فوتو – اۆتوردان
باياناۋىل اۋداندىق سوتىندا مايقايىڭ التىن كەنىشىندە 4 قۇتقارۋشىنىڭ ولىمىنە سەبەپكەر بولعان قايعىلى وقيعا بويىنشا قىلمىستىق ءىستىڭ نەگىزگى پروتسەستەرى ءوتىپ جاتىر.
سوتتا مارقۇم قۇتقارۋشى ولەگ تىشكەۆيچتىڭ قىزى يانا وسولودكوۆا كۋاگەر رەتىندە وقيعاعا قاتىستى ءوزى بىلەتىن جايتتارمەن ءبولىستى. يانانىڭ ايتۋىنشا, ول اكەسىمەن سول كۇنگى قايعىلى وقيعادان جارتى ساعات بۇرىن سويلەسكەن.
«اكەم مارقۇم تەلەفون ارقىلى سويلەسكەنىمىزدە ءوزىنىڭ بۇل كۇنى رەزەرۆتىك قۇرامدا بولعانىن, دەمالىس بولمەسىندە تىنىعىپ وتىرعانىن ايتقان ەدى. ونىڭ قالايشا وقيعا ورنىنا بارۋعا پارمەن العانى مەن ءۇشىن تۇسىنىكسىز. ءبىر سوزبەن ايتقاندا, ول ويىققا قۇلاعان الگى اۆتوبۋس سالونىندا بولۋعا ءتيىس ەمەس ەدى. اكەمدى جانە جانىنداعى سەرىكتەرىن اپات ورنىنا زاڭسىز جىبەرگەن دەپ ەسەپتەيمىن. ولار جاۋاپسىزدىقتىڭ قۇربانى بولدى. ال قىرشىن كەتكەن سارقىت بەردىقان دەگەن جاس جىگىتتىڭ (1999 جىلى تۋعان) ونداي اپاتتىق وقيعاعا باراتىنداي تاجىريبەسى بولماعان. جاقىندا عانا جۇمىسقا تۇرعاندىقتان ول كۇردەلى قۇتقارۋ وپەراتسيالارىنا ءتىپتى ۇيرەتىلمەگەن كورىنەدى. ال جۇمىس بەرۋشى - كاسىبي اسكەريلەندىرىلگەن اۆاريالىق-قۇتقارۋ قىزمەتتەرىنىڭ رەسپۋبليكالىق ورتالىق شتابىندا (كااقق روش) قىزمەتكەرلەرىن مۇنداي ىسكە ۇيرەتۋگە رۇقسات بەرەتىن ءتيىستى ليتسەنزياسى جوق ەكەنىن انىقتادىم. سوندىقتان بۇل جەردە ۇلكەن زاڭسىزدىق بولعان. مەن بۇل سوتتا كااقق ۇيىمىنىڭ دا جاۋاپقا تارتىلۋىن سۇرايمىن», دەدى سوتتا يانا وسولودكوۆا.
يانانىڭ سوزىنشە, مارقۇم اكەسى جۇمىستا ۇنەمى قۇتقارۋشىلاردىڭ جەتىسپەيتىنىنە, تەحنيكالاردىڭ ەسكىلىگىنە شاعىمدانعان. ونىڭ ۇستىنە ارنايى كيىمدەرى دە توزىعى جەتكەن, ناشار كۇيدە بولعان كورىنەدى.
«اۆتوبۋستا ارنايى قۇرالداردى قويىپ, رەسپيراتور دا بولماعان. «كااقق روش» جشس جۇمىس بەرۋشى رەتىندە قىزمەتكەرلەرىنىڭ قاۋىپسىزدىگىنە جاۋاپ بەرۋى ءتيىس. الايدا مەن سوتتا ولارعا قاتىستى ايىپتاۋ اكتىلەرىن كورمەي وتىرمىن. اتالعان قۇتقارۋ ۇيىمىن جاۋاپقا تارتۋ, تەرگەۋ جۇرگىزۋ تۋرالى وڭىرلىك انتيكور قىزمەتىنە, پروكۋراتۋراعا شاعىم تۇسىرگەنمىن. ولاردىڭ ناتيجەسى بولادى دەگەن ۇمىتتەمىن», دەپ قوستى يانا وسولودكوۆا.
