فوتو: policlinic4.kz
جاسوسپىرىمدەر مەن جاستار اراسىندا رەپرودۋكتيۆتى دەنساۋلىققا جاۋاپكەرشىلىكپەن قاراۋ مادەنيەتىن قالىپتاستىرۋ, جىنىستىق قاتىناسقا ەرتە ءتۇسۋ سالدارلارى, جىنىستىق جولمەن بەرىلەتىن ينفەكتسيالاردىڭ تارالۋى جانە ايتۆ جۇقتىرعان جاڭا جاعدايلاردىڭ كوبەيۋىنىڭ الدىن الۋ ماقساتىندا 12-16 مامىر ارالىعىندا ەلىمىزدە رەپرودۋكتيۆتى دەنساۋلىق اپتالىعى وتەدى.
ايتا كەتسەك, اتالعان باستامانىڭ نەگىزگى ۇيىمداستىرۋشىسى – پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا.
«بۇگىندە بۇل ماسەلەلەردى اشىق, عىلىمي نەگىزدە جانە كاسىبي دەڭگەيدە تالقىلاۋ بۇرىنعىدان دا ماڭىزدى. وتكەن جىلعى تاجىريبە بۇل باستامانىڭ قوعام ءۇشىن وزەكتى ءارى قاجەتتى ەكەنىن كورسەتتى. سوندىقتان ءبىز اپتالىقتى جىل سايىن وتكىزۋ تۋرالى شەشىم قابىلدادىق», دەپ جازدى ايدا بالاەۆا.
ءمينيستردىڭ جازۋىنشا, اكتسيا اياسىندا حالىقتىڭ دەنساۋلىعىن نىعايتۋ, ادام اعزاسىنا جانە بولاشاعىنا سانالى كوزقاراس قالىپتاستىرۋ باعىتىندا مەملەكەتتىك ورگانداردىڭ, دەنساۋلىق ساقتاۋ جانە ءبىلىم بەرۋ ۇيىمدارىنىڭ, ۇكىمەتتىك ەمەس ۇيىمدار مەن حالىقارالىق سەرىكتەستەردىڭ كۇش-جىگەرى بىرىكتىرىلەدى.
وسى ورايدا مادەنيەت جانە اقپارات ءمينيسترى كاسىبي قاۋىمداستىقتاردى, بۇقارالىق اقپارات قۇرالدارىن جانە قوعامدىق پىكىر كوشباسشىلارىن اقپاراتتىق ناۋقاندى قولداۋعا شاقىرىپ وتىر.
اپتا اياسىندا ەلىمىزدىڭ بارلىق وڭىرىندەگى جاستار دەنساۋلىق ورتالىقتارىندا جانە باستاپقى مەديتسينالىق-سانيتارلىق كومەك ۇيىمدارىندا اشىق ەسىك كۇندەرى, تاقىرىپتىق دارىستەر, ترەنينگتەر, ينتەراكتيۆتى سەسسيالار مەن مامانداردىڭ قاتىسۋىمەن ونلاين-ۆەبينارلار ۇيىمداستىرىلادى.
قازىرگى ۋاقىتتا ەلىمىزدە 10–29 جاس ارالىعىنداعى جاسوسپىرىمدەر مەن جاستارعا مەديتسينالىق جانە پروفيلاكتيكالىق كومەك, پسيحولوگتاردان, الەۋمەتتىك قىزمەتكەرلەر مەن زاڭگەرلەردەن كەڭەس الۋعا مۇمكىندىك بەرەتىن 103 جاستار دەنساۋلىق ورتالىعى جۇمىس ىستەيدى.
