فوتو: وقۋ-اعارتۋ مينيسترلىگى
قازىرگى ۋاقىتتا 105 ءبىلىم بەرۋ نىسانىنىڭ قۇرىلىسى اياقتالعان. قالعان 112 مەكتەپ 2025 جىلدىڭ سوڭىنا دەيىن پايدالانۋعا بەرىلەدى.
بۇل مەكتەپتەردىڭ جارتىسىنا جۋىعى اۋىلدىق جەرلەردە سالىنىپ جاتىر. وسىلايشا, 200 مىڭنان استام اۋىل بالاسى زاماناۋي جايلى ءبىلىم بەرۋ ورتاسىمەن قامتىلادى.
«بۇل جوبا – ەلىمىزدە ورتا ءبىلىم ساپاسىن ارتتىرۋعا جانە قالا مەن اۋىل مەكتەپتەرى اراسىنداعى الشاقتىقتى جويۋعا باعىتتالعان ستراتەگيالىق باستاما. بۇل — جاي عانا مەكتەپ عيماراتتارى ەمەس, ۇلت بولاشاعى ءوسىپ شىعاتىن كيەلى ءبىلىم وردالارى. سوندىقتان ۇلتتىق جوبا اياسىندا قالىپتاساتىن ءبىلىم ۇيىمدارىن «كەلەشەك مەكتەپتەرى» دەپ اتاۋدى ۇسىنىپ وتىرمىز», دەدى عاني بەيسەمباەۆ ورتالىق كوممۋنيكاتسيا قىزمەتىنىڭ الاڭىندا وتكەن بريفينگتە.
بۇل مەكتەپتەدە وقۋشىلارعا قولايلى, ەرگونوميكالىق ءبىلىم بەرۋ كەڭىستىگى قامتىلادى. مەكتەپتەردىڭ كولەمى تيپتىك جوبالارعا قاراعاندا, 15-20%-عا ۇلكەن, ال تەحنيكالىق جاراقتانۋى 4 ەسەگە ارتىق. بارلىق مەكتەپ زاماناۋي جيھازبەن جانە قۇرال-جابدىقتارىمەن تولىقتاي قامتاماسىز ەتىلىپ, قاۋىپسىزدىك شارالارى كۇشەيتىلگەن. باستاۋىش جانە جوعارى سىنىپ وقۋشىلارى ءۇشىن بولەك بلوكتار قاراستىرىلعان.
ال مەكتەپ قۇرىلىسىنا قاجەتتى ماتەريالدار, مەكتەپ جيھازدارى تەك وتاندىق تاۋار وندىرۋشىلەردەن ساتىپ الىنىپ جاتىر.
