مارتەبەلى مەيماندى قارسى العان ە.قوشانوۆ ءبىزدىڭ ەلىمىز ءۇشىن ارمەنيانىڭ وڭتۇستىك كاۆكاز ايماعىنداعى ماڭىزدى ارىپتەس ەكەنىن اتاپ ءوتتى. ءماجىلىس سپيكەرى ەلىمىز ارمەنيا باسشىلىعى جۇزەگە اسىرىپ جاتقان اۋقىمدى ساياسي, ەكونوميكالىق جانە الەۋمەتتىك رەفورمالاردى ۇلكەن قىزىعۋشىلىقپەن باقىلاپ وتىرعانىن ايتتى.
– بىلتىر قازاقستان مەن ارمەنيا اراسىنداعى دوستىق جانە ىنتىماقتاستىق تۋرالى شارتتىڭ 25 جىلدىعىن اتاپ وتتىك. بۇل مەرەيتويعا وراي مەملەكەت باسشىلارىنىڭ رەسمي ساپارلار الماسۋىنىڭ سيمۆولدىق ءمانى زور. بۇل ەكى ماڭىزدى وقيعا جاڭا گەوساياسي جاعدايلارداعى مەملەكەتتەرىمىز اراسىنداعى ىنتىماقتاستىققا قۋاتتى قارقىن بەردى. وندا ارىپتەستىگىمىزدىڭ بارلىق سالاسىن قامتيتىن بىرقاتار كەلىسىمگە قول قويىلدى, – دەدى ە.قوشانوۆ.
كەزدەسۋ بارىسىندا پارلامەنت سپيكەرلەرى جوعارى دەڭگەيدە قول جەتكىزىلگەن كەلىسىمدەردى زاڭنامالىق تۇرعىدان راسىمدەۋ جانە جاڭا ەكونوميكالىق ءارى مادەني جوبالاردى قولداۋ ماسەلەلەرىن تالقىلادى. ءماجىلىس توراعاسى ارميان ارىپتەسىن ەلىمىزدە جۇرگىزىلىپ جاتقان رەفورمالار مەن زاڭ شىعارۋ جۇمىسى جايىندا حاباردار ەتتى. اڭگىمە بارىسىندا تاراپتار قازاقستاندا قابىلدانعان الەۋمەتتىك ادىلدىك, زاڭ ۇستەمدىگى مەن ءتارتىپتى نىعايتۋعا باعىتتالعان زاڭداردىڭ ارمەنيا ءۇشىن قىزىعۋشىلىق تۋدىراتىنىن اتاپ ءوتتى. وسى ورايدا دەپۋتاتتار بەيىندى كوميتەتتەر ارقىلى تاجىريبە الماسۋعا كەلىستى.
ءوز كەزەگىندە الەن سيمونيان پارلامەنتتەر اراسىنداعى قارىم-قاتىناستى جانداندىرۋ قاجەتتىگىنە نازار اۋداردى.
– پارلامەنتارالىق بايلانىستىڭ دامۋى ءوزارا تۇسىنىستىكتى تەرەڭدەتۋگە, سەنىمدى نىعايتۋعا, سونداي-اق ەكىجاقتى كەلىسىمدەردى ءتيىمدى جۇزەگە اسىرۋعا سەپتىگىن تيگىزەدى. بيىل ءساۋىر ايىندا وتكەن قازاقستاننىڭ مادەنيەتى كۇندەرى ارمەنيا ءۇشىن مادەني-گۋمانيتارلىق سالاداعى ماڭىزدى وقيعاعا اينالدى. سونىمەن قاتار ارمەنيا تاراپى قازاقستان بيلىگى مەن حالقىنىڭ ارميان دياسپوراسىنا دەگەن كوزقاراسىن جوعارى باعالايدى. ول – ەلدەرىمىز بەن حالىقتارىمىز اراسىنداعى ماڭىزدى دانەكەر, – دەدى ۇلتتىق جينالىس توراعاسى.
سونىمەن قاتار تاراپتار ەكونوميكا, لوگيستيكا, مادەني-گۋمانيتارلىق سالاداعى ىنتىماقتاستىقتىڭ كەڭ اۋقىمدى ماسەلەلەرىن دە تالقىلادى.
