بىرەۋگە جاي عانا كورمە سەكىلدى كورىنۋى مۇمكىن, ال شىن مانىندە, بۇل – ارماندار الاڭى. استانادا وتكەن «ENACTUS Kazakhstan National Expo 2025» – ەلىمىزدىڭ تۇكپىر-تۇكپىرىنەن جينالعان مىڭداعان جاسقا كاسىپكەرلىككە قادام, ءوز يدەياسىن الەمگە كورسەتۋ مۇمكىندىگى بولدى.
الەمنىڭ 35 ەلىندە جۇمىس ىستەيتىن حالىقارالىق باعدارلاما 50 جىل بويى ستۋدەنتتىك كاسىپكەرلىكتى دامىتىپ كەلەدى. جىل سايىن باعدارلاماعا 1 800 ۋنيۆەرسيتەتتەن 72 مىڭنان اسا جاس قاتىسادى. وسى ۋاقىتقا دەيىن ENACTUS اياسىندا 4 مىڭنان اسا جوبا جۇزەگە اسىرىلعان. ماقساتى – كاسىپكەرلىك ارقىلى قوعامدى جاقسى جاعىنا وزگەرتۋ. ەلىمىز دە – وسى قوزعالىستىڭ بەلسەندى مۇشەلەرىنىڭ ءبىرى.
قاتىسۋشىلاردى قۇتتىقتاعان پرەمەر-ءمينيستردىڭ ورىنباسارى ەرمەك كوشەرباەۆ بۇل باستامانىڭ جاستار الەۋەتىن ارتتىرۋداعى ماڭىزىنا توقتالدى.
«30 جىل ىشىندە قوزعالىس مىڭداعان جاستى بىرىكتىرىپ, ولاردىڭ كوشباسشىلىق قابىلەتىن اشۋعا, كاسىپكەرلىك الەۋەتىن جۇزەگە اسىرۋعا مۇمكىندىك بەردى. مەملەكەت ENACTUS قوزعالىسىن جاستاردىڭ مۇمكىندىگىن اشۋعا, باتىل يدەيالارىن جۇزەگە اسىرۋعا جانە كاسىبي مانسابىن ءساتتى باستاۋىنا جاعداي جاساۋعا باعىتتالعان باستاما رەتىندە قولدايدى. سىزدەر – جاڭا بۋىن وكىلدەرى, ەلىمىزدەگى يننوۆاتسيالاردىڭ قوزعاۋشى كۇشى بولىپ, تابىستى ستارتاپتار قۇرىپ, ەلىمىزدىڭ تۇراقتى دامۋىن قامتاماسىز ەتەسىزدەر», دەدى ە.كوشەرباەۆ.
بيىلعى ENACTUS كورمەسىنە تەك ۋنيۆەرسيتەت ستۋدەنتتەرى ەمەس, مەكتەپ وقۋشىلارى مەن كوللەدج ستۋدەنتتەرى دە جوبالارىن ۇسىندى. ارنايى مەكتەپارالىق چەمپيونات – «ENACTUS NextGen», كوللەدجدەر اراسىنداعى رەسپۋبليكالىق كۋبوك, سونداي-اق 5-8-سىنىپ وقۋشىلارىنا ارنالعان پيتچينگ الاڭى ۇيىمداستىرىلدى.
كورمە كەزىندە بىرنەشە باعىت قاتار جۇمىس ىستەدى: جاستاردىڭ يننوۆاتسيالىق جوبالارى تانىستىرىلدى, ءبىلىم ۇيىمدارى باعدارلامالارىن كورسەتتى, تۇراقتى دامۋ ماقساتتارىنا ارنالعان فورۋم ءوتتى. بۇرىن ENACTUS-تا بولعان تۇلەكتەر تاجىريبەلەرىمەن بولىسكەن بيزنەس-سەسسيالار ۇيىمداستىرىلدى.
بايقاۋ جەڭىمپازى ەلىمىزدىڭ اتىنان تايلاندتا وتەتىن «ENACTUS World Cup 2025» چەمپيوناتىنا قاتىسادى.
«اتامەكەن» ۇكپ باسشىسى رايىمبەك باتالوۆتىڭ ايتۋىنشا, جاستارعا مۇمكىندىك بەرۋ ارقىلى بۇكىل قوعامدى جانە ەكونوميكانى وزگەرتۋگە بولادى.
– ەلىمىز الەمدە ءبىرىنشى بولىپ ءداستۇرلى ستۋدەنتتىك باعدارلامامەن قاتار ENACTUS مەكتەپ باعدارلاماسىن ازىرلەۋگە كىرىستى. ENACTUS, بيزنەس جانە مەملەكەت اراسىنداعى ءتيىمدى ىنتىماقتاستىقتىڭ ماڭىزدىلىعىن اتاپ وتكىم كەلەدى. مۇنداي ىنتىماقتاستىقتىڭ تەك شاعىن بيزنەستى قولداۋ سالاسىندا عانا ەمەس, سونىمەن قاتار جاھاندىق ماقساتتاردا دا بولاشاعى زور. بۇل بارلىق تاراپقا ناقتى پايدا اكەلەتىن باعىت, – دەدى ر.باتالوۆ.
