بىرىككەن ۇلتتار ۇيىمى باس اسسامبلەياسىنىڭ قارارىنا سايكەس, 2026 جىل – حالىقارالىق ەرىكتىلەر جىلى دەپ جاريالاندى. وسىعان وراي ەلىمىزدە اۋقىمدى دايىندىق جۇمىستارى جۇرگىزىلىپ جاتىر. اتالعان باستاما پرەزيدەنت قاسىم-جومارت توقاەۆتىڭ ۇسىنىسى نەگىزىندە جۇزەگە اسىرىلىپ جاتقانىن ايتا كەتۋ كەرەك. مەملەكەت باسشىسى بۇل ۇسىنىستى 2020 جىلى بۇۇ باس اسسامبلەياسىنىڭ 75-سەسسياسىنداعى جالپى ساياسي پىكىرتالاس بارىسىندا رەسمي تۇردە جاريالاعان بولاتىن.
پرەزيدەنت ق.توقاەۆ ەلىمىزدە ۆولونتەرلىك قىزمەتتى دامىتۋعا ايرىقشا ءمان بەرىپ كەلەدى. ول ەرىكتىلىكتى ادىلەتتى قازاقستاندى قۇرۋ جولىنداعى ماڭىزدى قوعامدىق باستامالاردىڭ ءبىرى رەتىندە قاراستىرادى.
وسى باستامانى ىلگەرىلەتۋ ماقساتىندا كەشە استانادا حالىقارالىق ەرىكتىلەر جىلىن وتكىزۋگە دايىندىق ماسەلەلەرىنە ارنالعان ۇلتتىق ۇيىمداستىرۋ كوميتەتىنىڭ العاشقى وتىرىسى ءوتتى. وعان مادەنيەت جانە اقپارات ءمينيسترى ايدا بالاەۆا, بۇۇ ەرىكتىلەر باعدارلاماسىنىڭ اتقارۋشى ۇيلەستىرۋشىسى تويلى قۇربانوۆ, مەملەكەتتىك ورگانداردىڭ, ۇكىمەتتىك ەمەس ۇيىمداردىڭ جانە ۆولونتەرلىك بىرلەستىكتەردىڭ وكىلدەرى قاتىستى.
جيىن بارىسىندا مينيستر ا.بالاەۆا ەلىمىزدەگى ۆولونتەرلىك سالاسىندا اتقارىلىپ جاتقان جۇمىستار مەن وتانداستارىمىزدىڭ جەتىستىكتەرى جونىندە باياندادى.
– وتانداستارىمىز الەمنىڭ تۇكپىر-تۇكپىرىندە ەرىكتىلىك جوبالارعا, سونىڭ ىشىندە بۇۇ, يۋنيسەف سياقتى حالىقارالىق ۇيىمداردىڭ باستامالارىنا بەلسەندى اتسالىسىپ كەلەدى. ۇكىمەتتىڭ قولداۋىمەن 2020–2023 جىلدار ارالىعىندا توعىز وتانداسىمىز بۇۇ-نىڭ ءتۇرلى قۇرىلىمدارىندا ۆولونتەر رەتىندە قىزمەت اتقاردى. وتكەن جىلى جەتى ۆولونتەرىمىز بۇۇ-نىڭ كەنيا, تايلاند جانە تۇركياداعى اگەنتتىكتەرىنە جىبەرىلدى, – دەدى ا.بالاەۆا.
ۇلتتىق ۇيىمداستىرۋ كوميتەتىنىڭ مۇشەلەرى مەن قاتىسۋشىلار ەلىمىزدە جانە تۇتاستاي العاندا ورتالىق ازيادا ۆولونتەرلەر قوزعالىسىن دامىتۋعا, ازاماتتىق بەلسەندىلىكتى نىعايتۋعا باعىتتالعان ماڭىزدى باستامالار مەن الداعى ءىس-شارالاردى تالقىلادى. سپيكەرلەر سونداي-اق ەرىكتىلەر جىلىنا دايىندىق بارىسى تۋرالى بايانداپ, جاڭا جوبالار جونىندە وي ءبولىستى.
بۇۇ ەرىكتىلەر باعدارلاماسىنىڭ اتقارۋشى ۇيلەستىرۋشىسى ت.قۇربانوۆ قازاقستان تاراپىنا حالىقارالىق ەرىكتىلەر جىلىن ۇيىمداستىرۋعا بەلسەندى كىرىسكەنى ءۇشىن ريزاشىلىعىن ءبىلدىرىپ, ەلىمىزدىڭ بۇل باستاماداعى كوشباسشىلىعىن ەرەكشە اتاپ ءوتتى.
– سىزدەردىڭ بەلسەندى قىزمەتتەرىڭىز ەلدەگى ۆولونتەرلىك مادەنيەتىنىڭ دامۋىنا تىڭ سەرپىن بەرىپ قانا قويماي, قازاقستاندى ازاماتتىق باستامالار سالاسىنداعى ماڭىزدى حالىقارالىق سەرىكتەس رەتىندە تانىتا ءبىلدى. بۇگىندە قازاقستان – بۇۇ ەرىكتىلەر باعدارلاماسىنا قاتىسۋشى ەل رەتىندە ءوز پوزيتسياسىن نىقتاپ, كەلەشەكتە باسقا مەملەكەتتەرمەن جۇمىس بارىسىندا ءبىز قازاق ەلىنىڭ وڭ تاجىريبەسىن ۇلگى رەتىندە كەلتىرەتىن بولامىز, – دەدى ت.قۇربانوۆ.
وتىرىستا تاعى ءبىر ماڭىزدى جاڭالىق – الماتى قالاسىندا بۇۇ ەرىكتىلەر قوزعالىسىنىڭ ورتالىق ازياداعى سۋبوڭىرلىك كەڭسەسى اشىلاتىنى جاريا ەتىلدى.
– ءبىزدىڭ ورتاق مىندەتىمىز – مەملەكەتتىك قۇرىلىمدار, قوعامدىق ۇيىمدار, ءبىلىم بەرۋ مەكەمەلەرى مەن بۇقارالىق اقپارات قۇرالدارى بىرلەسىپ, ۆولونتەرلىككە قولداۋ كورسەتۋدىڭ ورنىقتى جۇيەسىن قالىپتاستىرۋ. بۇل باعىتتاعى جۇمىس بارلىق تاراپتىڭ ۇيلەسىمدى ىنتىماقتاستىعىنا نەگىزدەلۋگە ءتيىس, – دەپ قورىتىندىلادى ا.بالاەۆا.
