التى جولاقتان تۇراتىن «ا1» ساناتىنداعى جولدىڭ جالپى ۇزىندىعى 66 شاقىرىمدى قۇرايدى. وڭىرگە كەلگەن ءبىر توپ سەنات دەپۋتاتى الاتاۋ قالاسىنداعى ۇلكەن الماتى اينالما اۆتوجولىن پايدالانۋ باسقارماسىنا ء(ۇاااجپب) ارنايى بارىپ, اۆتوجول جەلىسىن دامىتۋ ماسەلەلەرىن تالقىلادى.
سەناتورلار ينفراقۇرىلىمدىق جوبانى ىسكە اسىرۋ ناتيجەسىمەن تانىسىپ, كۇرە جولدى پايدالانۋدىڭ قازىرگى جاي-كۇيىن باعالادى.
«جولدى كۇتىپ ۇستاۋعا 16 تەحنيكا, 4 پاترۋلدىك ماشينا ساتىپ الىندى. تازارتۋ جۇمىستارى جىل بويى ۇزدىكسىز جۇرگىزىلەدى. جۇمىسشىلاردىڭ تۇراقتى ءارى قالىپتى جۇمىس ىستەۋىنە بارلىق جاعداي جاسالعان. دەمالىس ورنى, اسحانا جۇمىس ىستەيدى. تەحنيكالارى تەكسەرىستەن وتەدى جانە وسىندا جاسالادى. جارىق ءسونىپ, باسقا دا جاعداي بولا قالسا, اپاتتىق ستانسا ىسكە قوسىلادى. ءبىزدىڭ مىندەتىمىز – جول كۇتىمىن ۇزبەي جۇرگىزۋ. تاريف جىل سايىن ايلىق كورسەتكىشتەرگە بايلانىستى وزگەرىپ تۇرادى. ايتالىق, جەڭىل ماشينالار 1 ساعاتقا 281 تەڭگە تولەيدى. باستاپقى باعاسى 241 تەڭگە بولعان. سودان بەرى 2 رەت ءوستى. سونداي-اق جولدىڭ تەگىستىگى, بۇرىلاتىن راديۋستارى كولىكتىڭ ساعاتىنا 150 شاقىرىممەن جۇرۋىنە ەسەپتەلگەن. بىراق جول قاۋىپسىزدىگىن ەسكەرىپ, عىلىمي-زەرتتەۋ ينستيتۋتتارى مەن اكىمشىلىك پوليتسيا ۇسىنىسىمەن جىلدامدىقتى ساعاتىنا 120-دان اسىرماۋدى ەسكەرتەتىن جول بەلگىلەرى قويىلدى. جول-كولىك وقيعاسى بولسا نەمەسە جولدىڭ ءبىر جولاعى جابىلسا, جول بويىنداعى تابلودا ەسكەرتۋ حابارلامالارى بەرىلەدى», دەيدى ءۇاااج كۇتىپ-ۇستاۋ مەنەدجەرى نۇرلانبەك ومىرباەۆ.
جول پايدالانۋشىلارعا جاعداي جاساۋ ءۇشىن الداعى ۋاقىتتا ءۇاااج بويىنان جانار-جاعارماي قۇيۋ ستانسالارىن, سەرۆيستىك قىزمەت كورسەتۋ ورىندارىن سالۋ جوسپارلانعان. قازىر جولعا 7 جەردەن قوسىلۋعا بولادى. ەندى 5 راديالدى كوشە قوسىلسا, كولىك سانى دا ەسەلەنە تۇسپەك.
ء«ار تاۋلىك سايىن شامامەن 80 مىڭ كولىك جۇرەدى. ودان تۇسكەن قارجى مەملەكەتكە اۋدارىلادى. مەملەكەت كەلىسىمشارت بويىنشا 16 جىلدا جاسالعان قۇرىلىسقا, كۇتىپ ۇستاۋعا كەتكەن قاراجاتتى وتەپ بەرەدى. ءۇاااج-دا باستاپقىدا 38 مىڭ ماشينا جۇرسە, بۇگىندە بۇل كورسەتكىش 80 مىڭعا جۋىقتادى. جول بويىنداعى الماتى وبلىسىنا قاراستى تالعار, ىلە جانە قاراساي اۋدانى تۇرعىندارى ءۇشىن جەڭىلدەتىلگەن تاريف تاعايىندالعان», دەيدى اۆتوموبيل جولدارى كوميتەتى توراعاسىنىڭ ورىنباسارى باقتيار جامبىلوۆ.
سەنات دەپۋتاتى الىبەك ناۋتيەۆتىڭ ايتۋىنشا, ءىسساپاردىڭ ماقساتى – جەرگىلىكتى جەردەگى جولداردىڭ قالىپتاسۋى, ولاردىڭ دامۋى جانە بولاشاقتاعى ماسەلەسىن باعدارلاۋ.
