فوتو: اشىق دەرەككوز
ترامپتىڭ ايتۋىنشا, اقش-تا ءدارى-دارمەكتىڭ قۇنى باسقا ەلدەرمەن سالىستىرعاندا بىرنەشە ەسە قىمبات, كەيدە ءتىپتى 5–10 ەسەگە دەيىن جوعارى. ول بۇل جاعدايدى «ۇزاق جىلدار بويى ءتۇسىندىرۋ قيىن ءارى ۇياتتى جاعداي» دەپ باعالادى.
«فارماتسەۆتيكالىق كومپانيالار زەرتتەۋ مەن ازىرلەۋگە كەتكەن شىعىنداردى جەلەۋ ەتىپ, بارلىق اۋىرتپالىقتى تەك اقش ازاماتتارىنا ارتىپ كەلدى. بىراق بۇل اقتالاتىن ءىس ەمەس», دەدى ول.
ول سونداي-اق فارمكومپانيالاردىڭ سايلاۋ ناۋقانىنا جاسايتىن دەمەۋشىلىگىنىڭ وزىنە جانە رەسپۋبليكاشىل پارتياعا اسەر ەتپەيتىنىن ايتتى.
ء«بىز ادىلەتتى شەشىم قابىلدايمىز. ەرتەڭ تاڭعى ساعات 9:00-دە اق ۇيدە ەل تاريحىنداعى ەڭ ماڭىزدى جارلىقتاردىڭ بىرىنە قول قويامىن. بۇل جارلىقتىڭ ناتيجەسىندە رەتسەپتۋرالىق ءدارى-دارمەكتەر مەن وزگە دە فارماتسەۆتيكالىق ونىمدەردىڭ باعاسى 30–80%-عا دەيىن تومەندەيدى», دەپ مالىمدەدى ترامپ.
ترامپ بۇل باستامانى «اقش-تاعى ادىلەتتىلىكتى قالپىنا كەلتىرۋ جولىنداعى العاشقى قادام» دەپ اتاپ, امەريكالىقتاردىڭ دەنساۋلىق ساقتاۋ شىعىندارى بۇرىن-سوڭدى بولماعان دەڭگەيدە ازاياتىندىعىنا ۋادە ەتتى.
Fox News مالىمەتىنشە, بۇل جارلىق دەنساۋلىق ساقتاۋ جانە الەۋمەتتىك قىزمەتتەر مينيسترلىگىن Medicare باعدارلاماسى بويىنشا ءدارى-دارمەك باعاسىنا قاتىستى فارماتسەۆتيكالىق كومپانيالارمەن تىكەلەي كەلىسسوزدەر جۇرگىزۋگە مىندەتتەيدى. ايتا كەتەيىك, اتالعان باعدارلاما بايدەن اكىمشىلىگىنىڭ ينفلياتسيانى تومەندەتۋ تۋرالى زاڭ اياسىندا قابىلدانعان بولاتىن.
