فوتولار. تجم
جوبا توتەنشە جاعدايلار ءمينيسترى گەنەرال-مايور شىڭعىس ءارىنوۆتىڭ باسىم باستامالارىنىڭ بىرىنە اينالدى. ءمينيستردىڭ ايتۋىنشا اۋىل حالقى دا قالالاردىڭ تۇرعىندارى سياقتى قورعالۋى كەرەك. وسىلايشا مەملەكەتتىك ورتكە قارسى قىزمەت پەن ەرىكتىلەر كەزەڭ-كەزەڭىمەن وڭىرلەرگە بىرىڭعاي قولداۋدى بەلسەندى دامىتىپ جاتىر.
باعدارلامانىڭ ماقساتى مەملەكەتتىك ورتكە قارسى قىزمەت جوق شالعاي ەلدى مەكەندەردە جەدەل جانە ءتيىمدى كومەك جۇيەسىن قۇرۋ. تابيعي جاعدايلار مەن قاشىقتىقتى ەسكەرە وتىرىپ, بۇل جەردە ۋاقتىلى دەن قويۋ وتە ماڭىزدى.
باعدارلاما شەڭبەرىندە تجم اۋىل اكىمدىكتەرىنە ءورت ءسوندىرۋ تەحنيكاسى مەن جابدىقتارىن بەرەدى, ەرىكتى ورتكە قارسى قۇرالىمدار مەن بەكەتتەر جەلىسى دامىتىلىپ, ەرىكتىلەردىڭ كەزەكشىلىگى مەن جۇمىسى ءۇشىن جاعداي جاسالىپ, بارلىق جەرگىلىكتى بولىمشەلەر ءۇشىن بىرىڭعاي ۆيزۋالدى سايكەستەندىرۋ ەنگىزىلىپ جاتىر.
جىل باسىنان بەرى اباي, الماتى, قاراعاندى, سولتۇستىك قازاقستان, شىعىس قازاقستان وبلىستارىنىڭ مەملەكەتتىك ورتكە قارسى قىزمەت جوق اۋىلدىق ەلدى مەكەندەرىندە ۆەدومستۆو باسشىسىنىڭ قاتىسۋىمەن 5 ەرىكتى بەكەت اشىلىپ, بولىمشەلەرگە زاماناۋي تەحنيكا, جابدىقتار مەن كيىم-كەشەكتەر بەرىلدى.
تجم ءباسپاسوز قىزمەتىنىڭ مالىمدەۋىنشە بيىلعى جىلدىڭ سوڭىنا دەيىن ەلدە 40 ەرىكتى ورتكە قارسى قۇرالىم مەن جەرگىلىكتى اتقارۋشى ورگانداردىڭ بەكەتىن قۇرۋ جوسپارلانىپ جاتىر. ولاردى قامتاماسىز ەتۋ ءۇشىن مينيسترلىك 150 بىرلىك ءورت تەحنيكاسىن بەرۋدى كوزدەدى. سونداي-اق جۇمىس ىستەپ تۇرعان 34 ەرىكتى ءورت ءسوندىرۋ بەكەتىن كەزەڭ-كەزەڭىمەن جاڭارتۋعا ەرەكشە نازار اۋدارىلدى.