«ەلىمىزدىڭ ترانزيتتىك الەۋەتى وتە جوعارى. وسىعان بايلانىستى مەملەكەت باسشىسى لوگيستيكانى دامىتۋ جونىندە كوپتەگەن ماسەلەنى ۇكىمەت الدىنا قويدى. وكىنىشكە قاراي, جەرگىلىكتى جەردەگى رەسپۋبليكالىق دەڭگەيدەگى جولداردىڭ ساپاسى مەن جاسالۋى حالىقتىڭ كوڭىلىنەن شىقپاي جاتىر. بىزدە جول قۇرىلىسىنىڭ ۇزاققا سوزىلۋى, ودان كەيىنگى ساپاسىنىڭ تومەندىگى, جول قاباتتارىنىڭ دۇرىس توسەلمەۋى ۇلكەن ماسەلەگە اينالعان. ءۇاااج قۇرىلىسىنىڭ سالىنۋى دا 20 جىلعا جۋىقتاعان, قۇنى دا قىمبات. 16 جىل ىشىندە ءوزىن-ءوزى اقتاۋ كەرەك. بانكتەردەن تۇسكەن قارجىنى كەلەشەك ۇرپاق قايتارۋى قاجەت جانە ول وسى كولەمدە عانا ەمەس, ۇستىندە پايىزدىق قوسىمشالارى بار. قازىر جاقسى بولعانىمەن, قايتارىمى حالىق پەن ۇكىمەتكە ۇلكەن مىندەت جۇكتەيدى. سوندىقتان وسى باعىتتاعى رەسپۋبليكالىق ماسەلەلەردى سارالاپ, ونى پارلامەنتتىك تىڭداۋدا قاراپ, ۇكىمەتكە ۇسىنىستارىمىزدى جولدايمىز», دەدى سەناتور.
سونداي-اق دەپۋتاتتار «الماتى جەلدەتكىش زاۋىتىندا» بولدى. كاسىپورىن باسشىسى مارات باققۇلوۆتىڭ سوزىنشە, زاماناۋي تەحنولوگيالار مەن جابدىقتاردى ەنگىزۋ زاۋىتقا باسەكەگە قابىلەتتى بولۋعا, نارىقتا تۇتىنۋشىلاردىڭ وزگەرىپ وتىراتىن تالاپتارىنا بەيىمدەلۋگە مۇمكىندىك بەردى.
«بۇل باسقا كومپانيالارمەن ىنتىماقتاستىققا جانە ءونىم اسسورتيمەنتىن كەڭەيتۋگە جول اشتى. ءبىز قورشاعان ورتانى قورعاۋ, ەنەرگيا ۇنەمدەۋدىڭ ۇزدىك الەمدىك تەحنولوگيالارىن قولدانامىز. كاسىپورىن «TruLaser 3030» (گەرمانيا) لازەرلىك كەسۋ ماشيناسىن, «Euromaس» (يتاليا) كوورديناتتىق-تەسكىش باسپاقتى, «TruBend» (گەرمانيا) تاباقتى يۋ ماشيناسىن, «Salvagnini» (يتاليا) پانەل يگىش ماشينانى, «Kuka» روبوتتى مانيپۋلياتورىن, «AUBO» بىرلەسكەن روبوتىن, «BORUNTE» ونەركاسىپتىك روبوتىن, «Modula» اۆتوماتتاندىرىلعان قويما ساقتاۋ جۇيەسىن پايدالانادى. قازىر كومپانيا اعىندى-سورعىلى قوندىرعىلاردى, جالپى ايىرباستاۋ كلاپاندارى مەن ءتۇتىن الاستاعىشتى, سونداي-اق راديالدى جانە وستىك جەلدەتكىشتەردى قوسا العاندا, ونىمدەردىڭ كەڭ اسسورتيمەنتىن شىعارادى. ءونىم ىشكى نارىقتا دا, شەتەلدە دە سۇرانىسقا يە», دەيدى كومپانيا باسشىسى.
سەناتورلار «دامۋ» كاسىپكەرلىكتى دامىتۋ قورىنان قارجىلىق قولداۋ العان بىرقاتار كاسىپورىن قىزمەتىمەن دە تانىستى. ولاردىڭ قاتارىندا «Teplostil» تەرموتاقتالار شىعاراتىن زاۋىت, پوليەتيلەن قۇبىرى مەن تامشىلاتۋ تۇرباسىن شىعاراتىن «يرريگاتور قازاقستان» كاسىپورنى, «بيجان» ەت وڭدەۋ زاۋىتى مەن يننوۆاتسيالىق جانە يمپورتتى الماستىراتىن جوبالاردى تابىستى ىسكە اسىراتىن باسقا دا كاسىپورىندار بار.
الماتى وبلىسى
