جامبىل اۋدانىنىڭ اكىمى نۇرلان ەرتاس ۇلىنىڭ ايتۋىنشا, اۋداندا 1,5 ملن-عا جۋىق ءتورت ت ۇلىك وسىرىلەدى. جالپى اۋماعى 2 ملن گەكتاردى الىپ جاتقان اۋداندا ءتولىن ەرتكەن وتار قوي, ءۇيىرلى جىلقى كوزگە جىلى ۇشىرايدى. ەرجان قۇسايىنوۆ جەتەكشىلىك ەتەتىن ء«داۋىتحان» شارۋا قوجالىعى بيازى ءجۇندى مەرينوس قويىن وسىرەدى. يەلىگىندە 2,5 مىڭداي قويدىڭ 1 400-ءى – ساۋلىق. 120 سيىر مەن 4 ءۇيىر جىلقى دا وسىندا. مال قىستا شالعايداعى جايىلىمدا, جازدا مايتوبە جايلاۋىندا باعىلادى. قاراماعىنداعى ساۋلىقتىڭ جارتىسىنان استامى قوزداپ ۇلگەرىپتى. مەجەدە ءار ساۋلىققا قوزى ىلەستىرۋ كوزدەلگەن.
مالشىلار تۇراتىن باسپانا, وتىن-سۋ, ىشەر استان تارىقپايدى. ساقمانعا كەلگەن اگرارلىق ۋنيۆەرسيتەتتىڭ بىلىمگەرلەرى وندىرىستىك تاجىريبەلەرىن وسىندا وتكىزىپ جاتىر.
ء«ۇش جىل ارالىعىندا 300-دەي ستۋدەنت وندىرىستىك تاجىريبەدەن ءوتتى. ناۋرىز ايىنان باستاپ مال تولدەتۋ ناۋقانىنا قاتىسىپ جاتىر» دەيدى قازاق ۇلتتىق اگرارلىق زەرتتەۋ ۋنيۆەرسيتەتىنىڭ وكىلى باقىتگۇل ەسىموۆا.
اق قويدىڭ قوزىسىن قاتارعا قوسۋ ءۇشىن ماڭدايتەر توگىلەدى. وسىنى تۇيسىنگەن ستۋدەنتتەردىڭ قوي قوزداتۋدىڭ ماشاقاتىنا مويىنسۇنعانى بايقالادى.
«ساقمانعا كەلگەنىمىزگە 10 كۇننەن استى. قوي تولدەتىپ جۇرگەنىمە قاتارىمنىڭ كوبى سەنبەيدى. از ۋاقىتتا قوزىلارعا ءدارى ەگىپ, قۇيرىقتارىن كەسۋدى ۇيرەندىك. جاڭا تۋعان قوزىنىڭ ءىشى وتسە ءوزىمىز دارىلەيمىز. تۇنگى كەزەككە تۇرامىز. كۇنىگە 5-10 قوي تۋادى. اراسىندا ەگىزدەرى بولادى», دەيدى 3-كۋرس ستۋدەنتى جانبولات جانۇزاق.
ماتىبۇلاق اۋىلدىق وكرۋگىنە قاراستى قاراباستاۋ اۋىلىنىڭ تۇرعىنى, كاسىپكەر اسحات ساكيەۆتىڭ شارۋا قوجالىعىندا 2 مىڭنان استام ەدىلباي قويى بار, ونىڭ 1 600-ءى – ساۋلىق. بۇعان قوسا, 60 باس ءىرى قارا, 2 ءۇيىر جىلقى باعىپ وتىر.
ۇلگىلى اۋىلدىق وكرۋگىنە قاراستى «مۇرىنباي» شارۋا قوجالىعىنىڭ يەسى سەرىك نۇرىمباەۆ مال ءوسىرىپ قانا قويماي, مالشىلاردىڭ الەۋمەتتىك جاعدايىن جاقسارتىپ, مالدى-جاندى بولۋىنا قامقورلىق تانىتىپ كەلەدى. بۇگىندە 3 200 باس ەدىلباي قويىنىڭ 70 پايىزى ءتول ەرگىزگەن. باعىمىندا 50-گە جۋىق ءىرى قارا مەن 200-دەن استام جىلقى دا بار. ىرگەلى شارۋاشىلىقتا مال دارىگەرى, مەحانيزاتور, كولىك جۇرگىزۋشىسى جانە قۇرىلىس شەبەرلەرى تۇراقتى جۇمىس ىستەيدى.
ولكەدەگى 2 مىڭعا جۋىق شارۋا قوجالىق وسىمدىك شارۋاشىلىعى باعىتىندا ماماندانعان. 106 مىڭ گەكتارعا جۋىق ەگىستىكتىڭ 50 مىڭنان استامىنا ارپا, بيداي, جۇگەرى, س ۇلى سىندى ءداندى داقىلدار, 47 300 گەكتارعا كوپجىلدىق شوپتەر ەگىلەدى. سەبەبى اۋداندا 4 مىڭعا جۋىق شارۋاشىلىق مال وسىرۋمەن اينالىسادى. سوعان قاجەتتى جەم-ءشوپتىڭ 50 پايىزى وسى كوپجىلدىق شوپكە باعىتتالعان.
الماتى وبلىسى
