سۋرەتتى تۇسىرگەن – اۆتور
جاس تالانتتاردان تۇراتىن «Giovani Talenti» كامەرالىق وركەسترىنىڭ رەپەرتۋارىنداعى «قازاقستان كومپوزيتورلارىنىڭ شىعارمالارى» جيناعىن ونەرتانۋشىلار جىلى قابىلدادى. جوبا مادەنيەت جانە اقپارات مينيسترلىگىنىڭ قولداۋىمەن جۇزەگە اسىرىلعان «تاۋەلسىزدىك ۇرپاقتارى» مەملەكەتتىك گرانتى اياسىندا جارىق كورىپ وتىر.
جيناققا ەنگەن تۋىندىلار — ونەرگە ءوز ورنەگىمەن كەلگەن تالانتتى جاس كومپوزيتورلاردىڭ كامەرالىق وركەسترگە ارنالعان شىعارمالارىن قامتىعان. جوبا اۆتورلارى جيناقتى شىعارۋداعى ماقسات دارىندى مۋزىكانتتارعا قولجەتىمدى, ءارى ساپالى ۇلتتىق رەپەرتۋار ۇسىنۋ بولعانىن ايتادى. ونەرتانۋشىلاردىڭ سوزىنشە, جيناق بولاشاق ونەرپازداردىڭ كاسىبي دامۋىنا, ۇلتتىق مۋزىكانى تەرەڭ تانۋىنا ىقپال ەتپەك.
كەشتە «Giovani Talenti» وركەسترى احمەت جۇبانوۆ اتىنداعى مۋزىكالىق مەكتەپتىڭ 25 شاكىرتى ونەر كورسەتتى. ولار باح, چايكوۆسكي, گريگ سياقتى كلاسسيكتەردىڭ تۋىندىلارىن, سونداي-اق وتاندىق كومپوزيتورلاردىڭ پرەمەرالىق شىعارمالارىن ورىنداپ, كورەرمەن ىقىلاسىنا بولەندى.
شەبەرلىك پەن شابىت توعىسقان وركەسترگە حالىقارالىق دەڭگەيدەگى ديريجەر, قۇرمانعازى اتىنداعى قازاق ۇلتتىق كونسەرۆاتورياسىنىڭ تۇلەگى, «تاۋەلسىزدىك ۇرپاقتارى» گرانتىنىڭ جەڭىمپازى ارشات ءشارىپ جەتەكشىلىك ەتتى. كەش شىمىلدىعىن پ.ي.چايكوۆسكي اتىنداعى ماسكەۋ مەملەكەتتىك كونسەرۆاتورياسىنىڭ تۇلەكتەرى — كارينا يزمايلوۆا مەن ابىلاي نۇرلىبەك اشىپ, ولاردىڭ كاسىبي ورىنداۋ شەبەرلىگى مەن ساحنا مادەنيەتى كورەرمەندەرگە رۋحاني دەمالىس سىيلادى. ءىس-شارا ەلىمىزدەگى اكادەميالىق مۋزىكا مەكتەبىنىڭ نەگىزىن قالاۋشى, ۇلت مادەنيەتىنىڭ الىبى احمەت جۇبانوۆتىڭ تۋعان كۇنىنە وراي ۇيىمداستىرىلىپ وتىر.
« ۇلى ۇستازدىڭ ونەر مۇراسىن ۇلىقتاۋ — بۇگىنگى ۇرپاقتىڭ پارىزى. مۋزىكا ءتىلى ادامزات بالاسىن ءبىر-بىرىنە جاقىنداستىراتىن قۇدىرەت. ونەردە شەكارا بولمايتىنى سوندىقتان. حالقىمىزدىڭ رۋحاني باي مادەنيەتى ۇلتتىق مۋزىكامىزدىڭ وزەگىندە جاتىر. ونى زامانعا ساي تۇرلەندىرۋ, ءارى قاراي دامىتۋ – جاس كومپوزيتورلارعا جۇكتەلەتىن جاۋاپتى مىندەت. جوباعا قولداۋ كورسەتكەن جاندارعا العىس ايتامىز», دەيدى «مادەنيەت» باعىتى بويىنشا «تاۋەلسىزدىك ۇرپاقتارى» مەملەكەتتىك گرانتىنىڭ جەڭىمپازى ارشات ءشارىپ.
ايتۋلى كەش قۇرمانعازى اتىنداعى قازاق ۇلتتىق كونسەرۆاتورياسى ۇسىنعان «داۋىرلەر ۇندەستىگى» كورمەسىنە ۇلاستى. كورمە ۇلت اسپاپتارىن ورىنداۋ مەن زەرتتەپ-زەردەلەۋدى بيىك بەلەسكە كوتەرگەن ەلىمىزدىڭ كومپوزيتورلىق مەكتەبىن قالىپتاستىرۋشى, العاشقى كاسىبي مۋزىكاتانۋشى احمەت جۇبانوۆتىڭ ءومىر تىنىسى مەن شىعارماشىلىق مۇراسىنان سىر شەرتەدى. 1945 جىلى ا.جۇبانوۆتىڭ باسشىلىعىمەن كونسەرۆاتوريادا حالىق اسپاپتارى كافەدراسى قۇرىلىپ, كافەدرا 1980 جىلى حالىق اسپاپتارى فاكۋلتەتى رەتىندە اياسىن كەڭەيتكەن بولاتىن. ۇلتىمىزدىڭ كاسىبي اۋىزشا ورىنداۋشىلىق داستۇرلەرىن جانداندىرۋ ماقساتىمەن فاكۋلتەت جانىنان 1987 جىلى اشىلعان «حالىق ءانى» كافەدراسى دا ونەر كەڭىستىگىندە قانشاما تالانتتاردى قاناتتاندىرعان كيەلى شاڭىراق.
الماتى
