فوتو: gov.kz
وساكاروۆ كەنتىندە «گيپەربورەيا» جشس قۇنى 42,6 ميلليارد تەڭگە تۇراتىن جەل ەلەكتر ستانتسياسىن ورناتىپ جاتىر. اۋداندا جالپى قۇنى 301 ميلليارد تەڭگە تۇراتىن ءۇش ينۆەستيتسيالىق جوبانى جۇزەگە اسىرۋ جوسپارلانعان. ولار: «گيپەربورەيا» جشس سالاتىن, قۋاتتىلىعى 150 مۆت جەل ەلەكتر ستانتسياسى, قىتاي مەن قازاقستاننىڭ بىرىككەن «التىن القاپ كرگ» جشس سالاتىن كىرپىش زاۋىتى جانە قىتاي مەن قازاقستاننىڭ بىرىككەن «North wind park» جشس سالاتىن, قۋاتتىلىعى 500 مۆت جەل پاركى. ءىرى ينۆەستيتسيالىق جوبانى جۇزەگە اسىرۋ ءۇشىن جەر تەلىمى بەرىلدى.
قۋاتى 150 مۆت قۇرايتىن جاڭا جەل ەلەكتر ستانتسياسىنىڭ قۇرىلىسى ءجۇرىپ جاتىر. جاڭا ستانتسيا ءاربىر نومينال قۋاتى 7,7 مۆت بولاتىن 21 جەل ەنەرگەتيكالىق قوندىرعىسىنان تۇرادى. بۇدان بولەك, وعان قوسالقى ستانتسيا, سوعان سايكەس ينفراقۇرىلىم سالىنىپ, سونداي-اق ەلەكتر جەتكىزۋ جەلىلەرى تارتىلىپ جاتىر. ستانتسيانىڭ قۇرىلىسىنا الەمدىك جەل تۋربينالارىن ءوندىرۋشى جەتەكشى كومپانيالاردىڭ ءبىرى – گەرمانيالىق «Siemens AG» كومپانياسىنىڭ ەلەكتر جابدىعى پايدالانىلدى.
جاڭا جەس وندىرىستىك سيپاتتامالارىنان بولەك, جوبا ءوزىنىڭ ەكولوگيالىق قۇرىلىمى تۇرعىسىنان ءوڭىر ءۇشىن ماڭىزدى. ەلەكتر ستانتسياسىن سالۋ جانە ونى ىسكە قوسۋ گاز بەن كومىر شىعارىندىلارىن ازايتۋعا مۇمكىندىك بەرەدى.
مۇنىمەن قوسا, قىتاي ءوندىرىسىنىڭ ەلەكترلى تۋربينالارى قۇرىلىس كادەسىنە قولدانىلىپ جاتىر. ستانتسيا باسشىلىعىنىڭ ايتۋىنشا, جەل مەن كۇننەن ەنەرگيا كوزىن الۋدان قىتاي كوش باستاپ تۇرعان كورىنەدى. سول سەبەپتى, قىتايلىق ارىپتەستەرىمەن بايلانىس ورناتىپ, سولار ۇسىنعان جابدىقتاردى قولدانىپ وتىرعان كورىنەدى. سايكەسىنشە, ساپاسى وزىق ونەركاسىپ ورنىنىڭ كەپىلدىگىن الىپتى. ال, نەمىس فيرماسىنىڭ جابدىعى جيىرما جىل ۇزدىكسىز قىزمەت كورسەتىپ بەرەتىندەرىنە سەنىمدى.
«جاسىل ەنەرگەتيكا كومىر وتىنىنسىز, گازسىز ءارى قاۋىپسىز توق كوزى. ءبىز جالپى ستانتسيانىڭ قۇرىلىسىن قىس تۇسكەنشە اقتايمىز دەپ وتىرمىز. نەگىزگى مەرزىمىمىز كەلەسى جىلدىڭ كوكتەمىنە دەيىن. قازىردىڭ وزىندە 7 جەل ەنەرگەتيكالىق قوندىرعىسىن ورناتتىق. جالپى قويىلاتىن قوندىرعى سانى – 21-ءدى قۇرايدى. ايتا كەتكەنىمىز ابزال, بۇل الاڭ ەۋروپاداعى تەڭدەسسىز جەل ستانتسياسىنا اينالادى. ويتكەنى, يننوۆاتسيالىق ەڭ وزىق جابدىقتاردى پايدالانىپ جاتىرمىز. جۇيە تولىق اۆتوماتتاندىرىلادى. جەلگە كومپيۋتەردەگى وپەراتور مونيتورينگ جۇرگىزەدى. قازىر 150 ادامعا جۇمىس بەرىپ وتىرمىز», – دەيدى«گيپەربورەيا» جشس تەحنيكا جونىندەگى ديرەكتورى دميتري سيلانتەۆ.
ەلەكتر نىسانى ىسكە قوسىلعان سوڭ 20 جاڭا جۇمىس ورنى قۇرىلادى. وسى سەكىلدى تەمىرتاۋدا 500 مۆت جانە قارقارالى اۋدانىندا 200 مۆت جەل ەلەكتر ستانتسياسىن سالۋ جوسپارلانعان. جوبالار پىسىقتالىپ جاتىر.
قىسقاسى, جەل ەنەرگياسى ەڭ سەرپىندى دامىپ كەلە جاتقان جاڭارتىلاتىن ەنەرگيا كوزدەرىنىڭ ءبىرى. جالپى, ەل اۋماعىندا جەل رەسۋرستارى كەڭ تارالعان. سوندىقتان جەل ەنەرگياسىن پايدالانۋ كومىر جانە گاز ەلەكتر ستانتسيالارى وندىرەتىن ەلەكتر ەنەرگياسىن تاسىمالداۋ قۇنىمەن سالىستىرعاندا ەكونوميكالىق تۇرعىدان ءتيىمدى ەكەنىن ايتادى ەنەرگەتيكا ماماندارى.
قاراعاندى وبلىسى
