بەسىنشى رەت ءوتىپ وتىرعان جارىس سوڭعى ەكى جىلدا حالىقارالىق مارتەبەگە يە بولدى. بيىلعى ءدۇبىرلى بايگەگە رەسپۋبليكامىزدىڭ 13 وڭىرىنەن, الەمنىڭ 6 مەملەكەتىنەن, اتاپ ايتساق, ماجارستان, يران, قىرعىزستان, رەسەي, وڭتۇستىك افريكا رەسپۋبليكاسىنان كەلگەن شاباندوزداردى قوسا العاندا, بارلىعى 19 كوماندا قاتىستى. جارىس حالىقارالىق دەڭگەيگە كوتەرىلۋىمەن الەم جۇرتشىلىعىنىڭ ات سپورتىنا قىزىعۋشىلىعى ارتىپ كەلە جاتقانىن اڭعارتادى. جارىس جولىنا شىققان 19 كوماندانىڭ التاۋى عانا مارە سىزىعىنا جەتە الدى.
مارافون-بايگەگە قاتىسۋشى كوماندالار سوڭعى كۇنى الماتى وبلىسى, ىلە اۋدانى, اقشي اۋىلىنىڭ ماڭىنان جورىقتى جالعاپ, قوناەۆ قالاسىندا اياقتادى. حالقىمىزدىڭ نازارىن ايرىقشا اۋدارعان الامان قوناەۆ قالاسىنداعى بەردىبەك سوقپاقباەۆ اتىنداعى ساياباقتا قورىتىندىلانىپ, جەڭىمپازدار قالا تۇرعىندارى مەن اتسۇيەر قاۋىمنىڭ زور قوشەمەتىنە بولەندى.
ساياباقتا وتكەن سالتاناتتى ءىس-شاراعا پرەمەر-ءمينيستردىڭ كەڭەسشىسى ەرالى توعجانوۆ, «Amanat» پارتياسىنىڭ اتقارۋشى حاتشىسى داۋلەت كارىبەك, قاراعاندى وبلىسى اكىمىنىڭ ورىنباسارى, «Joryq» ات سپورتى فەدەراتسياسى قامقورشىلىق كەڭەسىنىڭ توراعاسى الىبەك الدەنەي, ۇلتتىق سپورت قاۋىمداستىعىنىڭ پرەزيدەنتى ەركەبۇلان ءىلياسوۆ, «Joryq» فەدەراتسياسىنىڭ پرەزيدەنتى باقىتجان تۇرلىبەكوۆ قاتىسىپ, بايراقتى باسەكەدە باعى جانىپ, جەڭىمپاز اتانعان قايسار جىگىتتەردى جەڭىستەرىمەن قۇتتىقتادى.
«مەملەكەت باسشىسىنىڭ قولداۋىمەن جۇزەگە اسىپ وتىرعان جوبا – سپورتتىق شارا عانا ەمەس, ەل مەن جەردى دارىپتەيتىن ۇلاعاتتى ءىس. وسىنداي جورىقتاردىڭ ارقاسىندا ۇلى دالاعا يەلىك ەتىپ وتىرمىز. باتىر بابالارىمىز 500 شاقىرىم ەمەس, 3 مىڭ شاقىرىمعا دەيىن جورتىپ ءجۇرىپ, ۇرپاعىنا ۇلان-عايىر جەردى سىيعا قالدىردى. وعان تىكەلەي سەبەپ بولعان – قازاقتىڭ قازاناتى. سونىڭ ناتيجەسىندە تاۋەلسىز ەلىمىزدىڭ كوك تۋى كوكتە جەلبىرەپ تۇر. بۇگىنگى سىننان سۇرىنبەي وتكەن ازاماتتارعا العىسىمىز شەكسىز», – دەگەن ەرالى لۇقپان ۇلى مارافون-بايگەگە قولداۋ بىلدىرگەن ءوڭىر اكىمىنە, ۇيىمداستىرۋشىلارعا العىسىن ءبىلدىردى.
