بۇل كۇندەرى اۋا رايى كۇرت قۇبىلىپ, جاۋىن-شاشىن جيىلەيدى, تەرىسكەيدەن سۋىق جەل تولاسسىز سوعادى. كيىكتىڭ انالىعى تولعاعى جەتكەندە وڭمەڭنەن وتەر وسى قارا سۋىققا قارسى جۇگىرە-جۇگىرە ابدەن ءالى بىتكەندە عانا بارىپ لاقتايدى ەكەن. كيىك تولدەپ بولعانشا كيەلى جانۋاردى جىرتقىشتىڭ ازۋىنان تابيعات-انانىڭ ءوزى قورعاپ, قامقورلىعىنا الادى. ەل اۋزىندا ءدال وسى كۇندەرى ءتۇز تاعىسى قاسقىر دا ءيىس سەزۋدەن قالىپ, تابەتىنەن ايىرىلادى دەگەن ءسوز بار.
9 مامىردا تاڭەرتەڭ ناۋرىزىم اۋدانىنا قاراستى ولەڭدى اۋىلىنداعى شارۋا قوجالىعىنىڭ باسشىسى دميتري يساەۆ ءوز القابىنىڭ شەتىندە قالعىپ كەتكەن قۇرالايدىڭ باسىنان سيپاعان ءساتىن ۆيدەوعا ءتۇسىرىپ العان. قازىر اتالعان اۋداندا كوكتەمگى ەگىس جۇمىستارى ءجۇرىپ جاتىر.
«سەگىزىنشى مامىردا ەشتەڭە كورىنبەپ ەدى, توعىزى كۇنى ەگىستىكتىڭ ماڭىندا ءۇيىر-ۇيىرىمەن ءورىپ جۇرگەن كيىكتەردى بايقادىق. تۇندە القاپتى تاپتاپ تاستاپتى. ەندى تاڭ قۇزىنان تۇرىپ جەردى قورۋعا شىعامىز, ءتۇن اۋعانشا جۇرەمىز. بيىل ەكى مىڭ گەكتارعا جۋىق ءدان ەگەمىز. قايدام, ەڭبەگىمىز ەش كەتپەسە بولدى. تولدەپ بولعان سوڭ بۇل ماڭنان اۋىپ كەتۋى دە مۇمكىن», دەيدى شارۋا.
ادەتتە وڭىرگە قۇرالاي سالقىنى مامىر ايىنىڭ ىشىندە, بىردە ايدىڭ باسىندا, بىردە ورتاسىندا, كەيدە اياعىندا كەلەدى. مىسالى, 2015 جىلى كيەلى جانۋارلار 24 مامىردان باستاپ تولدەي باستاعان. سولى جىلى كيىك قىرىلدى. بيىل ءتولدىڭ باسى 9 مامىرمەن تۇسپاس-تۇس كەلىپ وتىر.
قوستاناي وبلىسى
