىق تۋرالى كودەكستىڭ 364 جانە 412-باپتارى بويىنشا جاۋاپقا تارتىلدى.
قازىرگى ۋاقىتتا قۇتقارۋ بولىمشەلەرى ەڭ بەلسەندى پايدالانىلاتىن 70 سۋ ايدىنى ۋچاسكەسىندە جۇمىس ىستەپ جاتىر. بۇل جەرلەردە كاسىبي قۇتقارۋشىلار كەزەكشىلىك اتقارۋدا.
سونىمەن قاتار, جاعاجاي يەلەرى مەن جەرگىلىكتى اكىمدىكتەر مينيسترلىكپەن بىرلەسە وتىرىپ, جەدەل-قۇتقارۋ بولىمشەلەرىندە ارنايى دايىندىقتان وتكەن 100-دەن استام قوعامدىق قۇتقارۋشىنى دايىندادى.
قر تجم بارشا ازاماتتاردى سۋداعى قاۋىپسىزدىك ەرەجەلەرىن قاتاڭ ساقتاۋعا شاقىرادى.