«Amanat» پارتياسىنىڭ اتقارۋشى حاتشىسى داۋلەت كارىبەك ۇلتتىق سپورت تۇرلەرىن دامىتۋ قازاقتىڭ سالت-ءداستۇرىن ساقتاۋ, مادەني مۇرانى ناسيحاتتاۋ عانا ەمەس, سونىمەن قاتار جاس ۇرپاقتى تاربيەلەۋدىڭ ماڭىزدى تەتىگى ەكەنىن اتاپ ءوتتى.
«مەملەكەت باسشىسى ق.توقاەۆ ۇلتتىق قۇرىلتايدىڭ IV وتىرىسىندا قازاقستان كوشپەلىلەر وركەنيەتىنىڭ بەسىگى, دامىعان ورتالىعى ەكەنىن, ءتۇرلى حالىقتار مەن مادەنيەتتەردى بىرىكتىرەتىنىن ايتتى. مۇنىڭ جارقىن مىسالى – ەلىمىزدە وتكەن V دۇنيەجۇزىلىك كوشپەلىلەر ويىندارى. «Amanat» پارتياسى بۇل باعىتتا اۋقىمدى جۇمىس اتقارىپ وتىر. پارتيا جىل سايىن حالىقارالىق « ۇلى دالا جورىعى» مارافون-بايگەسىن ۇيىمداستىرۋعا اتسالىسادى. ءبىز قوعامدى ۇلتتىق مادەني-تاريحي قۇندىلىقتار توڭىرەگىندە توپتاستىرۋعا ۇمتىلامىز. سونىمەن قاتار ەلىمىزدە ەتنوتۋريزمدى دامىتۋ اسا ماڭىزدى. پارتيانىڭ «ۇلتتىق مۇرا» جوباسى جاستاردى وتانشىلدىق رۋحتا تاربيەلەۋگە, ۇلتتىق سپورتتى, مادەنيەتىمىزدى, ونەرىمىز بەن سالت-ءداستۇرىمىزدى دارىپتەۋ ارقىلى قاستەرلى قۇندىلىقتارىمىزدى دامىتۋعا باعىتتالعان», دەدى د.كارىبەك.
الماتى وبلىسىنىڭ اكىمى مارات سۇلتانعازيەۆ تە مارافون-بايگەنىڭ ماڭىزدىلىعىن ايرىقشا اتادى.
« ۇلى دالا جورىعى» – ۇلت رۋحىن كوتەرەتىن, ەل مەن جەردىڭ باي مۇراسىن دارىپتەيتىن ماڭىزدى وقيعا. مارافون-بايگە جاي عانا جارىس ەمەس, قازاق حالقىنىڭ تەكتىلىگىن, شاباندوزدىق ونەرىن, جۇيرىك تۇلپارعا دەگەن سۇيىسپەنشىلىگىن كورسەتەتىن ۇلى ءداستۇر. جارىستا جىگەر مەن قايرات, ءتوزىم مەن شەبەرلىك سىنعا ءتۇستى. بۇگىنگى مارەگە جەتكەن ءاربىر قاتىسۋشى – جەڭىمپاز. 500 شاقىرىمدىق ساپاردى ارتقا تاستاپ, كوماندالار مارە سىزىعىن ابىرويمەن كەستى. اتالعان بايگە تاريح پەن تاعىلىمنىڭ, شىدام مەن شەبەرلىكتىڭ سىنعا تۇسكەن جورىعى بولدى», دەگەن ءوڭىر باسشىسى جەڭىمپازداردى ماراپاتتادى, جوبانىڭ ءساتتى وتۋىنە ۇلەس قوسقان بارلىق ۇيىمداستىرۋشىلارعا, قولداۋشىلارعا, شاباندوزدارعا زور العىسىن ءبىلدىردى.
