2022-2024 جىلدارى وڭىردە 420,5 شاقىرىم سۋ قۇبىرى جاڭارتىلىپ, 24 اۋىلدا سۋ ساپاسى جاقساردى. قاراتال جانە الاكول اۋداندارىندا ءتورت اۋىل ورتالىق سۋ جۇيەسىنە قوسىلدى. اسىرەسە قاراتال اۋدانىنداعى شالعاي كوپبىرلىك اۋىلىندا تۇزدى سۋ ماسەلەسى شەشىلىپ, تۇرعىندار ساپالى سۋ تۇتىنا باستادى.
تەكەلى قالاسىندا دا كوپتەن بەرى شەشىمىن تاپپاي كەلگەن اۋىز سۋ ماسەلەسى وڭ ناتيجەگە جەتتى. بۇرىنعى ەسكى سۇزگى ستانساسى جاڭارتىلىپ, جاڭا سۋ رەزەرۆۋارلارى مەن 16,5 كم سۋ قۇبىرى سالىندى. قازىر بارلىق جۇمىستار اياقتالۋ ساتىسىندا, مامىر ايىندا تولىق پايدالانۋعا بەرىلەدى. سونىمەن قاتار ىشكى سۋ جۇيەلەرىن جاڭارتۋ باستالىپ, وعان قوسىمشا قارجى ءبولىندى.
