وتىرىس بارىسىندا بيۋرو مۇشەلەرى «قازاقستان رەسپۋبليكاسىنىڭ ۇكىمەتى مەن قىرعىز رەسپۋبليكاسىنىڭ مينيسترلەر كابينەتى اراسىنداعى ينۆەستيتسيالاردى كوتەرمەلەۋ جانە ءوزارا قورعاۋ تۋرالى كەلىسىمدى راتيفيكاتسيالاۋ تۋرالى» زاڭدى پالاتا وتىرىسىنىڭ كۇن تارتىبىنە شىعارۋ جونىندە قاۋلى قابىلدادى. بۇل زاڭ ەكى ەل اراسىنداعى ەكونوميكالىق ىنتىماقتاستىقتى نىعايتۋدى كوزدەيدى. اتاپ ايتقاندا, ءبىر تاراپتىڭ ەكىنشى تاراپتىڭ اۋماعىنداعى ينۆەستيتسيالارىن جۇزەگە اسىرۋ, سونداي-اق ەكى مەملەكەتتىڭ اۋماقتارىنداعى ينۆەستيتسيالىق قىزمەتكە بايلانىستى ماسەلەلەردى رەتتەۋ ءۇشىن قولايلى رەجىم قۇرۋ ءتارتىبى مەن شارتتارىن ايقىندايدى.
سونىمەن قاتار بيۋرودا سەنات كوميتەتتەرى وتكىزەتىن الداعى ءىس-شارالاردىڭ تاقىرىپتارى تالقىلاندى. وسى اپتادا رەسپۋبليكالىق بيۋدجەتتىڭ الەۋمەتتىك سالاعا ارنالعان شىعىستارى بويىنشا مەملەكەتتىك ءاۋديتتىڭ ناتيجەلەرى تۋرالى جانە قازاقستانداعى مەملەكەت-جەكەمەنشىك ارىپتەستىگىنىڭ ماسەلەلەرى مەن پەرسپەكتيۆالارى جونىندە وتىرىستار وتپەك. سونداي-اق دەپۋتاتتاردىڭ مۇددەلى تاراپتارمەن «جاسىل» تەحنولوگيالار مەن ينۆەستيتسيالاردى دامىتۋعا قاتىستى بىرقاتار كەزدەسۋى ۇيىمداستىرىلادى.
جوسپارلانعان ماڭىزدى ءىس-شارالاردىڭ ءبىرى – «قازاقستان رەسپۋبليكاسىندا اۆتوموبيل جولدارىن سالۋ جانە پايدالانۋ: اعىمداعى جاي-كۇيى, وزەكتى ماسەلەلەرى مەن ولاردى شەشۋ جولدارى» تاقىرىبىنا ارنالعان ۇكىمەت ساعاتى.
«ۇكىمەت ساعاتىندا وسىعان دەيىن وتكىزىلگەن كەزدەسۋلەردە ساراپشىلار ايتقان ۇسىنىستاردى ەسكەرە وتىرىپ, سالاداعى قوردالانعان ماسەلەلەردى جۇيەلى شەشۋ جولدارى تالقىلانادى. جولدىڭ ساپاسى كولىك ينفراقۇرىلىمى عانا ەمەس, سونداي-اق ول – تۇرعىنداردىڭ قاۋىپسىزدىگى, ەكونوميكالىق بەلسەندىلىك پەن ءومىر ءسۇرۋ ساپاسىنىڭ كورسەتكىشى. پرەزيدەنت قاسىم-جومارت توقاەۆ جاقىندا وتكەن قاۋىپسىزدىك كەڭەسىنىڭ وتىرىسىندا كولىك-لوگيستيكا سالاسىن دامىتۋ ماسەلەلەرىنە, ونىڭ ىشىندە ءىرى ينفراقۇرىلىمدىق-ترانزيتتىك جوبالاردىڭ جاي-كۇيىنە نازار اۋداردى. سوندىقتان بۇل باعىتتاعى جۇمىستاردى مەملەكەت باسشىسى ايقىنداپ بەرگەن ستراتەگيالىق ماقساتتار اياسىندا ناتيجەلى جۇزەگە اسىرۋ – بارشامىزدىڭ ورتاق مىندەتىمىز», دەدى م.اشىمباەۆ.
سونداي-اق بيۋرو مۇشەلەرى بۇعان دەيىن پارلامەنت ءماجىلىسى قابىلداعان زاڭداردى جۇمىس ءۇشىن سەناتتىڭ كوميتەتتەرىنە ءبولىپ بەردى.
