ۇلتتىق مۋزىكانىڭ الىبى تاتەكەڭە ارنالعان ونەر دوداسىنا استانا, الماتى, شىمكەنت, تالدىقورعان, قوستاناي, سەمەي, قىزىلوردا, اقتوبە, ماڭعىستاۋ, تاعى دا باسقا وڭىرلەردەن كەلگەن 70-كە جۋىق ونەرپاز باق سىنادى. ولار ەكى كۇن بويى قىلقوبىز, پريما-قوبىز, دومبىرا, تاعى دا باسقا اسپاپتاردا كلاسسيكالىق تۋىندىلار مەن حالىق كۇيلەرىن ورىندادى.
ۇمىتكەرلەردىڭ دارىنىن ەسىمدەرى ەلگە بەلگىلى ونەر ساڭلاقتارىنان قۇرالعان قازىلار القاسى تارازىلادى. «قىل-قوبىز» اتالىمىنىڭ III دارەجەلى ديپلومى ا.جۇبانوۆ اتىنداعى دارىندى بالالارعا ارنالعان رەسپۋبليكالىق مەكتەپ وقۋشىسى تەمىرلان اليەۆكە, II دارەجەلى ديپلومى ك.بايسەيىتوۆا اتىنداعى قازاق ۇلتتىق ونەر ۋنيۆەرسيتەتىنىڭ ستۋدەنتى ابىلاي ەسەتوۆكە, I دارەجەلى ديپلومى جامبىل اتىنداعى قازاق مەملەكەتتىك اكادەميالىق فيلارمونياسىنىڭ ءانشىسى ەراسىل تورەحانوۆقا بۇيىردى.
ال «قوبىز-پريما» اتالىمىندا ك.بايسەيىتوۆا اتىنداعى قازاق ۇلتتىق ونەر ۋنيۆەرسيتەتىنىڭ ستۋدەنتى بەكزادا ساميعوللا – III ورىن, ءدال وسى ۋنيۆەرسيتەتتىڭ ستۋدەنتى نۇرايلىم ءابدى – II ورىن, جامبىل اتىنداعى قازاق مەملەكەتتىك اكادەميالىق فيلارمونياسىنىڭ ونەرپازى ءاسيا نۇرتاي I ورىن يەلەندى.
كونكۋرستىڭ «دومبىرا» اتالىمىندا م.تولەباەۆ اتىنداعى سەمەي مۋزىكالىق ۋچيليششەسىنىڭ ستۋدەنتى ەربولات تالاپحان, قاراعاندى قالاسى №2 مۋزىكا مەكتەبىنىڭ وقۋشىسى ماناپ انىقبەكوۆ, قۇرمانعازى اتىنداعى قازاق ۇلتتىق كونسەرۆاتورياسىنىڭ ستۋدەنتى سارا قامباروۆا ديپلومانت اتاندى. اتالعان اتالىم بويىنشا شەت اۋدانى مادەنيەت ءۇيىنىڭ ونەرپازى داۋلەتبەك ءجۇسىپ – III ورىن, ك.بايسەيىتوۆا اتىنداعى قازاق ۇلتتىق ونەر ۋنيۆەرسيتەتىنىڭ ستۋدەنتى ايانا ساتاەۆا – II ورىن, ا.جۇبانوۆ اتىنداعى دارىندى بالالارعا ارنالعان رەسپۋبليكالىق مۋزىكا مەكتەبىنىڭ وقۋشىسى ءنۇرالى سايات I ورىن الدى. وسى جولى قازاقستان-ازيا ساۋدا جانە مادەنيەتتى دامىتۋ قاۋىمداستىعى «ونەرلى وركەن» ارنايى سىيلىقتارىن تاعايىنداپ, بىرقاتار ۇمىتكەردى ماراپاتتادى.
سونىمەن, قۇرمانعازى اتىنداعى قازاق ۇلتتىق كونسەرۆاتورياسىنىڭ ونەرپازى ەرجانات جارقىننۇر بايقاۋدىڭ باس بايگەسىن الدى. جەڭىمپازعا «ۇكىلى دومبىرا» بايقاۋىنىڭ باس جۇلدە يەگەرى, قولونەر شەبەرى ناربەك وحانوۆتىڭ دومبىراسى تارتۋ ەتىلدى.
«باق شابا ما, باپ شابا ما؟» دەمەكشى, باس جۇلدە بۇيىردى. بۇل مەنىڭ عانا جەڭىسىم ەمەس, بىزگە اماناتتالعان ءداستۇرلى ونەردىڭ جەڭىسى دەپ ويلايمىن. ءوزىم توكپە كۇيمەن وسكەنمىن. ارقا جەرىنە كەلىپ, شەرتپە كۇيدەن وسىنداي جەتىستىككە جەتۋ – مارتەبە», دەدى بايقاۋدىڭ باس جۇلدە يەگەرى.
قاراعاندى وبلىسى
