سۋرەتتى تۇسىرگەن – اۆتور
پودگورنوە اۋىلىنىڭ قاق تورىندە اسقاقتاي بوي تۇزەگەن مەموريال باتىرلاردىڭ ەرلىگىن ايگىلەيتىندەي. سوعىستان كەيىنگى جىلدارى ورناتىلعان قاراپايىم عانا وبەليسك اۋىل جۇرتى ءۇشىن قاسيەتتى ورىنعا اينالعان. ۋاقىت وتە كەلە اۋىل ازاماتتارى ءۇش باتىردىڭ ەسىمىن لايىقتى تۇردە ۇلىقتايتىن ەڭسەلى ەسكەرتكىش تۇرعىزۋ كەرەك دەپ شەشكەن. بۇل ءىستىڭ باسى-قاسىندا ءجۇرىپ, نار تاۋەكەل ەتكەن ازاماتتار از بولمادى. قوبلان قامزين, ۆاسيلي پانيۋكوۆ, قينايات بەسەكەنەۆ, مەلس تالىسپاەۆ, گەننادي پيسماركين, الەكساندر فەدوسوۆ سەكىلدى ەل ازاماتتارى قولىنان كەلگەن كومەكتى اياماعان. قۇرىلىس جۇمىسىن شەبەر قيزاتوللا جەتەنوۆ تياناقتى اتقارىپ, ەل ريزاشىلىعىنا بولەنگەن. بۇل 2010 جىلدىڭ 9 مامىرى ەدى. جەڭىستىڭ 65 جىلدىعى قارساڭىندا تاريحي ەسكەرتكىشتىڭ سالتاناتتى اشىلۋى ءوتتى.
2012 جىلى مەموريال قايتا جاڭعىرتىلىپ, ءمارمار تاقتاداعى سوزدەردىڭ قاسىنا تىرنالاردىڭ بەينەسى قوندىرىلدى. قازاق دالاسىندا قالىقتاعان تىرنالار – ارقاشان ساعىنىشتىڭ, ماڭگىلىك رۋحتىڭ نىشانى. ەسكەرتكىش الدىندا ءۇش باتىردىڭ قولا ءمۇسىنى ورناتىلدى. تومەندە جانىپ تۇرعان ماڭگىلىك الاۋ – بۇگىنگى ۇرپاقتىڭ جۇرەگىندەگى وتتىڭ بەلگىسىندەي. قارا ءمارمار تاقتاعا قاشالعان ونداعان ەسىم – وسى اۋىلدان مايدانعا اتتانعان ەرلەردىڭ وشپەس ءىزى.
باتىرلارعا توقتالا كەتسەك, يۆان ياروتسكي تىنىق مۇحيت فلوتىنىڭ 390-تەڭىز اتقىشتار باتالونىندا روتا كومانديرى بولىپ, كەڭەس-جاپون سوعىسىندا ەرلىگىمەن كوزگە تۇسكەن. ءولىم مەن ءومىر بەلدەسكەن سىن ساعاتتا ونىڭ باتىلدىعى بۇكىل بولىمشەنىڭ تاعدىرىن شەشكەن. سوعىستان كەيىنگى جىلدارى رەسەيدىڭ لەنينگراد وبلىسىندا عۇمىر كەشكەن.
ال نيكولاي فونوۆ – 59-ارتيللەريالىق پولكتىڭ سەرجانتى, زەڭبىرەك كومانديرى. ول جاۋدىڭ بىرنەشە تانكىسىن ورتكە وراپ, اتى اڭىزعا اينالعان ەكەن. تۋعان جەرىنە ءدىن امان ورالعانىمەن, دەنساۋلىعى سىر بەرىپ, ەرتە كوز جۇمعان.
سەرگەي سەدنەۆ – دنەپردىڭ اساۋ اعىسىندا پونتوندىق پاركتى باسقارىپ, جاۋىنگەرلەردىڭ وزەننەن امان-ەسەن وتۋىنە جاعداي جاساعان جانكەشتى جاۋىنگەر.
بۇگىندە پودگورنوە اۋىلىنداعى ولاردىڭ ەسكەرتكىشتەرى – وتكەننىڭ ەمەس, ماڭگىلىكتىڭ نىشانى. جىل سايىن 9 مامىردا اۋىل تۇرعىندارى ەسكەرتكىش باسىنا جينالىپ, گۇل شوقتارىن قويىپ, باتىرلاردى ءۇنسىز ەسكە الادى. ايتقانداي, 2015 جىلى جەڭىستىڭ 70 جىلدىعى قارساڭىندا مەكتەپتە ارنايى مۋزەي اشىلىپ, باتىرلاردىڭ ءومىر جولى مەن مايدانداعى ەرلىكتەرى تۋرالى تىڭ دەرەكتەر جيناقتالدى.
پودگورنوەنىڭ بۇل ەڭسەلى ەسكەرتكىشى – ەلدىڭ ەلدىگىن, بىرلىگىن كورسەتەتىن بيىك رۋحتىڭ ءرامىزى. باتىرلار ەرلىگى – ۇرپاققا امانات, ونى دارىپتەۋ – پارىز. ويتكەنى ەل ءۇشىن جان قيعانداردىڭ ەسىمى – ماڭگىلىك!
شىعىس قازاقستان وبلىسى,
سامار اۋدانى
