سۋرەتتى تۇسىرگەن اقادىل رىسماحان
ءار ءتۇرلى ۇلت پەن ۇلىستىڭ وزىنە ءتان قۇندىلىقتارى دارىپتەلگەن ءىس-شارادا سپورت تۇرلەرىنەن جارىس ۇيىمداستىرىلىپ, ۇزدىك شىققاندار ماراپاتتالدى. ءىس-شاراعا جينالعان ەتنوس وكىلدەرىن ءوڭىر باسشىسى ەربول قاراشوكەەۆ بىرلىك مەرەكەسىمەن قۇتتىقتادى.
«تاتۋلىق پەن كەلىسىمنىڭ ارقاسىندا تاۋەلسىز مەملەكەتتى قالىپتاستىرىپ, اۋىز تولتىرىپ ايتارلىقتاي تابىسقا جەتتىك. ءتۇرلى ەتنوس وكىلدەرى ءبىر تۋدىڭ استىنان تابىلىپ, ەڭسەسى تىك ەلگە, ىرگەلى مەملەكەتكە اينالدىق.
ىنتىماعى جاراسقىن جامبىل ءوڭىرىن مەكەن ەتكەن 87 ەتنوس وكىلى ەلىمىزدىڭ تۇراقتىلىعىنا اتسالىسىپ, ءوڭىردىڭ بارلىق سالاسىندا ەلەۋلى ەڭبەك ەتىپ ءجۇر. مەملەكەت پەن قوعام اراسىندا سىندارلى ديالوگ ورناتۋعا وڭىردەگى 78 ەتنومادەني بىرلەستىك ءوز ىقپالىن تيگىزىپ وتىر.
بىرلىگى مىعىم ەلدىڭ بولاشاعى جارقىن بولاتىنى داۋسىز. بەيبىتشىلىك پەن كەلىسىم سالتانات قۇرعان جەردە ەل يگىلىگى ءۇشىن ناتيجەلى ىستەر اتقارىلاتىنىنا ەشكىمنىڭ كۇمانى جوق. پرەزيدەنت اسسامبلەيانىڭ ءحححىV سەسسياسىندا جۇكتەگەن مىندەتتەردى جۇمىلعان جۇدىرىقتاي جۇزەگە اسىراتىنىمىزعا سەنىمىم زور», دەدى وبلىس باسشىسى.
ءىس-شارا بارىسىندا وڭىردەگى ەتنوسارالىق كەلىسىمدى نىعايتۋعا سۇبەلى ۇلەس قوسقان ازاماتتار ماراپاتتالدى. ولار مەملەكەت باسشىسىنىڭ جارلىعىنا سايكەس «قازاقستان حالقى اسسامبلەياسىنا 30 جىل» مەدالىنە جانە «وبلىسقا سىڭىرگەن ەڭبەگى ءۇشىن» توسبەلگىسى مەن قۇرمەت گراموتا جانە العىس حاتقا يە بولدى.
مەرەكە كۇنى ەتنومادەني بىرلەستىك وكىلدەرى مەن كەنەن ازىرباەۆ اتىنداعى وبلىستىق فيلارمونيا ۇجىمى ۇسىنعان كونتسەرتتىك باعدارلاما كوپشىلىككە كوتەرىڭكى كوڭىل-كۇي سىيلادى. ءىس-شارا سوڭى «شاتتىق» بيىمەن تۇيىندەلدى.
تاراز
