الماتىدا ءماسليحاتتىڭ كەزەكتەن تىس XXIX سەسسياسى بارىسىندا دەپۋتاتتار ءۇي جانۋارلارىن كۇتىپ-باعۋ مەن سەرۋەندەتۋدىڭ جاڭا قاعيدالارىن بەكىتتى. بۇل قۇجاتتى جەرگىلىكتى نورمالاردى قازاقستان زاڭناماسىنىڭ سوڭعى وزگەرىستەرىنە سايكەس كەلتىرۋ ءۇشىن قالانىڭ كاسىپكەرلىك جانە ينۆەستيتسيالار باسقارماسى ازىرلەگەن.
جاڭا ەرەجەلەر تۇرعىنداردىڭ قاۋىپسىزدىگى مەن قالانىڭ تازالىعىن ساقتاۋعا باعىتتالعان. ەرەجەگە سايكەس ءۇي جانۋارلارى يەلەرىنىڭ قۇقىقتارى بەلگىلەندى. ەندى حايۋاناتتاردىڭ كوشەدەگى مىنەز-قۇلقى ءۇشىن جاۋاپكەرشىلىك كۇشەيە تۇسەدى. مىسالى, ولاردى قاراۋسىز قالدىرۋعا تىيىم سالىنادى. ەگەر كەنەتتەن يەسى وعان كۇتىم جاساي الماسا, ۋاقىتشا باسپانا تاۋىپ, قامقورلىقتى ءۇشىنشى تۇلعاعا بەرۋى ءتيىس نەمەسە ونى حايۋاناتتار باعىنا ورنالاستىرۋى كەرەك.
اسىرەسە, يتتەرگە ەرەكشە نازار اۋدارىلادى. ولاردى ءوز بەتىنشە سەرۋەندەتۋگە بولمايدى جانە اينالاسىنداعىلارعا قاۋىپ توندىرمەيتىندەي جاعدايدا الىپ ءجۇرۋى كەرەك. قوعامدىق ورىنداردا قارعىباۋىنىڭ ۇزىندىعى ەكى مەتردەن اسپاعانى ءجون. ال كوپشىلىك ورىنداردا, تاسىمالداۋ كەزىندە جانە جەرگىلىكتى اتقارۋشى ورگاندار, ۇيىمدار, مەكەمەلەر بەلگىلەگەن ارنايى ايماقتاردا يتكە تۇمىلدىرىق كيگىزىلۋى ءتيىس. ءۇي اۋلاسىندا قورشاۋى جوق يتتەردى قارعىباۋمەن ۇستاۋ قاجەت. ال ارنايى باقىلاۋدى قاجەت ەتەتىن يتتەرى بار ۋچاسكەلەردىڭ قاقپاسىندا ەسكەرتۋ بەلگىسى ءىلىنۋى مىندەتتى.
«جاتتىعۋ الاڭى» مەن «ەركىن سەرۋەندەۋ» سياقتى جاڭا ۇعىمدار دا الماتىنىڭ بارلىق تۇرعىندارى ءۇشىن مىندەتتى ەرەجەلەر قاتارىنا قوسىلدى.
