سۋرەت: senate.parlam.kz
ماۋلەن اشىمباەۆ مەملەكەت باسشىسى قازاقستان حالقى اسسامبلەياسىنىڭ ءحححىV سەسسياسىندا بەلگىلەپ بەرگەن ەتنوسارالىق قاتىناس سالاسىنداعى مىندەتتەرگە نازار اۋداردى.
«پرەزيدەنت قاسىم-جومارت توقاەۆ قوعامدىق كەلىسىم سالاسىنداعى بىرقاتار ماڭىزدى باستامانى ايقىنداپ بەردى. بۇل رەتتە ء«بىر ەل – ءبىر مۇددە» دەپۋتاتتىق توبىنىڭ وڭىرلەرمەن ءوزارا ءىس-قيمىلىن ودان ءارى نىعايتۋ جانە جالپىۇلتتىق بىرلىك يدەيالارىن اقپاراتتىق تۇرعىدان بەلسەندى تۇردە دارىپتەۋ قاجەت ەكەنى ايتىلدى. مەملەكەت باسشىسى الەمدىك جانە ءداستۇرلى دىندەر كوشباسشىلارى سەزىنىڭ اتالعان باعىتتاعى ءرولىن دە ەرەكشە اتاپ ءوتتى. وسى ورايدا سەناتورلاردىڭ ەلدەگى قوعامدىق كەلىسىمدى نىعايتۋعا, ازاماتتاردىڭ قۇقىقتارىن قورعاۋعا جانە ادىلەتتى قازاقستان قالىپتاستىرۋعا قاجەتتى بەرىك زاڭنامالىق بازا قۇرۋدى كوزدەيتىن جۇمىسى ايرىقشا مانگە يە», دەپ پالاتا توراعاسى ارىپتەستەرىن مەملەكەت باسشىسى جۇكتەگەن مىندەتتەردى ساپالى ىسكە اسىرۋ جولىندا ودان ءارى بەلسەندىلىك تانىتۋعا شاقىردى.
سونىمەن قاتار سەناتورلار وسى اپتادا وتەتىن كوميتەت وتىرىستارىندا قارالاتىن تاقىرىپتاردى پىسىقتادى. اتاپ ايتقاندا, دەپۋتاتتار اسكەري قىزمەتشىلەر مەن ولاردىڭ وتباسى مۇشەلەرىن مەديتسينالىق قامتاماسىز ەتۋ, ۇلتتىق قور قاراجاتىن باسقارۋ تيىمدىلىگىن ارتتىرۋ, جىلۋ ەنەرگەتيكاسى جانە ۆەتەرينارلىق قىزمەت سالاسىن دامىتۋ ماسەلەلەرىن تالقىلايدى. سونداي-اق «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەكونوميكالىق قۇقىق بۇزۋشىلىقتاردىڭ جەكەلەگەن تۇرلەرىن قىلمىستىق سيپاتتان ارىلتۋ جانە زاڭسىز جولمەن الىنعان كىرىستەردى زاڭداستىرۋعا (جىلىستاتۋعا) جانە تەرروريزمدى قارجىلاندىرۋعا قارسى ءىس-قيمىل تۋرالى زاڭناماسىن جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدى جۇزەگە اسىرۋ اياسىندا كاسىپكەرلىك سۋبەكتىلەرىنىڭ قۇقىقتارىن قورعاۋ ماسەلەلەرىنە ارنالعان دوڭگەلەك ۇستەل ۇيىمداستىرىلادى. ءىس-شارادا دەپۋتاتتار مۇددەلى تاراپتارمەن بىرلەسىپ, اتالعان سالاداعى تۇيتكىلدەردى شەشۋ جانە ونى دامىتۋ تەتىكتەرىن تالقىلايدى.
