بۇگىنگى تاڭدا ەسكەن سەرگەباەۆتىڭ قولىنان شىققان مۇسىندەر ەل كولەمىندەگى ماڭىزدى ەسكەرتكىشتەرگە اينالعان. اتاپ ايتقاندا, ءابۋ ناسىر ءال-فارابي, اباي تۇلعاسى مەن اۋەزوۆ بەينەسى, جامبىل اۋدانىنداعى ن.تىلەنديەۆ, اقتوبەدەگى ءابىلحايىر حان, پاۆلودارداعى س.تورايعىروۆ, «دوس-مۇقاسان» انسامبلىنە ارنالعان ەسكەرتكىشتەرى مەن تاريحي جانرلىق ۇلگىمەن جاسالعان ابىلاي حان, قازاقستاننىڭ حالىق ءارتىسى, رەجيسسەرى ا.توقپانوۆ, حالىق ءارتىسى ق.قۋانىشباەۆ, كومپوزيتور ءا.بەيسەۋوۆ مۇسىندەرىنىڭ اۆتورى. سونىمەن قاتار, ءى.جانسۇگىروۆ, ك.ازىرباەۆ, د.قوناەۆ ەسكەرتكىش بيۋستتەرىمەن قاتار, ونەر اكادەمياسى الانىنداعى ت. جۇرگەنوۆ ءبيۋستى دە ە.سەرگەباەۆقا تيەسىلى. بۇلار ءمۇسىنشىنىڭ قولتاڭبالىق ەرەكشەلىكتەرى مەن كوركەمدىك تۇجىرىمىن تانىتاتىن ەرەكشە تۋىندىلار.
اكادەميانىڭ گالەرەياسىندا اشىلعان كورمەگە ەسكەن سەرگەباەۆتىڭ ءار جىلدارداعى شاكىرتتەرى, بۇگىنگى تاڭدا تانىمال بولعان وتاندىق سۋرەتشىلەر مەن مۇسىنشىلەر باۋىرجان ءبايدىلدا, بولات تۇرعىنباي, ەدۋارد كازاريان, نۇرعالىم يساباەۆ, تالعات سەرىكباەۆ, قازىبەك دۋلاتوۆ, داۋرەن مۇحامەدجانوۆ, اقىلبەك ورمانبەكوۆ, سابىر قونارباەۆ, تالعات جۇماعۇلوۆ, تيمۋر ەرمۇحامەتوۆ, ايدوس بۇركىتباەۆ, گاۋحار قاسەنباي, دانيار سارباسوۆ, تۇرسىن قاپاقوۆ, باحتيار قايرانباەۆ جانە تاعى باسقا اۆتورلاردىڭ شىعارماشىلىق جۇمىستارى قويىلدى.
«ە. سەرگەباەۆ – حح عاسىردىڭ ەكىنشى جارتىسىنان باستاپ ەلىمىزدەگى كاسىبي ءمۇسىن ونەرىنىڭ باعىت-باعدارىن ايقىنداعان, وزىندىك اۆتورلىق قولتاڭباسى قالىپتاسقان سۋرەتشى. ونىڭ شىعارمالارىنىڭ تاقىرىپتىق اۋقىمى كەڭ: تاريحي تۇلعالار مەن حالىق قاھارماندارىنىڭ بەينەسىنەن باستاپ, زاماناۋي وبرازدار مەن سيمۆوليكالىق شەشىمدەرگە تولى باعىتتا ىزدەنىس جاساعان. اۆتوردىڭ ەڭبەكتەرىندە مونۋمەنتالدى تۇتاستىق, پلاستيكالىق ناقتىلىق پەن تەرەڭ فيلوسوفيالىق ءمان ۇندەسىپ جاتادى. ول ۇلتتىق رۋحتى, تاريحي جادىنى, ادام بولمىسىنىڭ ىشكى ءمانىن كوركەم تىلمەن بەينەلەگەن سۋرەتكەر رەتىندە تانىمال. ونىڭ ءاربىر تۋىندىسى ءوز ءداۋىرىنىڭ كوركەم شەجىرەسى ىسپەتتەس»,- دەيدى ونەرتانۋشى-ۇستاز ءلايلا كەنجەباەۆا.
اكادەميكتىڭ شاكىرتتەرى مەن ارىپتەستەرى ۇيىمداستىرعان مادەني ءارى عىلىمي ماڭىزى زور ءىس-شاراعا قاتىسقان زيالى قاۋىم, ۇلتتىق بەينەلەۋ ونەرىنىڭ وتكەنى مەن بۇگىنىنە قاتىستى وزەكتى ماسەلەلەردى سارالادى.
