جاڭا رەكوردتىڭ جاي-جاپسارىن كەڭىرەك باياندايتىن بولساق, الماتىنىڭ جەتىسۋ اۋدانىندا قازاقستان حالقىنىڭ بىرلىگى كۇنى اينابۇلاق شاعىناۋدانىنداعى №4 مامانداندىرىلعان بالالار-جاسوسپىرىمدەر سپورت مەكتەبىندە وتكەن ەدى. وسى مەرەكەدە ەل تاريحىنداعى ەڭ ۇزىن – 1704 مەتر بولاتىن لاعمان سوزىلىپ, بۇل مالىمەت قازاقستاننىڭ رەكوردتار كىتابىندا رەسمي تۇردە تىركەلدى.
ءبىر جاعىنان بۇل جاي عانا گاسترونوميالىق وقيعا ەمەس, كوپۇلتتى شاھار تۇرعىندارىنىڭ اۋىزبىرشىلىگىنىڭ نىشانى ىسپەتتى, جۇرەكككە جىلىلىق ۇيالاتقان ساتتەر ەدى. الماتىنىڭ 50-دەن استام اسپازى مەن اۋدان تۇرعىندارى ەكى ساعاتتىڭ ىشىندە لاعماننىڭ قامىرىن يلەپ, ەڭ ۇزىن لاعماندى دايىنداپ ۇلگەردى. ءتۇرلى ەتنوستاردىڭ وكىلدەرى ورتاق داستارحان ءۇشىن بىرلىك تانىتىپ, ءبىر كىسىدەي كۇشىن سالدى.
قازاقستان رەكوردتار كىتابىنىڭ رەسمي وكىلى باقىتجان ءسابيت ۇلى: «لاعمان قانشا مەتر بولسا دا جاڭا رەكورد ورناتىلدى, ويتكەنى مۇنداي ءىس-شارا ەلىمىزدە العاش رەت وتكىزىلىپ وتىر. ءبىز لاعماننىڭ ۇزىندىعىن عانا ەمەس, ۇلتارالىق بايلانىستاردىڭ بەرىكتىگىن دە بەكىتەمىز», دەدى.
ءدال وسى كۇنى ءبىر ۇستەلدىڭ اينالاسىنان قازاق, ۇيعىر, وزبەك, دۇنگەن, كورەي مەن باسقا ۇلت وكىلدەرى تابىلدى. بىرەۋ قامىر يلەسە, ەكىنشىسى ءيىن كەلتىرىپ, كوڭىلدى ءجۇردى. جينالعاندار ءۇشىن بۇل كۇن ناعىز مەرەكەگە اينالىپ, وندا اركىم ءوزىن ۇلكەن, تاتۋ وتباسىنىڭ ءبىر بولىگى رەتىندە سەزىندى.
ء«اربىر قاتىسۋشىنىڭ الدىندا قامىردىڭ ۇزىلمەۋىن قاداعالاۋ مىندەتى تۇردى. كەيبىر قيىندىقتارعا قاراماستان, اسپازدارىمىز ۇدەدەن شىقتى», – دەيدى الماتى قالاسى جەتىسۋ اۋداندىق انالار كەڭەسىنىڭ ءتورايىمى راحيما وماروۆا.
اسپازدىق وقيعاعا بولىسقان زۋحرا يزماسوۆا رەكورد ورناتۋدىڭ ءوزى قيىندىعى بولاتىنىن مويىنداپ: ء«سال اۋىر, تىم ۇزىن لاعمان, بىراق تاپسىرما نەعۇرلىم قيىن بولسا, سوعۇرلىم قىزىقتى بولادى ەكەن», دەيدى.
جەتىسۋ اۋدانىنىڭ ارداگەرلەر كەڭەسىنىڭ ءتورايىمى تامارا شاكىروۆا دا ءىس-شارانىڭ جۇمىسشى ماماندىقتار جىلىنا ارنالعانىن اتاپ وتە كەلە: «قوعامدىق تاماقتانۋ ورىندارىنىڭ كوپشىلىگى جەتىسۋ اۋدانىندا شوعىرلانعان. بۇگىن شىعىس تاعامدارى اسپازشىلارىنىڭ جۇمىسى كورسەتىلدى. مۇنداي كەرەمەتتى اركىم جاساي المايدى. قاراپايىم جۇمىسشىلاردى دا قادىرلەي ءبىلۋ كەرەك», دەيدى.
وسىلايشا, جەتىسۋ اۋدانىنىڭ تۇرعىندارى مەن ەتنومادەني ورتالىقتارى ايتۋلى وقيعاعا ۇيىتقى بولا ءبىلدى.
