قىزىلوردا قالاسىندا قازاقستان رەسپۋبليكاسى قۇقىق قورعاۋ, ارنايى ورگاندارى مەن كۇشتىك قۇرىلىمدارى قىزمەتكەرلەرى اراسىندا شاعىن فۋتبولدان "قازاقستان رەسپۋبليكاسى ىشكى ىستەر ءمينيسترىنىڭ كۋبوگىنا" ارنالعان رەسپۋبليكالىق تۋرنير ءوز جالاۋىن كوتەردى. اتالعان سپورتتىق دودا 2025 جىلعا ارنالعان كۇنتىزبەلىك جوسپار اياسىندا جانە "دينامو" دەنە شىنىقتىرۋ-سپورت قوعامىنىڭ 100 جىلدىعىنا وراي ۇيىمداستىرىلىپ وتىر.
ءتۋرنيردىڭ اشىلۋ سالتاناتىندا قىزىلوردا وبلىسى پوليتسيا دەپارتامەنتىنىڭ سەرىك ەرگەشوۆ ءسوز سويلەپ, قاتىسۋشىلارعا ساتتىلىك تىلەدى:
-قۇرمەتتى تۋرنير قاتىسۋشىلارى مەن قادىرلى ارىپتەستەر! سىزدەردى ەلىمىزدىڭ قۇقىق قورعاۋ, ارنايى ورگاندارى مەن كۇشتىك قۇرىلىمدارى قىزمەتكەرلەرى اراسىندا ۇيىمداستىرىلىپ وتىرعان ىشكى ىستەر ءمينيسترىنىڭ كۋبوگىنا ارنالعان شاعىن فۋتبول ءتۋرنيرىنىڭ اشىلۋىمەن شىن جۇرەكتەن قۇتتىقتايمىن, - دەدى ول.
بۇل تۋرنير – تەك كاسىبي بىلىكتىلىكتى ەمەس, سپورتتاعى شەبەرلىك پەن اۋىزبىرشىلىكتى پاش ەتەتىن ماڭىزدى شارا. مۇنداي جارىستار سالاۋاتتى ءومىر سالتىن ناسيحاتتاپ, ۇيىمشىلدىقتى ارتتىرا وتىرىپ, قىزمەتتىك مىندەتتەردى ابىرويمەن اتقارۋعا جاڭا سەرپىن بەرەدى.
-بارشاڭىزعا ءادىل ءارى تارتىستى ويىن, جاراقاتسىز جارىس جانە تولاعاي تابىس تىلەيمىن. بۇل تۋرنير دوستىق پەن ارىپتەستىكتى نىعايتىپ, ەلگە قىزمەت ەتۋدىڭ جارقىن ۇلگىسىنە اينالسىن, – دەدى دەپارتامەنت باسشىسى.
سالتاناتتى شارا بارىسىندا ارنايى شاقىرىلعان مارتەبەلى مەيماندار – "دينامو" دشسق ورتالىق كەڭەسىنىڭ سپورت باسقارماسىنىڭ باستىعى گۇلايىم ماحاتقىزى, "دينامو" دشسق باسقارماسىنىڭ باستىعى ۆلاديمير مارين جانە قازاق سپورتىنىڭ ماقتانىشى, افينا وليمپياداسىنىڭ چەمپيونى, قىزىلوردا وبلىسىنىڭ دەنە شىنىقتىرۋ, سپورت جانە تۋريزم باسقارماسىنىڭ باسشىسى باقتيار ارتاەۆ تا قۇتتىقتاۋ لەبىزدەرىن ءبىلدىرىپ, قاتىسۋشىلارعا ساتتىلىك تىلەدى.
ءتۋرنيردىڭ اشىلۋ سالتاناتىندا جەرگىلىكتى ونەرپازدار ونەر كورسەتىپ, كورەرمەندەرگە كوتەرىڭكى كوڭىل كۇي سىيلادى.
ەكى كۇنگە سوزىلاتىن بۇل جارىسقا ەلىمىزدىڭ تۇكپىر-تۇكپىرىنەن كەلگەن 11 كوماندا قاتىسۋدا. شاعىن فۋتبولدىڭ شەبەرلەرى جاسىل الاڭدا ءوزارا مىقتىنى انىقتاپ, جەڭىس تۇعىرىنان كورىنۋگە بار كۇش-جىگەرىن سالماق.
