ريم پاپاسىن سايلاۋ قالاي ءجۇرىپ جاتىر

كاتوليك شىركەۋىنىڭ داستۇرىنە سايكەس, ريم پاپاسىن سايلاۋ ءۇشىن ەكىدەن ءۇش بولىگى – كەم دەگەندە 89 داۋىس قاجەت. قازىرگى تاڭدا كونكلاۆ جۇمىسىنا الەمنىڭ ءار تۇكپىرىنەن جينالعان 133 كاردينال قاتىسىپ جاتىر.

ۆاتيكاننىڭ حابارلاۋىنشا, ءار كۇنى ءتورت داۋىس بەرۋ راۋندىنا دەيىن وتكىزۋ مۇمكىندىگى بار. كەلەسى تۋر بەيسەنبى تاڭىندا جالعاسادى. ەگەر داۋىس بەرۋ ءساتتى اياقتالسا, سيكستين كاپەللاسىنان اق ءتۇتىن كوتەرىلىپ, قوڭىراۋ سوعىلىپ, جاڭا پاپانىڭ سايلانعانىن حابارلايدى. ءداستۇر بويىنشا, سايلانعان پونتيفيك ءبىر ساعات ىشىندە اۋليە پەتر الاڭىنا قاراعان بالكونعا شىعىپ, جۇرتشىلىق الدىنا كورىنەدى. قازىردىڭ وزىندە الاڭدا مىڭداعان ءدىندارلار جاڭا پاپانىڭ ەسىمىن ەستۋگە جينالىپ وتىر.

ەڭ اۋقىمدى كونكلاۆ

بۇل جولعى كونكلاۆ پاپا فرانتسيسك 21 ءساۋىر كۇنى ومىردەن وتكەننەن كەيىن شاقىرىلدى. تاريحقا كوز جۇگىرتسەك, پونتيفيك سايلاۋ كونكلاۆتارى بىرنەشە كۇننەن بىرنەشە ايعا دەيىن سوزىلعان. قازىرگى زاماندا بۇل ۇدەرىس ەداۋىر جەدەلدەگەن: 2005 جانە 2013 جىلدارداعى ەكى كونكلاۆ نەبارى ەكى كۇندە اياقتالعان بولاتىن.

ايتا كەتەيىك, كونكلاۆ تۋرالى ىلگەرىدەگى ماقالامىزدا جاريالاعان ەدىك: كونكلاۆ دەگەن نە؟ 

بيىلعى كونكلاۆ – ريم-كاتوليك شىركەۋىنىڭ تاريحىنداعى ەڭ ءىرىسى سانالادى. كاردينالدار كوللەگياسى 252 مۇشەدەن تۇرسا دا, داۋىس بەرۋ قۇقىعى تەك 80 جاستان اسپاعان 135 كاردينالعا عانا بەرىلگەن. الايدا ولاردىڭ ەكەۋى دەنساۋلىعىنا بايلانىستى قاتىسا المادى.

كونكلاۆقا قاتىسىپ جاتقان ەڭ جاس وكىل – 45 جاستاعى ۋكراين تەكتى مەلبۋرن ەپيسكوپى ميكولا بىچوك.

سارسەنبى تاڭىندا كونكلاۆ قاتىسۋشىلارى ارنايى مەسسا وتكىزىپ, كەيىن سالتاناتتى شەرۋ تۇرىندە سيكستين كاپەللاسىنا بەت الدى. مۇندا ولار پونتيفيك سايلاۋ پروتسەسى جايلى ەشبىر مالىمەتتى سىرتقا شىعارماۋعا سەرت بەردى. وسىدان كەيىن بوتەن ادامدار كاپەللادان شىعارىلىپ, ءداستۇرلى extra omnes ء(«بارى شىقسىن») دەگەن سوزدەرمەن ەسىكتەر جابىلدى. بۇل ءسات رەسمي تۇردە كونكلاۆتىڭ باستالعانىن بىلدىرەدى.

قۇپيالىلىق – باستى تالاپ

پونتيفيك سايلاۋ – الەمدەگى ەڭ قۇپيا ساياسي جانە ءدىني پروتسەدۋرالاردىڭ ءبىرى. كونكلاۆ كەزىندە كاردينالدار سىرت الەممەن تولىقتاي وقشاۋلانادى. ولاردىڭ تۇرىپ جاتقان جانە جينالاتىن بارلىق بولمەلەرى تىڭداۋ قۇرىلعىلارى مەن باسقا دا ەلەكتروندىق قۇرالداردان تولىق تازارتىلعان. داۋىس بەرۋ بارىسى ءابسوليۋتتى قۇپيا جاعدايدا وتەدى.

ەندى قايتپەك؟

ءبىرىنشى داۋىس بەرۋ ناتيجەسىز اياقتالعان سوڭ, كاردينالدار كەشكى اسقا بەت العان. ساراپشىلاردىڭ پىكىرىنشە, ءدال وسىنداي بەيرەسمي جاعدايدا پونتيفيك لاۋازىمىنا ۇمىتكەرلەردى تالقىلاۋ, پىكىر الماسۋ جانە ىقتيمال وداقتاستارمەن كەلىسسوزدەر جۇرەدى.

بەيسەنبى كۇنى تاڭەرتەڭ قاتىسۋشىلار تاڭعى استان كەيىن قايتادان مەسسا وقىپ, داۋىس بەرۋدى جالعاستىرادى. كونكلاۆ الدىندا مەسسا وتكىزگەن 91 جاستاعى كاردينالدار كوللەگياسىنىڭ دەكانى دجوۆانني باتتيستا رە ءوز ارىپتەستەرىن «بۇگىنگى سىندارلى كەزەڭدە شىركەۋدى بىرىكتىرە الاتىن تۇلعانى» تاڭداۋعا ۇندەدى.

«بۇل وڭاي مىندەت ەمەس. بىرلىك دەگەنىمىز بىركەلكىلىك ەمەس, ول – سانالۋاندىقتىڭ ىشىندەگى تەرەڭ رۋحاني تۇتاستىق»,  دەدى ول ءوز سوزىندە.

كاردينال رە — ۆاتيكانداعى بەدەلدى تۇلعالاردىڭ ءبىرى, بۇعان دەيىن پاپا فرانتسيسكتىڭ جەرلەۋ ءراسىمىن باسقارعان. الايدا ءوزى 80 جاستان اسقاندىقتان, كونكلاۆقا قاتىسا المايدى. دەگەنمەن, ول داۋىس بەرۋدىڭ ەرەكشە ماڭىزىن اتاپ ءوتىپ, ءاربىر قاتىسۋشىنى جەكە مۇددەدەن جوعارى تۇرۋعا شاقىردى.

كاتوليك شىركەۋىنىڭ تاريحىنداعى ەڭ ۇزاق كونكلاۆ 1268 جىلدان 1271 جىلعا دەيىن — ءۇش جىلعا جۋىق سوزىلىپ, ناتيجەسىندە X گريگوري  سايلانعان. ال ەڭ قىسقا كونكلاۆ نەبارى 10 ساعاتقا سوزىلىپ, 1503 جىلى پاپا II يۋلي  سايلانعان ساتتە تىركەلدى.