فوتو: 123ru.net
وقيعا ورنىنا وبلىس اكىمى نۇرىمبەت ساقتاعانوۆ ارنايى بارعان. اكىم كوميسسيا مۇشەلەرىنە ۇندەۋ جاساپ, وندىرىستىك جانە ەڭبەك قاۋىپسىزدىگىنە قاتىستى قولدانىستاعى ەرەجەلەردى تۇبەگەيلى قايتا قاراۋ قاجەت ەكەنىن ايتقان.
«تىنىش, بەيبىت زاماندا وندىرىستەگى قاۋىپسىزدىك تالاپتارىنىڭ ساقتالماۋى سالدارىنان ادام ولىمىنە جول بەرۋ مۇلدەم ورىنسىز. كەز كەلگەن مەكەمە ءۇشىن ەڭ الدىمەن ادام ءومىرى مەن دەنساۋلىعى ماڭىزدى بولۋى ءتيىس. وبلىس اكىمدىگى اتىنان قازا تاپقانداردىڭ وتباسىنا قايعىرا كوڭىل ايتامىن جانە جان-جاقتى كومەك كورسەتىلەتىنىن جەتكىزەمىن. سونىمەن قاتار, ءتيىستى ورگاندارعا وقيعانىڭ سەبەپتەرىن انىقتاۋ جانە كىنالىلەردىڭ جاۋاپكەرشىلىگىن بەلگىلەۋ ءۇشىن تولىق ءارى ءادىل تەرگەۋ جۇرگىزۋدى تاپسىردىم», دەدى نۇرىمبەت ساقتاعانوۆ.
ارنايى كوميسسيا توراعاسى, شقو باس ەڭبەك ينسپەكتورى باقىتبەك قيزاتوۆتىڭ ايتۋىنشا, وقيعاعا بايلانىستى ون كۇن ىشىندە جان-جاقتى تەرگەۋ جۇرگىزىلەدى. قاجەت بولعان جاعدايدا تەرگەۋ مەرزىمى 30 كۇنگە دەيىن ۇزارتىلىپ, سالالىق ساراپشىلار تارتىلادى. تەرگەۋ قورىتىندىسى قۇقىق قورعاۋ جانە سوت ورگاندارىنا جىبەرىلەدى.
وبلىس اكىمى وندىرىستىك جازاتايىم وقيعالاردىڭ الدىن الۋدا كەشەندى ءتاسىلدىڭ ماڭىزدىلىعىن اتاپ ءوتىپ, مۇنداي جاعدايلاردا قاۋىپسىزدىك پەن ەڭبەك قورعاۋ ماسەلەسى ايماق باسشىلىعىنىڭ تۇراقتى باقىلاۋىندا بولاتىنىن جەتكىزگەن.
ايتا كەتەيىك, قازا تاپقانداردىڭ وتباسىلارىنا رەسپۋبليكالىق بيۋدجەتتەن وتەماقى تولەنىپ, ساقتاندىرۋ تەتىكتەرى ارقىلى دا قاجەتتى كومەك كورسەتىلمەك. ايماق باسشىسى مارقۇمداردىڭ تۋىستارىمەن جەكە كەزدەسىپ, ولاردىڭ نازاردان تىس قالمايتىنىن جانە بارىنشا قولداۋ كورسەتىلەتىنىن ايتقان.
