ءجۇرسىن شاياحمەت ۇلىنىڭ تالانتى تابيعاتتان دارىعانداي. جانى دالامەن ەگىز. قىلقالامىمەن ارقانىڭ ءىنجۋ-مارجانىنا اينالعان قارقارالىنى كوپ سالىپتى. شايتانكولىن, ورمانىن, تاۋىن سۋرەتتەپتى. تۋعان جەرگە ارنالعان 100-دەن اسا تۋىندىنى جارىققا اكەلگەن. ەرەكشەلىگى سول, بىرىنە-ءبىرى ۇقسامايدى. «ورمانداعى تاڭ», «قارقارالى تاۋلارى», «تاۋ ىشىندە», «ايلى ءتۇن», «شايتانكول», «كەنتتەگى قىس» سەكىلدى عاجاپ كارتينالارىنان سۇلۋ تابيعاتقا دەگەن ىڭكارلىك, تۋعان جەرگە دەگەن ساعىنىش لەبى سەزىلەتىندەي.
كورمەنىڭ سالتاناتتى اشىلۋ راسىمىندە قاراعاندىلىق تانىمال سۋرەتشى مۇرات قالقاباەۆ كورمە جۇمىستارىن تاماشالاپ شىققانىن, ءجۇرسىن شاياحمەت ۇلىنىڭ شىعارماشىلىعىمەن بۇرىننان تانىس ەكەنىن ايتىپ, مەرەيتويىمەن قۇتتىقتادى.
ءجۇرسىن بالكەنوۆ – ە.ا.بوكەتوۆ اتىنداعى قاراعاندى زەرتتەۋ ۋنيۆەرسيتەتىنىڭ, كاسىبي-كوركەم ونەر فاكۋلتەتىنىڭ ديزاين جانە بەينەلەۋ ونەرى كافەدراسىنىڭ پروفەسسورى, بەينەلەۋ ونەرىنىڭ جاناشىرى. سوناۋ 1987 جىلى قاراعاندىعا اسپيرانتۋرانى ەندى ءبىتىرىپ كەلگەن ول ونەرلى جاستار ءبىلىم السىن, وقىسىن دەپ پەداگوگيكالىق ينستيتۋتتا «كوركەم سۋرەت» فاكۋلتەتىنىڭ قايتا اشىلۋىنا ىقپال ەتكەن ەدى.
ال سۋرەتشىلەر وداعىنىڭ وبلىستاعى توراعاسى ايدارحان قالماحانوۆ مەرەيتوي يەسىنىڭ ومىراۋىنا «بەينەلەۋ ونەرىنە سىڭىرگەن ەڭبەگى ءۇشىن» توسبەلگىسىن جارقىراتا تاقتى.
«سۋرەتشى تالعامى ايتار ويىمەن ۇندەس بولۋ كەرەك. سوندا ونەر باعالى بولادى. ماسەلەن, مەن ءاربىر جۇمىسىمدا قازاقتىڭ جانىن كورسەتۋگە ۇمتىلامىن. سوندىقتان دا «دانالىعىم – دالا» دەگەندى ۇنەمى ايتىپ وتىرامىن. سەبەبى ەۋروپادا, باسقا جۇرتتا دالا دەگەن ۇعىم بولا بەرمەيدى. ول تۇركى جۇرتىنا عانا ءتان, ونىڭ ىشىندە قازاقتا بار. بۇعان دەيىن مەن جۇمىسىما كورگەن دۇنيەمدى اينىتپاي سالۋدى ماقسات ساناماپپىن. ونى فوتواپپاراتتار دا ءمىنسىز ورىنداي الادى. مەنىڭ ويلاعانىم – ءاربىر سالعان كارتينام ارقىلى ادام جانىنا ءۇڭىلۋ, ادام جانىن سويلەتۋ, سۋرەت ارقىلى سىرلاسۋ. وسىعان دەيىن بەينەلەۋ ونەرى جونىندە بىرنەشە عىلىمي كىتاپ جازدىم. سونىڭ پايداسىن قازاق بالالارى كورىپ جاتىر. وسىدان ارتىق باقىت بار ما؟», دەپ تەبىرەندى سۋرەتشى.
قاراعاندى وبلىسى
