فوتو: اشىق دەرەككوزدەن
«تازا قازاقستان» ەكولوگيالىق اكتسياسى مەن استانا كۇنىنە وراي ۇيىمداستىرىلاتىن بايقاۋدىڭ ماقساتى – استانا قالاسىنىڭ, ونىڭ ماڭىنداعى ەلدى مەكەندەردىڭ سانيتارلىق جاعدايىن قامتاماسىز ەتۋ, قوقىستاردى جيناۋ جانە شىعارۋ, «استانا تازالىق» قىزمەتىنىڭ قالىپتاسۋى, دامۋى, جەتىستىكتەرى مەن كەلەشەگى تۋرالى ايتۋ, سونداي-اق جۇمىسشى ماماندىقتار جىلى اياسىندا كۇن سايىن قالا تازالىعىن قامتاماسىز ەتەتىن كاسىپورىن قىزمەتكەرلەرىنىڭ ەڭبەگىنە جۇرتشىلىق نازارىن اۋدارۋ.
بايقاۋعا وتاندىق بۇقارالىق اقپارات قۇرالدارىنىڭ جۋرناليستەرى مەن بلوگەرلەر قاتىسا الادى. بايقاۋ كەلەسى نوميناتسيالار بويىنشا وتەدى:
- «ۇزدىك تەلەۆيزيالىق ماتەريال»;
- «الەۋمەتتىك جەلىلەردەگى ۇزدىك جاريالانىم»;
- «باسپا باسىلىمىنداعى ۇزدىك ماقالا»;
- «ينتەرنەت-باسىلىمداعى ۇزدىك جاريالانىم».
وعان 2025 جىلعى 15 مامىر مەن 30 ماۋسىم ارالىعىندا مەملەكەتتىك نەمەسە ورىس تىلىندە شىققان جۇمىستار قابىلدانادى. ۇسىنىلاتىن جۇمىستار سانى شەكتەلمەگەن.
ولاردى قۇرامىنا كوممۋنالدىق سالا ماماندارى مەن تاجىريبەلى جۋرناليستەر كىرەتىن تاۋەلسىز كوميسسيا قارايدى. قازىلار القاسى بەرىلگەن تاقىرىپتىڭ وزەكتىلىگى جانە بايقاۋ شارتتارىنا سايكەستىگى, تاقىرىپتى اشۋ تەرەڭدىگى مەن شىنايىلىعى, بايانداۋ ءستيلى مەن اۆتورلىق پايىمنىڭ بىرەگەيلىگى سىندى كريتەريلەر بويىنشا باعالاماق.
بايقاۋعا قاتىسۋ ءۇشىن ماتەريالدار كەلەسى ەلەكتروندى پوشتا ارقىلى قابىلدانادى: astana_tazalyk@mail.ru. بايلانىس ءنومىرى: +7 700 259 2188.
جۇمىستاردى قابىلداۋ ۋاقىتى: 2025 جىلعى 30 ماۋسىم, ساعات 18:00-گە دەيىن (استانا ۋاقىتىمەن).
بايقاۋ قورىتىندىسى 2025 جىلعى 3-4 شىلدە ارالىعىندا جاريالانادى.
جالپى جۇلدە قورى – 4 ميلليون تەڭگە.
