فوتو: اشىق دەرەككوز
ءمينيستردىڭ ايتۋىنشا, بيىل 173 مىڭ تۇلەك كوللەدجدى ءتامامدايدى. ولاردىڭ 123 مىڭى – جۇمىسشى بىلىكتىلىگىن مەڭگەرگەندەر, 27 مىڭى – دۋالدى وقىتۋ ارقىلى ءبىلىم العاندار, ال 10 مىڭى – ناقتى كاسىپورىنداردىڭ سۇرانىسى بويىنشا وقىتىلعان ماماندار.
«جىل سايىن كوللەدج تۇلەكتەرىن جۇمىسقا ورنالاستىرۋ كورسەتكىشى ءوسىپ جاتىر: 2024 جىلى تۇلەكتەردىڭ 81%-ى جۇمىسپەن قامتىلدى. جۇمىسشى ماماندىقتارى جىلى اياسىندا جۇمىسشى ماماندىقتاردىڭ بەدەلىن ارتتىرۋعا جانە كوللەدجدەردىڭ بيزنەسپەن ءوزارا ءىس-قيمىلىنا اسا نازار اۋدارىلۋدا. وقۋ جىلىنىڭ قورىتىندىسى بويىنشا قامقورلىق كومەك كورسەتەتىن كاسىپورىنداردىڭ سانى 7 ەسە ارتتى. بۇگىنگى تاڭدا 4 مىڭنان استام كاسىپورىن 662 كوللەدجگە, وتكەن جىلدىڭ قورىتىندىسى بويىنشا 412 كوللەدجگە 558 كاسىپورىن قامقورلىق كورسەتىپ وتىر», دەدى مينيستر.
سونىمەن قاتار, العاش رەت «پەداگوگ-كاسىبي باعدارلاۋشى» لاۋازىمى رەسمي تۇردە ەنگىزىلگەن. 905 جوعارى سىنىپ وقۋشىسى مەكتەپتى اياقتاۋمەن قاتار جۇمىسشى ماماندىعى بويىنشا ديپلوم دا العان. 2,5 ميلليون وقۋشى كاسىبي باعدارلاۋ شارالارىمەن قامتىلعان.
ءبىلىم بەرۋ ينفراقۇرىلىمى دا جاڭارتىلىپ كەلەدى. اتاپ ايتساق, 104 كوللەدجدىڭ ماتەريالدىق-تەحنيكالىق بازاسى جاڭارتىلىپ, ستۋدەنتتەرگە ارنالعان 2 مىڭ ورىندىق 8 جاتاقحانا پايدالانۋعا بەرىلگەن. سونداي-اق بيزنەس وكىلدەرى 8 مىڭنان استام وقۋ باعدارلاماسىن ازىرلەۋگە قاتىسقان.
