بۇگىنگى تاڭدا «جۇمىسشى ماماندىقتار جىلى» اياسىندا قالاداعى جوعارى سىنىپ وقۋشىلارىنا ءوندىرىس ورىندارىن تانىستىرۋ ماقساتىندا كەڭ كولەمدى ءىس-شارالار ۇيىمداستىرىلا باستادى.
ماسەلەن جۋىردا شىمكەنت قالالىق كاسىپكەرلەر پالاتاسىنىڭ قىزمەتكەرلەرى, «Top Generation School» ءبىلىم بەرۋ ورتالىعىنىڭ شاكىرتتەرى شاھارداعى ش ۇلىق وندىرەتىن ەڭ ءىرى كاسىپورىننىڭ ءبىرى «الەم-بت» فابريكاسىندا بولدى. ۇيىمداستىرۋشىلاردىڭ ايتۋىنشا وسى ءىس-شارا ارقىلى بولاشاق تۇلەكتەردى جۇمىسشى ماماندىق يەلەرىمەن تانىستىرىپ, جان-جاقتى مالىمەت بەرۋ كوزدەلگەن ەكەن.
«شىمكەنت قالاسىندا 40-قا جۋىق كوللەدج بولسا, سونىڭ 25-ىندە دۋالدى وقىتۋ جۇيەسى بار. سول ارقىلى 10 مىڭعا جۋىق ستۋدەنت وزدەرىنىڭ تەوريالىق ءبىلىمىن كاسىپورىندارعا بارىپ, تاجىريبەمەن ۇشتاستىرۋعا مۇمكىندىك العان. سونىڭ ناتيجەسىندە جاستار ءوز ماماندىعىن تەرەڭ مەڭگەرىپ, بىلىكتى مامان بولىپ شىعۋعا دايارلانادى. جالپى كاسىپكەرلەر پالاتاسى قالامىزداعى ءبىلىم بەرۋ ۇيىمدارىمەن بىرلەسىپ ساپالى كادر دايىنداۋ ءىسىن ءارى قاراي جالعاستىرا بەرەدى. بۇل ءبىرىنشى كەزەكتە ماماندارعا سۇرانىستى ازايتۋ ءۇشىن جانە ەكونوميكانى تۇراقتى باعىتتا دامىتۋ ءۇشىن كەرەك» دەدى شىمكەنت قالاسى كاسىپكەرلەر پالاتاسىنىڭ ءبولىم باسشىسى جانار التاەۆا.
ايتا كەتەيىك, «اتامەكەن» ۇلتتىق كاسىپكەرلەر پالاتاسى 2014 جىلدان باستاپ جىل سايىن وڭىردەگى كاسىپورىندارعا قانداي مامان قاجەتتىگىنە مونيتورينگ جاسايدى. بۇل باقىلاۋ قازاقستاننىڭ ەڭبەك جانە حالىقتى الەۋمەتتىك قورعاۋ مينيسترلىگىنىڭ enbek.kz پلاتفورماسىندا جۇزەگە اسىرىلادى. ول ەڭبەك نارىعىنىڭ قاجەتتىلىگىن ناقتى انىقتاۋعا, تەحنيكالىق جانە كاسىبي وقىتۋ بويىنشا مەملەكەتتىك تاپسىرىستى قالىپتاستىرۋعا كومەكتەسەدى. ناتيجەسىندە ءبىلىم بەرۋ ۇيىمدارى مەن وقۋ ورتالىقتارى وزدەرىنىڭ وقىتۋ باعدارلامالارىن كاسىپورىنداردىڭ سۇرانىسىنا ساي بەيىمدەپ, مامان دايىنداۋدىڭ ساپاسىن ارتتىرا تۇسەدى.
شىمكەنت
