اتىراۋدا ۇلى جەڭىسكە ارنالعان رەسپۋبليكالىق ايتىس ءوتتى

اتىراۋ. 6 مامىر. اتىراۋدا «ۇرپاققا ۇران بولعان ۇلى جەڭىس» اتتى اقىنداردىڭ رەسپۋبليكالىق ايتىسى ءوتتى. وعان «نۇر وتان» پارتياسى قولداۋ كورسەتتى. باس جۇلدە – 2 000 000 تەڭگە جەڭىمپاز اتانعان بولاتبەك ورازباەۆقا بەرىلدى. بۇل تۋرالى egemen.kz ءتىلشىسى حابارلادى. ۇلتتىق ونەرگە ەلەڭدەمەيتىن قازاق بار ما؟! اسىرەسە, اتىراۋدا ايتىس وتەدى دەگەلى جۇرتشىلىقتان دەگبىر قالمادى. مۇنىڭ بىرنەشە سەبەبى بار. بىرىنشىدەن, بۇعان دەيىن مۇنايلى وڭىردە ءدال مۇنداي اۋقىمدى ايتىس وتپەپ ەدى. ەكىنشىدەن, ۇرپاقتان ۇرپاققا ميراس بولعان بۇل جىر بايگەسى ۇلى جەڭىستىڭ 70 جىلدىعىنا ارنالدى. ۇشىنشىدەن, وعان بىرنەشە جەرگىلىكتى ايتىسكەرلەر دە قاتىستى. تورتىنشىدەن, اتىراۋداعى ايتىسقا تەك ۇلتتىق ونەردىڭ حاس شەبەرلەرى, مەملەكەتتىك سىيلىقتىڭ ءۇش يەگەرى, حالىق ءارتىسى ءاسانالى ءاشىموۆ, ءانشى-كومپوزيتورلار التىنبەك قورازباەۆ پەن بەكبولات تىلەۋحان, اقىندار, جازۋشىلار وداعى توراعاسىنىڭ ورىنباسارى جاناربەك ءاشىمجان, ايتىسكەر مەلس قوسىمباەۆ جانە جازۋشىلار وداعى اتىراۋ فيليالىنىڭ توراعاسى قويشىعۇل جىلقىشيەۆ قازىلىق ەتتى. سونداي-اق, جىر بايگەسىنىڭ تىزگىنىن وسى ونەردىڭ ىستىق-سۋىعىنا ابدەن توزگەن ءجۇرسىن ەرمان ۇستادى. ايتقانداي, بۇل ايتىس الىستاعى قىتايدان كەلگەن قانداسىمىز زۋرا شايمۇراتقىزىنىڭ قاتىسۋىمەن دە ەرەكشەلەندى. «ۇرپاققا ۇران بولعان ۇلى جەڭىس» تاقىرىبىمەن وتكەن ايتىسقا «نۇر وتان» پارتياسى قولداۋ كورسەتتى. وعان ەلىمىزدىڭ ءار وڭىرىنەن 20-دان استام اقىن قاتىسىپ, ەكى كۇن بويى ماحامبەت اتىنداعى دراما تەاتردى جىر كەشىنە بولەدى. ءسوز ساپتاۋى, ماقامى, سۋىرىپسالمالىعى جونىنەن بىرىنەن ءبىرى وتكەن اقىنداردىڭ كەيبىرى ءبىرىنشى كۇنى جۇرتشىلىق ىقىلاسىنا بولەنگەنمەن, ەكىنشى كۇنى كىبىرتىكتەپ قالعاندارى دا كەزدەستى. دەگەنمەن, ايتىس اقىندارى تەك ءبىر تاقىرىپتى عانا جىرلاۋمەن شەكتەلمەيتىنى انىق. بۇل جولى ايتىسكەرلەر ەلدىك ماسەلەلەردى دە قاعىس قالدىرمادى. اۋىلداعى اعايىننىڭ الەۋمەتتىك ماسەلەسى, رۋحانيات پەن ەلدىك مۇراتتاردى استارلاپ جەتكىزگەن اقىنداردىڭ اراسىندا ۇتىمدى ازىلىمەن ەل-جۇرتتى قىران-توپان كۇلكىگە كەنەلتكەندەرى دە جوق ەمەس. اسىرەسە, ماقسات اقانوۆتىڭ قىزدارمەن ءازىلى, ەركەبۇلان قاينازاروۆتىڭ جاڭىلتپاشى, مەيىربەك سۇلتانحان مەن بولاتبەك ورازباەۆ, شالقارباي ءىزباساروۆ پەن باۋىرجان حاليوللانىڭ, سونىمەن بىرگە, بەكارىس شويبەكوۆتىڭ استارلى ويعا قۇرىلعان ءسوز ساپتاۋلارى تىڭدارماندى ءبىر جەلپىنتتى. ەكى كۇندىك ايتىستىڭ قورىتىندىسىندا ادىلقازىلار توبى ءۇشىنشى ورىنعا باۋىرجان حاليوللا, مەيىربەك سۇلتانحان جانە ەركەبۇلان قاينازاروۆتى لايىق دەپ تاپتى. ولاردىڭ ارقايسىسىنا 400 مىڭ تەڭگەدەن سىياقى بەرىلدى. ال ەكىنشى جۇلدەگە يە بولعان شالقارباي ءىزباساروۆ پەن بەكارىس شويبەكوۆتىڭ ەنشىسىنە 700 مىڭ تەڭگەدەن سىياقى بۇيىردى. ءبىرىنشى جۇلدەنى يەلەنگەن ماقسات اقانوۆتىڭ ونەرىنە 1 000 000 تەڭگەمەن باعالاندى. ايتىستىڭ باس جۇلدەسى – 2 000 000 تەڭگە بولاتبەك ورازباەۆقا تاپسىرىلدى. «پارتيا ءۇشىن ەلدىكتى جىرلاعان, ەلباسىنىڭ سايلاۋداعى جەڭىسىن پاش ەتكەن, كەشەگى ۇلى سوعىس جەڭىمپازدارىنىڭ ەرلىگىن دارىپتەگەن ايتىستى قولداۋ اسا ماڭىزدى. ەلباسى الدىمىزعا ماقسات ەتىپ قويعانداي, ءبىز ەلدىك سانا, ءتول مادەنيەت, وتباسىلىق قۇندىلىقتار, رۋحانيات, ءتىلدى ۇدايى ارداقتاۋعا ءازىرمىز. ەلىمىزدىڭ بولاشاعى – جاستاردى تاربيەلەۋ – ءبىزدىڭ باستى ماقساتىمىز. ەلباسى ايتقانداي, ەلىمىز قۋاتتى بولۋى ءۇشىن ەڭ ءبىرىنشى ۇلتتىڭ رۋحى بيىك بولۋى كەرەك. «نۇر وتان» پارتياسى ايتىستى ءاردايىم قولداي بەرەدى. ايتىستا ايتىلعان سىنداردى ءبىزدىڭ فراكتسيا دەپۋتاتتارى قاعازعا ءتۇرتىپ الىپ, ول ماسەلەلەردىڭ شەشىلۋىنە ىقپال ەتەتىن بولادى», – دەدى  «نۇر وتان» پارتياسى توراعاسىنىڭ ءبىرىنشى ورىنباسارى باۋىرجان بايبەك. جولداسبەك شوپەعۇل. دەرەك: egemen.kz. سۋرەت: راحىم قويلىباەۆ.