كەيىنگى كەزدەرى بارىستىڭ فوتوتۇزاققا ءتۇسۋى بالەندەي جاڭالىق بولماي قالدى. نەگە دەيسىز عوي, التايدا ءىلبىستىڭ بارى بىرنەشە رەت دالەلدەندى. العاشىندا عوي, 2014 جىلى قار بارىسى ارشاتىدا فوتوعا ءتۇسىپ, بۇكىل ەل ەلەڭ ەتكەن. بارىستىڭ بارى دا سول جىلدارى انىقتالعان. ايتپەسە وعان دەيىن ورمانشىلاردىڭ كوردىك دەگەن اڭگىمەسى اڭىز سەكىلدى ەدى. قازىرگى ۋاقىتتا ۇلتتىق پارك اۋماعىندا 11 بارىس جورتىپ ءجۇر دەسەدى ماماندار.
– التايدا اڭنىڭ قاي ءتۇرى بولسىن كوبەيىپ كەلەدى. سونىڭ ىشىندە ەرەكشە دەن قويىپ, ۇنەمى سۋرەتكە ءتۇسىرىپ جۇرگەنىمىز – قار بارىسى. ارشاتىنىڭ تاۋلارىندا, سارىمساقتى جوتاسىندا, بيىل بۇركىت شىڭىندا بارىستىڭ بارى انىقتالدى. ساناق جۇرگىزىپ, تىركەپ وتىرمىز, – دەيدى جانۋارلار الەمىن قورعاۋ جانە ءوندىرۋ ءبولىمىنىڭ باسشىسى ەرىك قاسىموۆ.
بۇلاردىڭ ەڭبەگى دە ەرەكشە. اق قار, كوك مۇزدا 3000 مەتر بيىككە جاياۋ-جالپى شىعىپ, ءىلبىستىڭ جىمىنا فوتوتۇزاق قۇرۋ وڭاي ەمەس. قۇرىلعىنى ورناتىپ قانا قويماي, ۇنەمى تەكسەرىپ وتىرۋ قاجەت. شاپشىما شىڭعا ءبىر ەمەس, بىرنەشە رەت شىعىپ جۇرگەن ەرىك سىندى مامانداردىڭ ءىسى – ەرلىك.
ايتا كەتەرلىگى, ولار قۇرعان تۇزاققا بارىس قانا ەمەس, تاۋدىڭ بيىگىن مەكەن ەتەتىن ايۋ سىندى ءىرى اڭداردان باستاپ, كەكىلىك سىندى قۇستارعا دەيىن تۇسەدى. ولاردىڭ بارلىعىنا كۇز بەن كوكتەمدە ساناق جۇرگىزىلىپ, داپتەرگە تىركەلىپ وتىرادى.
شىعىس قازاقستان وبلىسى,
كاتونقاراعاي اۋدانى
