فوتو: اشىق دەرەككوز
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە, ەلىمىزدە مۇگەدەكتىگى بار ازاماتتاردىڭ جالپى سانى 737,4 مىڭ ادامعا جەتىپ وتىر, بۇل قازاقستان حالقىنىڭ 3,7%-ى. ولاردىڭ ىشىندە 376,7 مىڭى – ەڭبەككە قابىلەتتى جاستاعى ازاماتتار.
«قر الەۋمەتتىك كودەكسىنە سايكەس جەرگىلىكتى اتقارۋشى ورگاندار مۇگەدەكتىگى بار ادامدار ءۇشىن اۋىر جۇمىستارداعى, ەڭبەك جاعدايلارى زياندى, قاۋىپتى جۇمىستارداعى جۇمىس ورىندارىن ەسەپكە الماي, جۇمىس ىستەيتىندەردىڭ جالپى سانىنىڭ 2-دەن 4% - نا دەيىنگى مولشەردە جۇمىس ورىندارىنا كۆوتا بەلگىلەيدى. وسى جىلدىڭ 1 توقسانىنىڭ قورىتىندىسىمەن كۆوتا بويىنشا 4,8 مىڭعا جۋىق ادام جۇمىسقا ورنالاستىرىلدى», دەلىنگەن حابارلامادا.
سونىمەن قاتار, ەرەكشە قاجەتتىلىكتەرى بار ازاماتتار جۇمىسپەن قامتۋعا جاردەمدەسۋدىڭ بەلسەندى شارالارىنا دا تارتىلىپ كەلەدى. 2025 جىلعى 1 مامىرعا دەيىنگى مالىمەتتەر بويىنشا:
- 874 ادام تۇراقتى جۇمىس ورىندارىنا ورنالاستىرىلدى;
- 191 ادام – الەۋمەتتىك جۇمىس ورىندارىنا;
- 80 ادام – جاستار پراكتيكاسىنا;
- 3248 ادام – قوعامدىق جۇمىستارعا;
- 4 ادام – «العاشقى جۇمىس ورنى» جوباسى بويىنشا;
- 333 ادام – «كۇمىس جاس» جوباسى اياسىندا جۇمىسقا قابىلداندى.
ايتا كەتەيىك, ەڭبەك داعدىلارىن دامىتۋ باعىتىندا دا ءتيىستى جۇمىستار جۇرگىزىلىپ جاتىر. 17 ادام قىسقا مەرزىمدى كاسىپتىك وقىتۋ كۋرستارىنان وتسە, 1,3 مىڭ ادام «باستاۋ بيزنەس» جوباسى بويىنشا كاسىپكەرلىك نەگىزدەرىنە وقىتىلدى, ولاردىڭ 726-سى وقۋدى اياقتاپ, ارنايى سەرتيفيكاتتار العان.
مەملەكەتتىك قولداۋ تەتىكتەرى اياسىندا حالىقتىڭ الەۋمەتتىك وسال توپتارىنا, سونىڭ ىشىندە مۇگەدەكتىگى بار ازاماتتارعا ءوز كاسىبىن اشۋعا 400 اەك مولشەرىندە مەملەكەتتىك گرانتتار بەرىلەدى. بۇل باستاما ولاردىڭ جەكە كاسىبىن دامىتۋعا ۇلكەن سەرپىن بەرەدى.
بۇدان بولەك, 2018 جىلدان باستاپ حالىقارالىق تاجىريبەگە سۇيەنە وتىرىپ, مۇگەدەكتىگى بار ادامدار ءۇشىن ارنايى جۇمىس ورىندارىن جابدىقتاۋعا بايلانىستى جۇمىس بەرۋشىلەردىڭ شىعىندارىن سۋبسيديالاۋ ءتارتىبى ەنگىزىلگەن. بۇل سۋبسيديالار جۇمىس بەرۋشىلەرگە ارنايى قۇرال-جابدىقتاردى ساتىپ الۋعا, ورناتۋعا جانە بەيىمدەۋگە كەتكەن شىعىنداردى وتەۋ ءۇشىن بەرىلەدى. ناتيجەسىندە بۇگىنگى كۇنگە دەيىن بارلىعى 226 ارنايى جۇمىس ورنى قۇرىلدى.
