بىلتىر قىستا ازاماتتاردى الاياقتىق سحەمالاردان قورعاۋ ماقساتىندا ەلىمىزدە بانكتەر مەن ميكروقارجى ۇيىمدارىنان جاڭا نەسيە الۋدان ءوز ەركىمەن باس تارتۋعا مۇمكىندىك بەرەتىن «ستوپ كرەديت» مەملەكەتتىك قىزمەتى ەنگىزىلدى. ەGov.kz پورتالىنداعى جانە ەGov mobile قوسىمشاسىنداعى تەگىن قىزمەتتىڭ كومەگىمەن ءاربىر قارىز الۋشى مۇنداي شەكتەۋدى ءوزى بەلگىلەيدى. سونداي-اق پايدالانۋشى كەز كەلگەن ۋاقىتتا نەسيەلەر مەن قارىزداردى الۋعا بەلگىلەنگەن شەكتەۋلەردى الىپ تاستاي الادى. ماڭىزدىسى, ەگەر ازامات نەسيە الۋدان ەرىكتى تۇردە باس تارتۋدى ورناتسا, بىراق وسى كەزەڭدە وعان زاڭسىز كرەديت رەسىمدەلگەن بولسا, وندا بانك نەمەسە مقۇ قارىز جونىندەگى بەرەشەكتى ەسەپتەن شىعارۋعا مىندەتتى. قازىردە 2 ملن ازامات وسى مۇمكىندىكتى پايدالانىپ, نەسيەلەر مەن شاعىن قارىزداردى رەسىمدەۋگە ەرىكتى تىيىم سالۋدى بەلگىلەۋگە ءوتىنىم بەرگەن.
كرەديت الۋدان ەرىكتى تۇردە باس تارتۋ جەكە باس دەرەكتەرى الاياقتاردىڭ قولىنا تۇسكەن كۇندە دە ۇلكەن قارجىلىق پروبلەمالاردان ساقتاي الادى. ماسەلەن, ازامات جەكە كۋالىگىن جوعالتسا نەمەسە ونىڭ دەرەكتەرى ۇرلانسا, قىلمىسكەر ونلاين-ءوتىنىمدى پايدالانىپ بانكتە نەمەسە مقۇ-دا نەسيە رەسىمدەۋى مۇمكىن. «ستوپ كرەديت» ورناتىلعان بولسا, جۇيە وپەراتسيانىڭ جولىن كەسىپ, ۇيىم اۆتوماتتى تۇردە كرەديت رەسىمدەۋدەن باس تارتادى. سول سەكىلدى قارىزدى رۇقساتسىز كىرگەن ونلاين-بانكينگ ارقىلى رەسىمدەيتىن فاكتىلەر كەزدەسەدى. ايتالىق, الاياقتار فيشينگتىك سايتتار نەمەسە ۇرلانعان مالىمەتتەر بازاسى ارقىلى ءسىزدىڭ ونلاين-بانكينگىڭىزگە رۇقساتسىز كىردى دەلىك. ادەتتە ولار ءسىزدىڭ اتىڭىزعا بىرنەشە رەت باسۋ ارقىلى كرەديت رەسىمدەي الادى. ەگەر «ستوپ كرەديت» ىسكە قوسىلىپ تۇرسا, رۇقساتسىز اشىلعان اككاۋنتقا قاراماستان قارىز ماقۇلدانبايدى.
بۇگىندە «جالعان بانكيرلەردىڭ» قاتىسۋىمەن بولاتىن الاياقتىق ارەكەتتەن اركىم-اق حاباردار. ادەتتە ولار «بانكتەن» قوڭىراۋ شالىپ تۇرعانىن, اتىڭىزعا الدەكىم كرەديت الۋعا وقتالعانىن حابارلاپ, ودان سوڭ اقشاڭىزدى «قاۋىپسىز شوتقا اۋدارۋ قاجەتتىگىنە» يلاندىرماق بولادى. ەگەر «ستوپ كرەديت» قىزمەتى الدىن الا قوسىلعان بولسا, قىلمىسكەر دەرەگىڭىزدى العاننىڭ وزىندە قارىز رەسىمدەي المايدى. سول سياقتى قارىزدان ەرىكتى تۇردە باس تارتۋ «قارجى كەڭەسشىسى» نەمەسە ء«تيىمدى بيزنەس» دەگەن سىلتاۋمەن كرەديت الۋعا كوندىرەتىن دوسىڭىزعا نەمەسە تانىسىڭىزعا دا ساباق بولماق. سەرۆيس ونلاين-كرەديتتەردى بەرۋدى اۆتوماتتى تۇردە بۇعاتتايدى.
الايدا ايلا-شارعىنىڭ نەبىر ءتۇرىن مەڭگەرگەن اككى ۇرىلار بۇل جاڭاشىلدىقتى دا ءوز پايداسىنا شەشۋگە كوشكەن. كەزەكتى رەت ازىرلەنگەن الاياقتىق سحەماسى بويىنشا بانك قىزمەتكەرىنىڭ اتىن جامىلعان ادام ىقتيمال جابىرلەنۋشىگە قوڭىراۋ شالىپ, قازىرگى ۋاقىتتا ونىڭ اتىنا نەسيە الۋعا ءوتىنىش بەرىلگەنىن ەسكەرتەدى. ءسويتىپ, ودان نەسيە رەسىمدەۋگە ارەكەت ەتكەنىن راستايتىنىن نە راستامايتىنىن سۇرايدى. كۇتپەگەن ساۋالدان توسىلعان ازامات ادەتتە ەشقانداي ءوتىنىش بەرمەگەنىن ايتىپ, اقتالادى. مۇنداي جاۋاپتى الدىن الا بولجاعان ايلاكەر كرەديت الۋعا ءوتىنىمنىڭ كۇشىن جويعانىن حابارلايدى. ارتىنشا مۇنداي جاعدايدى بولدىرماۋ ءۇشىن «ستوپ كرەديت» سەرۆيسىن پايدالانۋدى ۇسىنادى. ول ءۇشىن ازاماتقا كرەديتتەن ەرىكتى تۇردە باس تارتاتىن ءپىشىندى تولتىرۋ قاجەتتىگىن ايتىپ, بانكتىڭ رەسمي سايتىنا سىلتەمە جىبەرەدى. شىن مانىندە بۇل سىلتەمە جەكە جانە قارجىلىق اقپاراتتى جيناۋ ماقساتىندا قۇرىلعان فيشينگتىك سايتقا اپارادى. وسى سايتتاعى ۇلگىنى تولتىرا وتىرىپ, تۇتىنۋشى الاياقتارعا وزدەرىنىڭ دەربەس دەرەكتەرىن جاريا ەتەدى.
سوندىقتان قارجى ماماندارى نەسيە بەرۋگە ءوز بەتىنشە تىيىم سالۋدى بانكتەردىڭ سايتتارىندا ەمەس, ەلەكتروندىق ۇكىمەت پورتالىنداعى جەكە كابينەتتە نەمەسە eGov ءموبيلدى قوسىمشاسىندا عانا دەربەس قويۋعا بولاتىنىن, بەيتانىس ادامدار نۇسقاۋ بەرىپ SMS نەمەسە مەسسەندجەرلەر ارقىلى تۇسىنىكسىز سىلتەمەلەرگە ءوتۋدى ۇسىنعان كەزدە اسا مۇقيات, ساق بولۋ قاجەتتىگىن ەسكە سالادى.
