فورۋمنىڭ ەكىنشى وتىرىسىنىڭ جۇمىسىنا (1-ءسى 2023 جىلدىڭ اقپانىندا ازەربايجاندا وتكەن) قۇرامىندا جوعارعى سوتتىڭ اكىمشىلىك ىستەر جونىندەگى سوت القاسىنىڭ توراعاسى اسلان تۇكيەۆ, اسكەري سوت توراعاسى عالىمجان ءناسىردىنوۆ جانە سوت اكىمشىلىگىنىڭ حالىقارالىق بايلانىستار ءبولىمىنىڭ مەڭگەرۋشىسى د.وماروۆ بار قازاقستاندىق دەلەگاتسيا قاتىستى.
ا.مەرعاليەۆ ءوز سوزىندە بەرىك قۇقىقتىق نەگىزدى قالىپتاستىرۋ, جوعارى سوت ورگاندارىنىڭ تاجىريبە مەن جەتىستىكتەرمەن الماسۋ, سوت تورەلىگىنىڭ زاماناۋي ۇردىستەرىن تالقىلاۋ جانە ۇزدىك تاسىلدەردى ازىرلەۋدە ءوزارا ءىس-قيمىل جاساۋ ءۇشىن ۇيىم جارعىسىن قابىلداۋدىڭ ماڭىزدىلىعىن اتاپ ءوتتى. قازاقستاننىڭ سوت جۇيەسىنىڭ اشىقتىعىن, تاۋەلسىزدىگىن جانە ادامدارعا باعدارلانۋىن ارتتىرۋ ءۇشىن ونى جاڭعىرتۋ باعىتى تۋرالى حاباردار ەتتى.
قازاقستانداعى رەفورمالار قاتارىندا سوت جۇيەسىن قارجىلاندىرۋدىڭ جاڭا مودەلىن (بارلىق مەملەكەتتىك ورگانداردىڭ شىعىستارىنىڭ كەمىندە 6,5%) ەنگىزۋدى, اۋداندىق سوت توراعالارىن سۋديالار رەتىندە سايلاۋ ءراسىمىن, القابيلەردى تاڭداۋدىڭ تسيفرلىق ءراسىمىن, كاسساتسيالىق سوتتى, ازاماتتىق جانە اكىمشىلىك ىستەر بويىنشا سوت ءىسىن جۇرگىزۋدە اۋماقتان تىس سوتتىلىقتى جانە ت.ب. اتاپ ءوتىلدى. شارالار سىبايلاس جەمقورلىق تاۋەكەلدەرىن تومەندەتۋگە, سوتتاردىڭ بەيتاراپتىعىنا كۇماندى جويۋعا جانە سوت تورەلىگىنە دەگەن سەنىمدى ارتتىرۋعا باعىتتالعان.
ءىس-شارا اياسىندا ا.تۇكيەۆ تۇركيانىڭ كاسساتسيالىق سوتىنىڭ توراعاسى ومەر كەركەزبەن, تۇركيا مەملەكەتتىك كەڭەسىنىڭ توراعاسى زەكي يگيتپەن جانە قىرعىزستان جوعارعى سوتى توراعاسىنىڭ ورىنباسارى نۋرگۋل باكيروۆامەن كەزدەسۋلەر وتكىزدى.
قر جوعارعى سوتىنىڭ توراعاسى اتاپ وتكەن پوستۋلاتتارمەن قاتار, ا.تۇكيەۆ قازاقستاندا زاڭ ۇستەمدىگىن, سوت تورەلىگىنىڭ قولجەتىمدىلىگىن قامتاماسىز ەتۋ بويىنشا قابىلدانىپ جاتقان شارالارعا, ەكونوميكالىق جانە ينۆەستيتسيالىق داۋلاردى قاراۋدىڭ جاڭا تاسىلدەرىنە توقتالدى.
ونىڭ ايتۋىنشا, ارپك-تە بەكىتىلگەن قاعيداتتاردىڭ (پروتسەسسكە قاتىسۋشىنىڭ قۇقىقتارىنىڭ باسىمدىعى, سوتتىڭ بەلسەندى ءرولى جانە ت.ب.) ارقاسىندا ازاماتتار مەن كاسىپكەرلەر مەملەكەتتىك ورگاندارعا قارسى ىستەردىڭ 58 پايىزىن ۇتىپ شىعادى. ول قازاقستان رەسپۋبليكاسىنىڭ سوت رەفورماسىنىڭ قۇرامداس بولىگى بولىپ تابىلاتىن اپەللياتسيانىڭ ءرولىن كۇشەيتۋ, تسيفرلاندىرۋ جانە روبوتتاندىرۋ, جاساندى ينتەللەكت ەلەمەنتتەرى بار سەرۆيستەر جانە ت.ب. تۋرالى ايتتى.
