ءبىر جىل ىشىندە قازاقستان رەيتينگتە 20 قاتارعا كوتەرىلدى, بۇل سالانىڭ قارقىندى دامۋىن جانە ءموبيلدى ينتەرنەت جىلدامدىعى مەن ساپاسىنىڭ جاقسارعانىن كورسەتەدى. وسى كورسەتكىشتىڭ ارقاسىندا قازاقستان رۋمىنيا, ۆەنگريا, ۇلىبريتانيا, گەرمانيا, تۇركيا, جاپونيا جانە ت.ب. ەلدەردى باسىپ وزدى.
ورتالىق ازيا مەملەكەتتەرى مەن ەۋرازيالىق ەكونوميكالىق وداققا كەلەتىن بولساق, قازاقستاننىڭ پايداسىنا الشاقتىق ايتارلىقتاي بايقالادى. ماسەلەن, قازاقستانداعى ءموبيلدى ينتەرنەت جىلدامدىعى وزبەكستانمەن سالىستىرعاندا 58%, قىرعىزستاننان 75,9%, ارمەنيادان 94,8%, رەسەيدەن 2,2 ەسە جانە بەلارۋستەن 4 ەسە جوعارى.
ينتەرنەتكە قوسىلۋ جىلدامدىعى مەن ساپاسىن تالداۋعا ماماندانعان جەتەكشى حالىقارالىق كومپانيانىڭ ساراپشىلارى Ookla ءوز زەرتتەۋلەرىندە اتاپ وتكەندەي, قازاقستانداعى ءموبيلدى ينتەرنەت جىلدامدىعىنىڭ ءوسۋى 5G جەلىلەرىن دامىتۋدىڭ ارقاسىندا كۇشتى سەرپىن الدى.
قازاقستان ورتالىق ازيا مەن ەۋرازيالىق ەكونوميكالىق وداق ەلدەرىنىڭ ىشىندە 5G-ءدى كوممەرتسيالىق تۇردە ىسكە قوسقان العاشقى ەلدەردىڭ ءبىرى. 2025 جىلعى ءساۋىر ايىنىڭ باسىنداعى جاعداي بويىنشا قازاقستاندا 3 مىڭنان استام 5G بازالىق ستانتسياسى ورناتىلعان.
تۇسىنىكتى بولۋ ءۇشىن رەسپۋبليكاداعى 4G مەن 5G كورسەتكىشتەرىن سالىستىرايىق. 2024 جىلدىڭ ءبىرىنشى جارتىجىلدىعىندا 5G جەلىسىندەگى ءموبيلدى ينتەرنەتتىڭ جۇكتەۋ جىلدامدىعى سەكۋندىنا 332,11 مەگابيتتى قۇرادى, ال 4G جەلىسىندە بار بولعانى 32,59 مەگابيت بولدى, ياعني ايىرماشىلىق 10 ەسە اسادى. دەرەكتەردى جىبەرۋ جىلدامدىعى بويىنشا دا ۇقساس جاعداي بايقالادى: 4G جەلىسىندە سەكۋندىنا 12,6 مەگابيت بولسا, 5G جەلىسىندە 32,3 مەگابيت – ايىرماشىلىق 2,5 ەسە.
وسىلايشا, بەسىنشى بۋىن جەلىسى وزىنەن بۇرىنعى جەلىدەن ايتارلىقتاي وزىپ تۇر جانە ءدال 5G قازاقستانداعى ءموبيلدى ينتەرنەتتىڭ جىلدامدىعى مەن ساپاسىن ارتتىرۋدىڭ نەگىزگى قوزعاۋشى كۇشىنە اينالدى.
