فوتو: جي
وسى ورايدا اقىلى اۆتوتۇراقتاردىڭ قىزمەتىن كۇندەلىكتى پايدالانىپ جۇرگەن جۇرگىزۋشىلەردىڭ پىكىرىن سۇراپ بىلدىك. ولاردىڭ ءبىر بولىگى جۇيەنىڭ كولىك اعىنىن رەتتەۋگە كومەگى تيەتىنىن ايتسا, ەكىنشى بولىگى قىزمەت ساپاسىنىڭ تومەندىگىنە شاعىمداندى.
ريزابەك ەسىمدى جۇرگىزۋشىنىڭ پىكىرىنشە اقىلى اۆتوتۇراق كولىك قوياتىن ورىندى ىزدەۋگە كەتەتىن ۋاقىتتى ۇنەمدەيدى.
« ساۋدا ورتالىقتارى مەن ىسكەرلىك ايماقتاردا ورىن تابۋ بۇرىن قيىن بولسا, قازىر تولەم جاساپ, تەز تۇراققا قويا الامىز. ينفلياتسيا كەزىندە 100 تەڭگە ۇلكەن سوما ەمەس. بۇل جۇيە كولىك قوزعالىسىن رەتتەۋگە كومەكتەسەدى», دەيدى ول.
تاعى ءبىر جۇرگىزۋشى ءوزىنىڭ ىسكەرلىك اۋداندار مەن ساۋدا ورتالىقتارىنا ءجيى باراتىنىن ايتىپ, اقىلى اۆتوتۇراقتار جۇيەسى قولدانىسقا ەنگىزىلگەلى ماسەلە شەشىمىن تابا باستاعانىن اتاپ ءوتتى.
«بۇل جەردە ماسەلە اقشادا ەمەس, جۇيەنىڭ ادىلەتتىلىگىندە. اقىلى اۆتوتۇراقتاردا بەينەباقىلاۋ كامەراسى مەن جەتكىلىكتى ورىن بولۋى ءتيىس. كەي اۋدانداردا اقشا تولەسەم دە ءبارىبىر كولىگىمدى قوياتىن ورىن تاپپادىم. بۇل دۇرىس ەمەس» دەيدى ەراسىل ەسىمدى تۇرعىن.
ال ەندى ءبىرى كەيبىر اقىلى تۇراقتاردا قاۋىپسىزدىككە اسا ءمان بەرىلمەيتىندىگىن ايتتى.
ء«بىر جولى كولىگىمدى تۇندە اقىلى تۇراقتا قالدىردىم. تاڭەرتەڭ كولىكتىڭ ايناسىن تاپپاي قالدىم. ەشكىم جاۋاپ بەرمەيدى. سوندا نە ءۇشىن اقشا تولەپ ءجۇرمىز؟ ەشقانداي كۇزەت, بەينەباقىلاۋ جوق. اقىلى تۇراق يەلەرى اقشا الىپ وتىرعاندىقتان كولىگىمىزدىڭ قاۋىپسىزدىگىن دە قامتاماسىز ەتۋى كەرەك», دەيدى ماناربەك ەسىمدى جۇرگىزۋشى.
بايقاعانىمىزداي جۇرگىزۋشىلەر مەن تۇرعىندار اراسىندا بۇل جۇيەگە دەگەن كوزقاراس ءارتۇرلى. ءبىرى اقىلى تۇراقتار ارقىلى قالا كوشەلەرىندە ءتارتىپ ورناعانىن ايتسا, ەندى ءبىرى جۇيەنىڭ ادىلەتسىزدىگىن, قىزمەت ساپاسىنىڭ تومەندىگىن جانە قولجەتىمدى تەگىن بالامانىڭ جوقتىعىن العا تارتادى. تولەم جاساۋ تەتىكتەرىنىڭ ىڭعايسىزدىعى, قاۋىپسىزدىك ماسەلەلەرى مەن اشىق اقپاراتتىڭ تاپشىلىعى دا تۇرعىندار تاراپىنان سىنعا ۇشىراپ وتىر.
قالا تۇرعىندارىنىڭ ەكىۇداي پىكىرىنە وراي ساۋالىمىزعا جاۋاپ الۋ ماقساتىمەن استانا اكىمدىگىنە حابارلاسقانىمىزدا اكىمدىك وكىلى قالاداعى اقىلى اۆتوتۇراق ستانتسيالارى كوممۋنالدىق مەنشىكتەگى باسقارۋعا وتكەلى جاتقانىن مالىمدەدى. قالانىڭ كولىك باسقارماسى 2024 جىلدىڭ جەلتوقسان ايىنان باستاپ جەكە كومپانيامەن اراداعى مەملەكەتتىك-جەكەشەلىك ارىپتەستىك كەلىسىمشارتىن قايتا قاراستىرىپ جاتقان كورىنەدى. 2025 جىلدىڭ 6 اقپانىندا قوسىمشا كەلىسىمگە قول قويىلعان. اكىمدىك وكىلى وسىنداي پروتسەستەردىڭ ءجۇرىپ جاتقانىنا بايلانىستى تولىق اقپاراتتى ازىرگە جاريالاي المايتىندارىن ايتتى.
