فوتو: polisia.kz
الاياق الەۋمەتتىك جەلىلەردە شەتەلگە ءتيىمدى باعادا بيلەت الىپ بەرەمىن دەپ جارناما جاساعان. ول 70-كە جۋىق ادامدى الداپ, ارقايسىسىنان 200 مىڭنان 500 مىڭ تەڭگەگە دەيىن قارجى جيناعان. جابىرلەنۋشىلەر تۋر جولدامالارى جالعان ەكەنىن اۋەجايعا كەلگەندە ءبىر-اق بىلگەن. سەبەبى, قاسكوي كليەنتتەرگە جالعان ەلەكتروندى بيلەت پەن تۇبىرتەك جولداپ وتىرعان.
نۇرا اۋدانى پروكۋراتۋراسى قوعامدىق مۇددەلەردى قورعاۋ ءبولىمىنىڭ پروكۋرورى رايىمبەك ۇلىقبانوۆتىڭ ايتۋىنشا, الدانعانداردىڭ اراسىندا ەرەسەكتەر دە, بالالار دا بار. الاياق بيلەتتەردى نارىقتاعى باعادان ارزان ۇسىنىپ, ولاردى ارنايى ارنالار ارقىلى ساتىپ الامىن دەپ سەندىرگەن.
قۇقىق قورعاۋ ورگاندارىنىڭ جەدەل ارەكەتىنىڭ ارقاسىندا كۇدىكتى ۇستالىپ, بارلىق جابىرلەنۋشىگە كەلتىرىلگەن شىعىن تولىق وتەلگەن. سوت ۇكىمىمەن الاياق 3 جىل 6 ايعا باس بوستاندىعىنان ايىرىلعان.
ايتا كەتەيىك, قۇزىرلى ورگاندار تۇرعىنداردى تۋريستىك قىزمەتتەردى ساتىپ الماس بۇرىن تۋروپەراتوردىڭ ليتسەنزياسى بار-جوعىن تەكسەرۋگە شاقىرادى. قازىرگى ۋاقىتتا قازاقستاندا رەسمي تىركەلگەن 700-گە جۋىق تۋرفيرما بار. ولاردىڭ ءتىزىمىن «تۋركود» قوسىمشاسى ارقىلى تەكسەرۋگە بولادى. قوسىمشادا تۋرفيرما اتاۋىن نەمەسە ساتىپ العان جولدامانىڭ تۋركودىن ەنگىزىپ, كومپانيا تۋرالى تولىق اقپارات الۋعا بولادى.
