وبلىس ورتالىعىنداعى №1 قالالىق اۋرۋحانا جانىندا ورىن تەپكەن قالالىق پەرزەنتحانا ءوز جۇمىسىن توقتاتادى. عيماراتتىڭ توزىعى جەتكەنى سەبەپتى, ونى ءارى قاراي پايدالانۋ قاۋىپتى دەپ تانىلعان. پەرزەنتحانا 1988 جىلى سالىنعان. سوڭعى جۇرگىزىلگەن سانيتارلىق تەكسەرىس عيماراتتىڭ اپاتتى جاعدايدا تۇرعانىن انىقتاعان.
№1 قالالىق اۋرۋحانا باسشىسىنىڭ حيرۋرگيا جونىندەگى ورىنباسارى ازامات قايتاەۆتىڭ ايتۋىنشا, 2024 جىلى پەرزەنتحانا بولىمشەسىندە بوسانۋ سانى 21 %-عا ازايعان. سونداي-اق, توسەك-ورىننىڭ ناقتى جۇكتەمەسى 26,7 %-عا كەمىگەن. كورسەتكىشتەردىڭ تومەندەۋى قارجىنى ءتيىمسىز پايدالانۋعا اكەلەتىنى انىق. سوڭعى جىلدارى بۇل عيماراتتا كۇردەلى جوندەۋ جۇمىستارى دا جۇرگىزىلمەگەن.
- تەحنيكالىق ساراپتاما قورىتىندىسى بويىنشا, عيماراتتى پايدالانۋعا رۇقسات تەك 2025 جىلعا دەيىن بەرىلگەن. بۇگىندە مۇندا 160 ادام جۇمىس ىستەيدى. ونىڭ 55-ءى پاۆلودار وبلىستىق پەريناتالدىق ورتالىعىنا اۋىسادى. قالعاندارى باسقا بولىمدەر مەن وڭىرلىك اۋرۋحانالارعا جۇمىسقا ورنالاسادى. ەگەر ۇسىنىلعان جۇمىستان باس تارتسا, زاڭعا ساي وتەماقى تولەنەدى. پەريناتالدىق ورتالىقتا مۇنداي كومەك كورسەتۋگە تولىق مۇمكىندىك بار. ورتالىقتىڭ قارجىلىق رەسۋرسى, كەڭ عيماراتى جانە قاجەتتى تەحنيكالىق جابدىقتارى جەتكىلىكتى. قازىرگى كەزدە قىزمەتكەرلەردى اۋىستىرۋ, قۇرال-جابدىقتاردى كوشىرۋ جۇمىستارى باستالىپ كەتتى. بۇل جۇمىستار 1 ماۋسىمعا دەيىن تولىق اياقتالادى دەپ جوسپارلانعان,-دەيدى ازامات قايتاەۆ.
