جاڭا ەرەجەگە سايكەس, مەملەكەت بەلگىلى ءبىر ساناتتاعى ازاماتتارعا جالداۋ اقىسىنىڭ جارتىسىن تولەۋگە كومەكتەسەدى.
Finratings.kz مالىمەتىنشە, مەملەكەت شىنايى مۇقتاج جاندارعا قولداۋ كورسەتپەك. ولارعا مىنالار جاتادى:
- I جانە II توپ مۇگەدەكتەرى;
- مۇگەدەكتىگى بار بالانى تاربيەلەپ وتىرعان وتباسىلار;
- جەتىم بالالار جانە اتا-اناسىنىڭ قامقورلىعىنسىز قالعان 29 جاسقا دەيىنگى جاستار;
- «التىن القا», «كۇمىس القا» جانە «انا داڭقى» وردەندەرىنىڭ يەگەرى بولعان كوپبالالى انالار;
- كوپبالالى وتباسىلار.
ماڭىزدى شارت: سۋبسيديا تەك جەكە مەنشىك پاتەرلەرگە بەرىلەدى. ياعني, مەملەكەتتىك تۇرعىن ۇيگە, سونداي-اق تۋىستاردان نەمەسە بۇرىنعى جۇبايلاردان جالعا الىنعان پاتەرلەرگە قولدانىلمايدى — بۇل جالعان كەلىسىمشارتتاردىڭ الدىن الۋ ءۇشىن ەنگىزىلگەن تالاپ.
مەملەكەتتىك كومەك جالداۋ اقىسىنىڭ ءدال 50%-ىن قۇرايدى:
- 80% – رەسپۋبليكالىق بيۋدجەتتەن,
- 20% – جەرگىلىكتى اكىمدىك ەسەبىنەن بولىنەدى.
قالعان جارتىسىن پاتەر جالداۋشى ءوزى تولەيدى. مىسالى, ەگەر پاتەردىڭ ايلىق جالداۋ اقىسى 150 مىڭ تەڭگە بولسا, مەملەكەت اي سايىن 75 مىڭ تەڭگە قايتارىپ بەرەدى.
كومەك الۋ ءۇشىن وتباسىنداعى جان باسىنا شاققانداعى تابىس ءبىر ايلىق كۇنكورىس مينيمۋمىنان اسپاۋى كەرەك. بۇل رەتتە كەلەسى تولەمدەر ەسەپكە الىنبايدى:
- بالالار جاردەماقىسى,
- زەينەتاقى,
- مۇگەدەك بالاعا كۇتىم جاساۋعا تولەنەتىن جاردەماقى,
جەتىم بالالاردىڭ ستيپەندياسى.
پاتەر كولەمىنە دە شەكتەۋ بار:
- 1–3 ادامعا دەيىن – 40 ش.م. دەيىن;
- 4–5 ادامعا – 60 ش.م. دەيىن;
- 6 جانە ودان كوپ ادامعا – 80 ش.م. دەيىن.
ەگەر پاتەر كولەمى ءسال ارتىق بولسا, سۋبسيديا تەك نورماتيۆ شەگىندەگى بولىگىن قامتيدى.
ءوتىنىمدى www.otbasybank.kz سايتىندا بەرۋگە بولادى. شەشىم ءۇش جۇمىس كۇنى ىشىندە شىعادى.
ەگەر ءوتىنىم ماقۇلدانسا, ارنايى شوت اشىلادى. سول شوتقا اي سايىن مەملەكەتتىك سۋبسيديا ءتۇسىپ وتىرادى — ول پاتەر جالداۋ اقىسىنىڭ ءبىر بولىگىن وتەۋگە ارنالعان.
