ينۆەستيتسيالىق جوبانى «رامادان مف» جشس «چەرنيگوۆسكوە ي ك» اۋىلشارۋاشىلىق كاسىپورنىمەن بىرلەسىپ جۇزەگە اسىردى. تولىق قۋاتتىلىققا شىققان كەزدە جىلىنا شامامەن 9 مىڭ توننا ءسۇت تاپسىرىلاتىن بولادى. بۇل كولەمگە كەلەر جىلى قول جەتكىزۋ جوسپارلانىپ وتىر. ءونىم قاراعاندى وبلىسى مەن استانا قالاسىنىڭ ءسۇت وڭدەۋ كاسىپورىندارىنا جەتكىزىلەتىن بولادى.
جاڭا كاسىپورىننىڭ اشىلۋىندا وبلىس اكىمى ەرماعانبەت بولەكپاەۆ اۋىل تۇرعىندارىن قۇتتىقتادى.
– بۇگىن ءبىز زاماناۋي ءسۇت-تاۋار فەرماسىن اشۋدامىز - ول تەك جاڭا وندىرىستىك بۋىنعا عانا ەمەس, اۋىلداعى ەكونوميكالىق بەلسەندىلىكتىڭ ناعىز ورتالىعىنا اينالاتىن ماڭىزدى نىسان. مۇندا شامامەن 60 جۇمىس ورنى قۇرىلادى. بىراق ەڭ ماڭىزدىسى – جاستاردىڭ تۋعان جەرىندە قالۋ, جۇمىس ىستەۋ, دامۋ جانە لايىقتى تابىس تابۋ مۇمكىندىگى. ءدال وسىنداي جوبالار اۋىلدىڭ جاڭا ەكونوميكاسىن قالىپتاستىرادى دەپ سەنەمىن. جۇمىس بار جەردە مەكتەپ, بالاباقشا, تولىققاندى ءومىر بولادى, – دەگەن ءوڭىر باسشىسى جوبانى ىسكە اسىرۋعا قاتىسقانداردىڭ بارلىعىنا العىس ايتتى.
ستف قۇرىلىسى 2023 جىلدان باستاپ جۇرگىزىلدى. «رامادان مف» جشس مال شارۋاشىلىعىن دامىتۋ جونىندەگى ديرەكتوردىڭ ورىنباسارى ارمان نۇرجانوۆ قازىرگى ۋاقىتتا گولشتين تۇقىمدى سيىرلاردىڭ ءبىرىنشى لەگىن ساتىپ العانىن حابارلادى. ول الەمدەگى ەڭ ءسۇتتى سيىرلاردىڭ ءبىرى رەتىندە تانىمال.
شتات قازىردىڭ وزىندە ماماندارمەن جاساقتالعان. جۇمىسشىلاردى قابىلداۋ كەزىندە جەرگىلىكتى تۇرعىندارعا باسىمدىق بەرىلگەن.
– ءبىزدىڭ اۋداندا وسىنداي ۇلكەن ءسۇت-تاۋار فەرماسىنىڭ اشىلعانى قۋانتادى. بۇرىن بارلىق اۋدان تاۋلىگىنە 27 توننا ءسۇت بەرەتىن بولسا, ەندى ءبىر فەرما سونشا بەرەدى. مۇندا ءبارى ءبىر الاڭدا جۇزەگە اسىرىلعان. ازىق بازاسى قۇرىلدى. جاڭا جۇمىس ورىندارى پايدا بولدى. بۇل بيزنەسمەندەر ءوز موينىنا العان الەۋمەتتىك جاۋاپكەرشىلىكتى بىلدىرەدى, – دەپ اتاپ ءوتتى قاراعاندى وبلىسى مەن نۇرا اۋدانىنىڭ قۇرمەتتى ازاماتى گەورگي پروكوپ.
جالپى, جوبا وبلىستىڭ اگرارلىق سەكتورىن دامىتۋعا وڭ اسەر ەتەدى.