كوپكۇندىك ساپار جولىندا شاباندوزدار قيىندىققا مويىماي, ۇلى دالانىڭ كەڭدىگىن جۇرەگىمەن سەزىندى. جورىق بارىسىندا كوماندالار الاتاۋدىڭ باۋرايىنداعى ىلە وزەنى, تاڭبالى تاس ءتارىزدى تاريحي ورىندار مەن ۇلتتىق قولونەر, اسىلتۇقىمدى جىلقىلار سىندى كوشپەلىلەر مادەنيەتىنىڭ ۇزدىك تۋىندىلارىمەن تانىستى. ياعني, بايگە حالقىمىزدىڭ سالت-ءداستۇرىن تانىتۋمەن قاتار, كورىكتى تابيعاتىمىز بەن ەتنوتۋريزمدى ناسيحاتتايتىن, ەل مەن ەلدى جاقىنداستىراتىن بىرەگەي الاڭعا اينالدى.
« ۇلى دالا جورىعى» مارافون-بايگەسىنە اتسالىسقان اتبەگىلەر مەن ۆەتەرينارلارعا, اسپازدار مەن سۋ تاسۋشى كولىك جۇرگىزۋشىلەرىنە, جانكۇيەرلەرىنە دەيىن تىك تۇرىپ قىزمەت ەتكەن ازاماتتاردىڭ اربىرىنە العىسىن بىلدىرگەن «Joryq» فەدەراتسياسىنىڭ پرەزيدەنتى باقىتجان جۇماعالي ۇلى بۇل جورىقتىڭ الداعى جىلدارى دا جالعاسىن تاۋىپ, ەل بىرلىگىن نىعايتۋعا, ۇلتتىق ات سپورتىن جاڭعىرتۋعا ارقاۋ بولا بەرۋىنە تىلەكتەستىگىن ءبىلدىردى.
بەس كۇنگە سوزىلعان مارافون-بايگەنىڭ قورىتىندىسى بويىنشا ءبىرىنشى ورىندى استانا قالاسىنىڭ كومانداسى يەلەندى. ولار 500 شاقىرىم قاشىقتىقتى 31 ساعات 19 مينۋت 5 سەكۋندتا ءجۇرىپ ءوتتى. ەكىنشى بولىپ مارە سىزىعىن 32 ساعات 26 مينۋت 57 سەكۋندتا قىرعىزستاننىڭ ء(بىرىنشى) كومانداسى كەسىپ ءوتتى. جۇلدەلى ءۇشىنشى ورىندى ۇلىتاۋ وبلىسىنىڭ كومانداسى يەلەندى. ولاردىڭ ۋاقىت كورسەتكىشى – 32 ساعات 37 مينۋت 47 سەكۋند. مارە سىزىعىن ماڭعىستاۋ وبلىسى ءتورتىنشى, الماتى وبلىسىنىڭ كومانداسى بەسىنشى بوپ كەستى.
«قازاقتىڭ قازاناتى – قوستاناي جىلقىسى ەڭ ۇزاق جارىسقا شىدامدىلىعىمەن, توزىمدىلىگىمەن ەرەكشەلەنەتىنىن دالەلدەدى. ءبىزدى قولداعان كوماندا, جاقتاستارعا, باۋىرلارعا العىسىمىز شەكسىز. جەڭىسكە جەتۋ جولىندا بار مۇمكىندىگىمىزدى جۇمىلدىردىق», دەيدى استانا كومانداسىنىڭ جەتەكشىسى التاي بيمەن.
قازاقستان مەن شەتەلدىڭ ەڭ ۇزدىك شاباندوزدارى باس قوسقان « ۇلى دالا جورىعى–2025» مارافونى ۇرپاقتار ساباقتاستىعىنىڭ, قايتپاس قايسار رۋحتىڭ, ۇلتتىق قۇندىلىقتارىمىزعا, دارا داستۇرىمىزگە دەگەن قۇرمەتتىڭ رامىزىنە اينالدى.
الماتى وبلىسى
