– تەمىر اۋدانىنىڭ تەمىر قالاسىندا ساقتاعان بايىشەۆ اتىنداعى ورتا مەكتەپتىڭ ورىس سىنىبىندا وقىدىم. 6-سىنىپقا دەيىن قازاق ءتىلىن بىلمەدىم. سودان ناعاشى اجەمنىڭ ىقپالىمەن ەكى جىل ىشىندە اۋىزەكى قازاق ءتىلىن مەڭگەردىم. اجەم – شەشەن ۇلتىنان بولسا دا, جانى قازاق, وتە باۋىرمال, دانا كىسى. مەنىڭ تۇلعالىق جەتىلۋىمە, ومىردە ورنىمدى تابۋىما, ماماندىق تاڭداۋىما اجەمنىڭ ىقپالى زور بولدى. العاشقىدا جالعاۋلار مەن سەپتىكتەردى تۇسىنبەي, ءوز ويىمدى ناقتى جەتكىزە الماي جۇرسەم دە, اجەم ىشكى قورقىنىشىمدى جەڭدىرىپ, ماعان تەك قازاقشا سويلەدى. وسى جاسىمدا ءتىل ۇيرەنۋگە دەگەن قۇلشىنىسىمنىڭ ارتقانىن بايقاعان قازاق ءتىلى مەن ادەبيەتى ءپانى مۇعالىمى كومەككە كەلدى. 11-سىنىپتا قازاق ءتىلى مەن ادەبيەتى ءپانى مۇعالىمى بولامىن دەپ شەشىپ, قۇدايبەرگەن جۇبانوۆ اتىنداعى اقتوبە وڭىرلىك ۋنيۆەرسيتەتىنە قۇجات تاپسىرىپ, گرانتپەن ءتۇستىم. 1-كۋرستا قازاق ءتىلى تەورياسىن مەڭگەرۋدە قينالعانىمدى جاسىرمايمىن. سونداي كۇندەرى وقۋدان شىعامىن دەپ تە تالاي جىلادىم. الايدا ۋنيۆەرسيتەت ۇستازدارى – ءاليا ۇلىقپانوۆا, باعيلا قۇرمانبەكقىزى, ابات پانگەرەەۆ بىلمەگەنىمدى ءتۇسىندىردى, قوسىمشا تاپسىرمالار بەردى, تىلگە جەڭىل, وقۋعا ۇعىنىقتى, ادەبي كىتاپتاردى تاڭداپ بەردى. 2-كۋرستا ساباقتان بوس ۋاقىتىمدا ءتىل ۇيرەتۋ ورتالىعىنا قوسىمشا جۇمىس اتقاردىم. بۇل دا ماعان جاقسى مۇمكىندىك بولدى, – دەيدى جاس ۇستاز.
ماماندىعىن قاتتى ۇناتاتىن اليزا وسى وقۋ ورتالىعىندا ءجۇرىپ, قازاق ءتىلىن وقىتۋ ادىستەمەسىن جازىپ شىقتى. جۇمىسىنا تياناقتى جاس ءوز تاجىريبەسى ارقىلى باسقا ۇلتتارعا قازاق ءتىلىن ۇيرەتۋدىڭ ەڭ وڭاي ءارى ءتيىمدى نۇسقاسىن ازىرلەپ, «Qazaqvibe» كۋرسىن اشتى. سودان بەرى دە ءۇش جىل ءوتتى. بۇگىندە ونىڭ وقۋشىلارىنىڭ سانى 200-دەن اسسا, ولاردىڭ ەڭ كىشىسىنىڭ جاسى – 4-تە, ەڭ ۇلكەنى – 64 جاستا.
– مەن باسقا ءوڭىر تۇرعىندارىنا, ءتىپتى شەتەل ازاماتتارىنا دا ونلاين ءدارىس بەرەمىن. ءار شاكىرتىمە قۇرمەتپەن قارايمىن جانە قازاق ءتىلىن ناسيحاتتاۋعا مۇمكىندىك بەرگەن قازاقستان حالقى اسسامبلەياسىنا العىسىم شەكسىز. اسسامبلەيا جاستارى ۇيىمداستىرعان ءىس-شارالارعا وقۋشىلارىمدى قاتىستىرۋعا تىرىسامىن. قازاق ءتىلىن مەڭگەرۋ اياسىن كەڭەيتۋدەگى تاعى ءبىر جوبام – «سويلە, قازاقشا!» چەللەندجى. ينتەرنەت جەلىسىمەن ۇيىمداستىرعان باستامامىزدى اتىراۋ, پاۆلودار, باتىس قازاقستان وبلىستارىنىڭ جاستارى قۇپ الدى, – دەيدى اليزا.
جيەنىنىڭ جاس كەزىنەن جانى قازاق بولىپ وسۋىنە بارىن سالعان اليزانىڭ اجەسى – 1944 جىلى 23 اقپاندا كۇشتەپ دەپورتاتسيالانعان شەشەن ۇلتىنىڭ وكىلى. قاقاعان قىستىڭ ورتاسىندا جۇك ۆاگونىمەن بىرنەشە اي ءجۇرىپ كەلىپ, اش-جالاڭاش, ءارى-ءسارى كۇيدە ايدالادا قالعان ادامداردى ۇيلەرىنە كىرگىزىپ, پانالاتقان, اس-سۋىن بەرگەن جەرگىلىكتى جۇرتتىڭ پەيىلى جاس شەشەن قىزىنىڭ ومىرىنە ازىق بولدى. قازاق دالاسى ەكىنشى وتانىنا اينالدى, ەڭبەك ەتتى, وسى توپىراقتا جاپىراعان جايدى. جاس ۇلعايعان كەزىندە نەمەرە-جيەندەرىنىڭ تامىرى قازاق بولىپ سوعۋىنا بار كۇشىن سالعان ابزال انانىڭ ونەگەسىن كورگەن ۇرپاقتارى دا كورگەنىن قايتالاپ ءجۇر.
اقتوبە وبلىسى
